(ភ្នំពេញ)៖ ត្រឹមមួយពព្រិចភ្នែកសោះ កូនប្រុសជាទីស្រឡាញ់ម្នាក់ បានបាត់បង់ជីវិត ដោយមិននឹកស្មានដល់ សម្រាប់ទឹកចិត្តលោកឪពុក អ្នកម្តាយ និងក្រុមគ្រួសារទាំងមូល។ ហេតុការណ៍ និងករណីដ៏រន្ធត់បែបនេះ បានកើតទៅលើក្មេងប្រុស អ៊ិន ជុំច័ន្ទបញ្ញា អាយុមិនដល់១០ឆ្នាំផង ដោយសារតែរថយន្តមួយគ្រឿង បានរេចង្កូតបុកចូលផ្សារគគីរ ស្ថិតនៅឃុំគគីរ ស្រុកកៀនស្វាយ ខេត្តកណ្តាល។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅរសៀលថ្ងៃទី២៤ ខែកុម្ភៈ ឆ្នាំ២០១៨នេះ ស្ថិតនៅចំណុចនៅមុខផ្សារគគីរ ផ្លូវជាតិលេខ១ នៅចន្លោះគីឡូតិ៍ម៉ែត្រ១៨-១៩ ស្ថិតក្នុងភូមិគគីរ ឃ៉ំគគីរ ស្រុកកៀនស្វាយ ខេត្តកណ្ដាល។
សមត្ថកិច្ចបានឲ្យដឹងថា នៅវេលាម៉ោងខាងលើ មានរថយន្តម៉ាក hyundia បើកបរក្នុងទិសដៅអ្នកលឿង ទៅភ្នំពេញ លុះមកដល់ចំណុចកើតហេតុខាងលើ ស្រាប់តែរថយន្តខាងលើ បានដាច់ហ្វ្រាំងរេចង្កូតបុករថយន្តធុនតូចមួយគ្រឿងទៀត ដែលបើកបរក្នុងទិសដៅច្រាស់ទិសពីភ្នំពេញទៅអ្នកលឿង។ ហើយរថយន្តម៉ាក hyundia មិនអស់ល្បឿន ក៏បានបុកកុមារារងគ្រោះ ដែលឈររៀបចំឆ្លងផ្លូវបណ្តាលឲ្យស្លាប់ភ្លាមៗនៅកន្លែងកើតហេតុ។
ក្រោយកើតហេតុលោក ពៅ គីមលី អភិបាលរងស្រុកកៀនស្វាយ និងសមត្ថកិច្ចជំនាញ បានចុះទៅធ្វើការវាស់វែង ហើយប្រគល់សាកសពជូនក្រុមគ្រួសារ យកទៅធ្វើបុណ្យតាមប្រពៃណី។ ដោយឡែកវត្ថុតាង និងអ្នកបើករថយន្តយកទៅអធិការនគរបាលស្រុកកៀនស្វាយ ដើម្បីបន្តនីតិវិធី៕
