(រតនគិរី)៖ លោក ថង សាវុន អភិបាលខេត្តរតនគិរី នៅថ្ងៃទី២៦ ខែកុម្ភៈ ឆ្នាំ២០១៨នេះ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់កម្លាំងប្រដាប់អាវុធ និងមន្ត្រីរាជការទូទាំងខេត្ត ដែលបានខិតខំថែរក្សាសន្តិភាព សណ្តាប់ធ្នាប់ ក្នុងឱកាសបោះឆ្នោតជ្រើសតាំង សមាជិកព្រឹទ្ធសភា នីតិកាលទី៤ ឆ្នាំ២០១៨ ធ្វើឲ្យដំណើរដោយរលូន។
លោក ថង សាវុន បានថ្លែងនូវការកោតសរសើរ និងវាយតម្លៃខ្ពស់ចំពោះគណៈបញ្ជាឯកភាពខេត្ត ក្រុង ស្រុក និងកងកម្លាំងទាំងអស់ ដែលបានចូលរួមរក្សានូវសន្តិសុខសណ្តាប់ធ្នាប់ និងសុវត្ថិភាពសង្គម ជូនប្រជាពលរដ្ឋបានយ៉ាងល្អប្រសើរ ជាពិសេសគឺការរក្សាបាននូវសន្តិសុខសណ្តាប់ធ្នាប់ នៅក្នុងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ ឆ្នាំ២០១៨ កន្លងមកនេះ។
លោក ថង សាវុន បានបន្តថា «សុំឲ្យកម្លាំងជំនាញទាំងអស់យកចិត្តទុកដាក់បន្ថែមទៀត លើបញ្ហាសន្តិសុខ សណ្តាប់ធ្នាប់ជូនប្រជាពលរដ្ឋ ព្រមទាំងភ្ញៀវជាតិ អន្តរជាតិ ដែលមកទស្សនានៅក្នុងខេត្ត និងអនុវត្តឲ្យបាននូវបទបញ្ជា សេចក្តីណែនាំនានារបស់រាជរដ្ឋាភិបាលកម្ពុជា ដូចជា ការត្រួតពិនិត្យរថយន្តផ្ទុកលើសទម្ងន់ និងខុសលក្ខណៈបច្ចេកទេស ការងារលុបបំបាត់ការត្រួតពិនិត្យប៉ុស្តិ៍អនាធិបតេយ្យជាដើម»។
ព្រមជាមួយនេះ លោកអភិបាលខេត្ត ក៏ណែនាំឲ្យផ្សព្វផ្សាយឲ្យបានទូលំទូលាយនូវគោលនយោបាយភូមិ-ឃុំ មានសុវត្ថិភាព ដើម្បីឲ្យប្រជាពលរដ្ឋមានការយល់ដឹង និងចូលរួមថែរក្សាសន្តិសុខសង្គម និងទប់ស្កាត់ឲ្យបាននូវបទល្មើសនានានៅក្នុងភូមិសាស្ត្រខេត្ត។ ដោយឡែក កងកម្លាំងអាជ្ញាធរស្រុក-ក្រុង ត្រូវសហការគ្នាឲ្យបានល្អក្នុងការងារទប់ស្កាត់បទល្មើសធនធានធម្មជាតិ និងការលួចឆ្លងដែនខុសច្បាប់៕
