(កំពង់ធំ)៖ អាជ្ញាធរខេត្តកំពង់ធំ នៅព្រឹកថ្ងៃទី២៦ ខែកុម្ភៈ ឆ្នាំ២០១៨នេះ បានរៀបចំទិវាជាតិបង្ការ និងពន្លត់អគ្គីភ័យ ដើម្បីជំរុញដល់ប្រជាពលរដ្ឋ មានការប្រុងប្រយ័ត្នកាន់តែខ្លាំងឡើង ចំពោះគ្រោះថ្នាក់សង្គមមួយនេះ គឺវាអាចបំផ្លាញលំនៅដ្ឋានដែលខិតខំរកជាយូឆ្នាំមកនេះផងដែរ។

ពិធីនេះបានធ្វើឡើងក្រោមវត្តមាន លោក សុខ លូ អភិបាលខេត្តកំពង់ធំ ព្រមទាំងមន្ត្រីរាជការ កងកម្លាំងប្រដាប់អាវុធទាំង៣ និងប្រជាពលរដ្ឋជាច្រើនផងដែរ។

យោងតាមច្បាប់ស្តីពីការបង្ការ និងពន្លត់អគ្គីភ័យ ដែលបានប្រកាសឲ្យប្រើតាមព្រះរាជក្រម ចុះថ្ងៃទី០៣ ខែមិថុនា ឆ្នាំ២០១៣ ត្រង់មាត្រា១៣ ចែងថា «ថ្ងៃទី២២ ខែកុម្ភៈ ជារៀងរាល់ឆ្នាំ ត្រូវបានកំណត់ជាថ្ងៃប្រារព្វទិវាជាតិ បង្ការ និងពន្លត់អគ្គីភ័យ»។

យោងតាមរបាយការណ៍របស់លោកឧត្តមសេនីយ៍ត្រី អ៊ុក កុសល ស្នងការនគរបាលខេត្តកំពង់ធំ បានបញ្ជាក់ថា ចំនួនគ្រោះថ្នាក់អគ្គិភ័យ និងមហន្តរាយដែលបង្កក្នុងឆ្នាំ២០១៧ នៅទូទាំងខេត្តកំពង់ធំ មានចំនួន៣៧លើក មានការថយចុះ១៦លើក ស្មើ ២៨,០៧% បើប្រៀបធៀបនឹងឆ្នាំ២០១៦ បណ្តាលឲ្យឆេះផ្ទះចំនួន២៧ខ្នង ឆេះតូប៥៤ខ្នង ឆេះម៉ូតូ ៣១គ្រឿង ឆេះប្រាក់រៀល១៤លានរៀល ឆេះប្រាក់ដុល្លា១,៦០០ដុល្លារ ព្រមទំាងសម្ភារៈផ្សេងៗជាច្រើនទៀត។

លោក សុខ លូ បានថ្លែងថា «ទិវាប្រារព្ធការបង្ការ និងពន្លត់អគ្គីភ័យនេះ ពិតជាមានសារៈសំខាន់ណាស់ ដែលបានឆ្លុះបញ្ចាំង ជូនប្រជាពលរដ្ឋយើងទូទាំងប្រទេស អំពីការខិតខំយកចិត្តទុកដាក់របស់ ប្រមុខរាជរដ្ឋាភិបាលកម្ពុជា ក៏ដូចជាបណ្តាអង្គភាព និងស្ថាប័នពាក់ព័ន្ធ កងកម្លាំងនគរបាលបង្ការ និងពន្លត់អគ្គីភ័យ ដែលបានចូលរួមការពារអាយុជីវិត ទ្រព្យសម្បត្តិ រក្សាបាននូវសន្តិសុខ សណ្តាប់ធ្នាប់សាធារណៈ រួមចំណែកកាត់បន្ថយភាពក្រីក្រ ជូនប្រជាពលរដ្ឋ» ។

លោកអភិបាលខេត្ត ក៏បានផ្តាំផ្ញើ និងអំពាវនាវដល់គ្រប់ស្ថាប័នរដ្ឋ ឯកជន មន្ត្រីរាជការ និងប្រជាពលរដ្ឋ ត្រូវមានការប្រុងប្រយ័ត្នកុំឲ្យកើតមានអគ្គីភ័យនេះ ក្នុងនោះ អាជ្ញាធដែនដីគ្រប់ជាន់ថ្នាក់ ត្រូវបង្កើនចាត់វិធានការអប់រំណែនាំ ដល់ប្រជាពលរដ្ឋ ក្នុងដែនសមត្ថកិច្ចរបស់ខ្លួន ដើម្បីឲ្យបណ្តាម្ចាស់គេហដ្ឋាន ផ្ទះសំណាក់ ភោជនីយដ្ឋាន សណ្ឋាគារជាដើម ឲ្យមានការប្រុងប្រយ័ត្ន គ្រប់ពេលចំពោះដើមចម ដែលអាចបង្កកើតមានអគ្គីភ័យ ដូចជា ភ្លើងចង្ក្រាន ភ្លើងចង្កៀង ភ្លើងទាន ធូប ភ្លើងព្រៃ បារី រំសែវជាតិផ្ទុះ ប្រេងឥន្ធនៈ ឧស្ម័នចំហេះ សារធាតុគីមី ដែលជាវត្ថុងាយឆេះជាដើម។

ជាមួយគ្នានេះ ក៏បានកោតសរសើរដល់នគរបាលពន្លត់អគ្គីភ័យ នៃស្នងការដ្ឋាននគរបាលខេត្ត ដែលបានខិតខំយកចិត្តទុកដាក់កន្លងមក ក្នុងការចូលរួមជួយប្រជាពលរដ្ឋ ដែលរងគ្រោះដោយគ្រោះអគ្គិភ័យ បានទាន់ពេលវេលា និងបានទស្សនាការបង្ហាញ ពីសកម្មភាពស្តីពីការពន្លត់អគ្គីភ័យផងដែរ៕