(ភ្នំពេញ)៖ គិតត្រឹមវេលាម៉ោងជិត៩យប់ថ្ងៃទី២៧ ខែកុម្ភៈ ឆ្នាំ២០១៨នេះ អគ្គិភ័យដ៏កំណាច​កំពុងតែបន្ដឆាបឆេះអគារ ក្នុងបរិវេណមជ្ឈមណ្ឌលកម្សាន្ដ Rock ដដែល បើទោះបីពីក្បាលព្រលប់មានសេចក្ដីរាយការណ៍ថា អគ្គិភ័យនេះបានថមថយជាច្រើន ប៉ុន្ដែរងើកភ្លើងបានបន្ដរីករាលដាលឡើងវិញនៅយប់នេះ​ ដែលធ្វើឲ្យសមត្ថកិច្ចកំពុងជួបការលំបាកក្នុងជួយសង្គ្រោះ។

ភ្នាក់ងារ Fresh News ដែលកំពុងចុះយកព័ត៌មានផ្ទាល់នៅកន្លែងកើតហេតុ បានរាយការណ៍ថា ក្នុងប្រតិបត្តិការបាញ់ពន្លត់អគ្គិភ័យនៅយប់នេះ គេឃើញមានវត្តមាន នាយឧត្តមសេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានីភ្នំពេញ និងលោក ឃួង ស្រេង អភិបាលរាជធានីភ្នំពេញ បានចុះទៅកន្លែងហេតុ​ដើម្បីបញ្ជាប្រតិបត្តិការនេះ។

​សេចក្ដីរាយការណ៍បញ្ជាក់ថា អណ្ដាតភ្លើងកំពុងតែបន្ដយ៉ាងសន្ធោសន្ធៅ​នៅខាងក្នុងអគារ ដែលធ្វើឲ្យសមត្ថកិច្ចកំពុងតែជួបការលំបាកមែនទែន ពោលគឺមិនបាញ់ដល់ទីតាំងដែលកំពុងតែឆេះនោះទេ។

សូមជម្រាបថា អគ្គិភ័យនេះ​បានឆាបឆេះយ៉ាងសន្ធោសន្ធៅ ចាប់តាំងពីវេលាម៉ោងប្រមាណជិត៤ល្ងាច ពោលគឺគិតត្រឹមម៉ោងជិត៩នេះ មានរយៈពេល៦ម៉ោងហើយ ដែលអគ្គិភ័យកំពុងតែវាយប្រហារ អគារនៅក្នុងបរិវេណមជ្ឈមណ្ឌលកម្សាន្ត Rock ស្ថិតនៅសង្កាត់ទ្លេបាសាក់ ខណ្ឌចំការមន ដែលកម្លាំងសមត្ថកិច្ច និងអាជ្ញាធរ បានបញ្ជូនរថយន្តពន្លត់អគ្គិភ័យជាច្រើនគ្រឿង មកពីគ្រប់គោលដៅ​ដើម្បី​​បាញ់ពន្លត់។

បើតាមសេច្ដីរាយការណ៍​ មូលហេតុបឋមដែលបណ្តាលឲ្យគ្រោះអគ្គិភ័យដ៏សន្ធោសន្ធៅនេះ បានកើតឡើងសង្ស័យ មកពីជាងផ្សាដែកនៅអគារនោះ ស្រាប់តែធ្លាក់កម្ទេចភ្លើងបណ្តាលឲ្យកើតឡើងតែម្តង។

សម្រាប់ទំហំ នៃការខូចខាតវិញនោះ អគារដែលរងការឆាបឆេះ បានខូចខាតស្ទើរតែស្រុង ជាពិសេសដំបូលតែម្តង តែចំពោះទ្រព្យសម្បត្តិ និងសម្ភារនោះ គេមិនទាន់ដឹងមានតម្លៃប៉ុន្មាននៅឡើយទេ។ នៅក្នុងហេតុការណ៍នេះ ក៏មានមន្រ្តីពន្លត់អគ្គិភ័យម្នាក់ បានសន្លប់ផងដែរ ក្រោយពេលទៅជួយអន្តរាគមន៍៕