(ភ្នំពេញ)៖ លោក នៃ ប៉េណា ប្រធានស្តីទីព្រឹទ្ធសភា បានផ្ញើសាររំលែកទុក្ខដ៏ក្រៀមក្រំ ​ក្ដុកក្ដួល និងសោកស្ដាយរកអ្វីមកប្រៀបផ្ទឹមពុំបាន ជូនចំពោះលោកស្រី ទេព ចាន់ទី បន្ទាប់ពីលោក ឃុន ឈី ដែលត្រូវជាទីប្រឹក្សាផ្ទាល់របស់សម្ដេច បានទទួលមរណភាព ក្នុងជន្មាយុ៨៤ឆ្នាំ ដោយជរាពាធ។

នៅក្នុងសាររំលែកទុក្ខរបស់ប្រធានស្តីទីព្រឹទ្ធសភា នៅថ្ងៃទី២៦ ខែកុម្ភៈ ឆ្នាំ២០១៨​ ផ្ញើជូនលោកស្រី ទេព ចាន់ទី លោក នៃ ប៉េណា បានថ្លែងថា «ការបាត់បង់លោក ឃុន ឈី គឺជាការបាត់បង់នូវឥស្សរជនដ៏ឧត្តុង្គឧត្តមរបស់ជាតិមួយរូប ដែលបានបូជាអស់កម្លាំងកាយចិត្ត បញ្ញា និងស្មារតីប្រកបដោយស្នាដៃសំខាន់ៗ ដើម្បីបម្រើជាតិ មាតុភូមិ និងបានចូលរួមសកម្មភាពបេសកកម្មដ៏ថ្លៃថ្លា ដើម្បីបុព្វហេតុសន្តិភាព ការអភិវឌ្ឍ និងលើកកម្ពស់ កិត្យានុភាពជាតិទាំងក្នុងតំបន់ និងលើឆាកអន្តរជាតិ»។

សូមជម្រាបថា លោក ឃុន ឈី ទីប្រឹក្សាសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានទទួលមរណភាព នៅម៉ោង១២៖៥០នាទី នាថ្ងៃសៅរ៍ ១០កើត ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៤ ខែកុម្ភៈ ឆ្នាំ២១០១៨ ដោយជរាពាធ ក្នុងជន្មាយុ៨៤ឆ្នាំ។

សពរបស់លោក ឃុន ឈី កំពុងត្រូវបានក្រុមគ្រួសារធ្វើបុណ្យតាមព្រះពុទ្ធសាសនា នៅផ្ទះលេខ TJ 34 ផ្លូវសាកូរ៉ា បុរីអរគីដេ ផ្លូវ ២០០៤ សង្កាត់អូបែកក្អម ខណ្ឌសែនសុខ។

លោក ឃុន ឈី ជាអតីតអ្នកតស៊ូ តាំងពីឆ្នាំ១៩៥០មក ហើយលោកជាអតីតរដ្ឋមន្ត្រីក្រសួងគមនាគមន៍ ដឹកជញ្ជូន និងប្រៃសណីយ៍ ក្នុងសម័យសាធារណរដ្ឋប្រជាមានិតកម្ពុជាផងដែរ៕