(កំពង់ស្ពឺ)៖ នៅចំពោះមុននិស្សិត នៃវិទ្យាស្ថានបច្ចេកទេសគីរីរម្យ លោក ហ៊ុន ម៉ាណែត បានថ្លែងថា យុវជនជំនាន់ក្រោយ ត្រូវចូលរួមថែរក្សាសុខសន្ដិភាព និងខិតខំប្រឹងប្រែង រៀនសូត្រឲ្យអស់លទ្ធភាព ដើម្បីរួមចំណែកជាមួយរាជរដ្ឋាភិបាលកម្ពុជាអភិវឌ្ឍប្រទេសជាតិ ឲ្យកាន់តែមានភាពរីកចម្រើន ខ្លាំងឡើងជាលំដាប់ថែមទៀត។
បើតាមលោក ហ៊ុន ម៉ាណែត តែអ្វីដែលសំខាន់ គឺយុវជនត្រូវចងចាំថា កត្តាដែលសំខាន់ជាងគេ ដែលមិនអាចខ្វះបាននោះ គឺកត្តាសុខសន្តិភាព មានសុខសន្តិភាពទើបប្រទេសជាតិ មានការអភិវឌ្ឍ មានសុខសន្តិភាពទើបប្អូនៗ មានឱកាសបានធ្វើការសិក្សាក្រេបយកចំណេះដឹងនៅទីនេះ។
លើសពីនេះទៀត លោកក៏បានលើកទឹកចិត្តខ្ពស់ដល់ប្អូនៗនិស្សិតតាមរយៈការផ្ដល់អនុសាសន៍ ការផ្ដាំផ្ញើប្រកបដោយអត្ថន័យ និងខ្លឹមសារដ៏ជ្រាលជ្រៅថា មិនថានៅទីខ្ពស់ ឬទីទាប មិនថានៅក្នុង ឬក្រៅប្រទេសនោះទេ គឺប្អូនៗមានឱកាសក្នុងការទទួលបានចំណេះដឹងដូចៗគ្នា ហើយការសិក្សានៅទីនេះ ជាកំពូលភ្នំស្រស់ស្អាត គឺកាន់តែអំណោយផលតាមរយៈភាពស្ងប់ស្ងាត់ និងខ្យល់ឱកាសបរិសុទ្ធ។
នៅក្នុងឱកាសដ៏សប្បាយរីករាយ លោក ហ៊ុន ម៉ាណែត ក៏បានសម្ដែងនូវការកោតសរសើរ និងវាយតំលៃខ្ពស់ចំពោះ លោកឧកញ៉ា ហេង វុទ្ធី ដែលបានសហការជាមួយក្រុមហ៊ុនជប៉ុន សម្រាប់ធ្វើវិនិយោគទុននៅរម្យនីយដ្ឋាន Vkirirom ប្រកបដោយភាពទាក់ទាញ និងផ្ដល់ផាសុខភាពដល់ ភ្ញៀវទេសចរជាតិ និងអន្តរជាតិ ជាពិសេសតាមរយៈនៃការបង្កើតវិទ្យាស្ថានបច្ចេកវិទ្យាគីរីរម្យ ដែលបានផ្ដល់ឱកាសដល់និស្សិតប្រមាណ១១៨នាក់ បានធ្វើការសិក្សាស្រាវជ្រាវលើមុខជំនាញ បច្ចេកវិទ្យាព័ត៌មានវិទ្យា។
ជាចុងក្រោយ លោក ហ៊ុន ម៉ាណែត ក៏បានផ្ដល់ឱកាសឲ្យប្អូនៗនិស្សិត និងសាស្ត្រាចារ្យ រួមទាំងក្រុមប្រឹក្សា បុគ្គលិកក្រុមហ៊ុន Vkirirom បានថតរូបអនុស្សាវរីយ៍ ប្រកបដោយភាពរាក់ទាក់ កក់ក្ដៅ និងរីករាយស្និទ្ធស្នាលបំផុត៕
`
