(ភ្នំពេញ)៖ ខ្សែភាពយន្តខ្នាតធំរឿង «ក្រមុំចាស់ប៉ះក្មេងស្ទាវ» បានដាក់សម្ពោធជាផ្លូវការ នាល្ងាចថ្ងៃទី ២៧ ខែកុម្ភៈ ឆ្នាំ ២០១៨ នៅផ្សារទំនើបសុវណ្ណា ដោយមានការចូលរួម ពីសំណាក់សិល្បករ-សិល្បការិនិ យ៉ាងច្រើនកុះករ ស្ទើរភ្លូកទឹកភ្លូកដី ផ្អៀងមួយចំហៀងផ្សារទំនើប ខណៈដែលភាពយន្តនេះ ត្រូវបានផលិតករអះអាងថា ចំណាយទុនប្រមាណជិត៥ម៉ឺន ដុល្លារ ដើម្បីផលិតឡើងឲ្យរួចរាល់ជាស្ថាពរ និងមានគុណភាព តម្រូវតាមទីផ្សារ។
ម្ចាស់ផលិតកម្ម មហាហង្ស និងទើបតែជាប់តំណែង ជាអនុប្រធានសមាគភាពយន្តកម្ពុជា លោក អ៊ិន សុភិន បាននិយាយថា បើរាប់ត្រួសៗទៅ ក្នុងចំណោមខ្សែភាពយន្តធំ នេះគឺជាខ្សែប្រមាណជាង១០រឿងហើយ ដែលបានដាក់ប្រកួតប្រជែង ក្នុងវិស័យភាពយន្តកម្ពុជា ដោយបច្ចុប្បន្ន គេសម្គាល់ឃើញថា មហាជនទូទៅ ក៏ដូចជាយុវវ័យ មានការទំនោរ ចូលចិត្តមើលភាពយន្តបែបស្នេហា កំប្លុកកំប្លែង ឌឺដងគ្នា ទើបផលិតកម្ម ព្យាយាមសម្រិតសម្រាំង និពន្ធខ្សែភាពយន្ត តម្រូវទៅតាមចិត្តមហាជន។
សម្រាប់សាច់រឿង «ក្រមុំចាស់ប៉ះក្មេងស្ទាវ» និយាយអំពីការយល់ច្រឡំគ្នា ការកាច់កុងគ្នា ពីដើមដល់ចប់ មានភាពកំប្លុកកំប្លែងច្រើន បង្កប់ទៅដោយអត្ថន័យចរាចរណ៍ នៅតាមដងផ្លូវ ស្នេហារ៉ូមែនទិចខុសវ័យ រវាងតួឯកស្រី មានអាយុលើសតួឯកប្រុស៦ឆ្នាំ ដោយតួឯកប្រុស ជាអ្នកដឹកជញ្ចូនអីវ៉ាន់ ចៃដន្យថ្ងៃមួយ តួឯកប្រុស ចែកអីវ៉ាន់ខុស ក៏បានជួបតួឯកស្រី ចាប់ពីពេលនោះមក ស្នេហាក្រមុំចាស់ ជាមួយក្មេងស្ទាវ ចាប់ផ្ដើម កើតមានឡើងពីមួយថ្ងៃទៅមួយថ្ងៃ។
យ៉ាងណាមិញ រឿងបែបយុវវ័យនេះ ត្រូវបានគេដឹងថា ចំណាយដើមទុនប្រមាណជិត ៥ ម៉ឺនដុល្លារ ដោយឈុតឆាកខុសប្លែកពីសព្វមួយដង ក៏ដូចជារសជាតិថ្មីមួយបែប មានការកាច់កុង ឌឺដងគ្នា ធានាថាមិនធ្វើឲ្យមហាជន ដែលចូលចិត្ត តាមដានមើលរឿងស្នេហាឌឺដងគ្នា មិនខុសបំណងនោះទេ។
ដោយឡែកចំណុចទាក់ទាញ នៅក្នុងរឿងនេះ មានដូចជា បទចម្រៀងពីរោះ ពោរពេញទៅដោយតម្រូវចិត្តយុវវ័យ ជាពិសេស តួឯកប្រុសស្រី ចាប់ដៃគូជាលើកទី១ លេងស៊ីសង្វាក់គ្នា។ គ្រប់ឈុតឆាកទាំងអស់ នៃផ្ទៃរឿង ថតទៅតាមស្ដង់ដារនៃខ្នាតភាពយន្ត មិនឲ្យលើសពេលវេលានោះទេ។ ម្យ៉ាងវិញទៀត ចំពោះបច្ចេកទេសនៃការថត បំពាក់ទៅដោយកាមេរ៉ា ដែលអាចបង្ហោះខាងលើអាកាស មើលទិដ្ឋភាពនៅខាងក្រោមបាន យ៉ាងច្បាស់ទាក់ភ្នែក។
ចំពោះចរិតលក្ខណៈនៃតួសម្ដែង នៅក្នុងសាច់រឿង ត្រូវបានជ្រើសរើស តម្រូវទៅតាមកាយវិការនៃចរិតលក្ខណៈតាមធម្មជាតិ របស់តារាសម្ដែង ប្រុស-ស្រី។
លោក អ៊ិន សុភិន បានបន្តថា «ដោយឡែក សម្រាប់តារាសម្ដែងក្រមិចក្រមើម សុខ សោម៉ាវត្តី ខ្ញុំគិតថា នាងគឺជាតារាសម្ដែងម្នាក់ ដែលស័ក្តិសមបំផុត សម្រាប់កាន់តំណែង នៅក្នុងរឿង ក្រមុំចាស់ប៉ះក្មេងស្ទាវ នេះ ព្រោះនាងមានចរិតម្ញិះម្ញក់ ក្រមិចក្រមើម ពូកែសម្ដែងកាយវិការ ធ្វើឲ្យប្រុសៗ បាក់ចិត្តលើនាង រឿងនេះបានបញ្ចប់ការថតដោយរលូន ដោយគ្រាន់តែជួបបញ្ហា លំបាកបន្តិចបន្តួច យើងដឹងហើយថា ការថត ត្រូវការពេលវេលា ទាំងយប់ទាំងថ្ងៃ ក្ដៅ ឃើញថាក្រុមការងារយើង ជួបបញ្ហាលំបាក ថតទាំងថ្ងៃក្ដៅ ក៏មាន ប៉ុន្តែពួកគាត់ នៅតែមានទឹកចិត្តសប្បាយរីករាយ ថតជាមួយក្រុមការងារ។
លោកនិយាយថា «ក្រោមការខិតខំប្រឹងប្រែងអស់ពីកម្លាំងកាយ កម្លាំងចិត្ត របស់ក្រុមការងារផលិតកម្ម មហាហង្ស ខ្ញុំរំពឹងថា រឿងមួយនេះ នឹងទទួលបានការគាំទ្រខ្លាំង ពីសំណាក់ទស្សនិកជន ជាពិសេសរឿងមួយនេះ ផ្ដោតសំខាន់ចំពោះជិវិតយុវវ័យ ដូច្នេះខ្ញុំសង្ឃឹមថា មហាជន ក៏ដូចជាអ្នកគាំទ្រផលិតកម្មមហាជន កន្លងមក នឹងចូលទស្សនា ដោយរីករាយ ព្រមទាំងមានការពេញចិត្ត ពេញថ្លើម ទាំងអស់គ្នា»៕
