(ភ្នំពេញ)​៖ Facebook Page ផ្លូវការ របស់ក្រសួងប្រៃសណីយ៍ និង​ទូរគមនាគមន៍ ដែលត្រូវ​បានគេដឹងថា ជាស្ថាប័នរបស់រដ្ឋាភិបាល ដែលគ្រប់គ្រង​ក្នុងវិស័យទូរគមនាគមន៍នៅកម្ពុជានោះ ត្រូវបានជនអនាមិក លួច (Hack) យកទៅគ្រប់គ្រង ហើយគិតត្រឹម​រសៀលថ្ងៃទី២៦ ខែកុម្ភៈ ឆ្នាំ២០១៨នេះ អ្នកបច្ចេកទេសរបស់ក្រសួង មិនទាន់អាចទាញយកត្រឡប់ មកគ្រប់គ្រងវិញបានទេ។

លោក មាស ប៉ូ អ្នកនាំពាក្យក្រសួងប្រៃសណីយ៍ និង​ទូរគមនាគមន៍កម្ពុជា បានថ្លែងប្រាប់បណ្ដាញព័ត៌មាន Fresh News នៅរសៀលថ្ងៃទី​២៦ ខែកុម្ភៈ ឆ្នាំ២០១៨នេះថា Facebook Page របស់ក្រសួងប្រៃសណីយ៍ និងទូរគមនាគមន៍ ពិតជាត្រូវបានជនអនាមិកលួច (Hack) យកពិតប្រាកដមែន តាំងតែពីថ្ងៃទី២៣ ខែកុម្ភៈមកម្ល៉េះ។ មកដល់ពេលនេះ មិនទាន់យកមកគ្រប់គ្រងវិញនៅឡើយទេ។

អ្នកនាំពាក្យដដែលរូបនេះ បានថ្លែងឲ្យដឹងទៀតថា ពេលនេះក្រុមបច្ចេកទេសរបស់ក្រសួងបាន និងកំពុងតែព្យាយាមទាញយក Facebook Page នោះមកវិញ រួមទាំងស្រាវជ្រាវរក ជនអនាមិកដែលហ៊ានលួចយក Facebook របស់ក្រសួងផងដែរ៕