(ព្រះសីហនុ)៖ កម្លាំងនគរបាលខេត្តព្រះសីហនុ ក្រោមការបញ្ជាពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត នៅថ្ងៃទី០២ ខែមីនា ឆ្នាំ២០១៨នេះ បានឃាត់ខ្លួនជនសង្ស័យម្នាក់ ដោយដកហូតបានថ្នាំញៀនចំនួន៥កញ្ចប់។
មន្ដ្រីនគរបាលមូលដ្ឋានបានបញ្ជាក់ថា ប្រតិបត្តិការឃាត់ខ្លួននេះ ត្រូវបានធ្វើឡើងដោយ កម្លាំងជំនាញអធិការដ្ឋាននគរបាលស្រុកស្ទឹងហាវ សហការជាមួយកម្លាំងនគរបាលឃុំអូត្រេះ បានឃាត់ខ្លួនជនសង្ស័យម្នាក់ឈ្មោះ ឃឹម ឈីវ អាយុ៦២ឆ្នាំ នៅចំណុចក្រុម៤ ភូមិ២ ឃុំអូរត្រេះ ស្រុកស្ទឹងហាវ។
បើតាមមន្ដ្រីនគរបាលដដែល ក្រោយឃាត់ខ្លួនជនសង្ស័យខាងលើ កម្លាំងនគរបាលជំនាញដកហូតបាន ម្សៅក្រាមពណ៍សថ្លា ចំនួន៥កញ្ចប់ និងទូរស័ព្ទមួយគ្រឿង។ ក្រោយឃាត់ខ្លួនជនសង្ស័យត្រូវបានបញ្ជូនទៅការិយាល័យជំនាញ ដើម្បីចាត់ការបន្ដតាមនីតិវិធី៕
