(ត្បូងឃ្មុំ)៖ អភិបាលខេត្តត្បូងឃ្មុំ លោក លី ឡេង បានអញ្ជើញចូលរួមជាអធិបតី ក្នុងពិធីសម្ពោធឆ្លងសមិទ្ធិផលនានា ក្នុងវត្តអម្ពវនារាម (ស្វាយមីង) ស្ថិតនៅភូមិស្វាយមីង ឃុំអំពិលតាពក ស្រុកអូររាំងឪ ខេត្តត្បូងឃ្មុំ ដែលជាអំណោយរបស់ថ្នាក់ដឹកនាំ និងសប្បុរសជននានា ដើម្បីរួមចំណែកដល់ការអភិវឌ្ឍ វិស័យព្រះពុទ្ធសាសនា។
លោក លី ឡេង បានលើកឡើងថា ប្រទេសកម្ពុជាបច្ចុប្បន្ន ទទួលបាននូវសុខសន្តិភាពពេញលេញ និងការអភិវឌ្ឍលើគ្រប់វិស័យ តាមរយៈនេះទើបផ្តល់ឱកាសដល់ប្រជាពុទ្ធបរិស័ទ បានបំពេញបុណ្យកុសល (ទាន សីល ភាវនា) និងប្រកបមុខរបរអាជីវកម្មដទៃទៀតគ្រប់បែបយ៉ាង ប្រកបដោយ សុវត្ថិភាពល្អ ពិសេសការរៀបចំពិធីបុណ្យនេះ បានប្រព្រឹត្តទៅក្នុងបរិយាកាសល្អទាំងបរិមាណ និងគុណភាព។
លោកបានបន្តថា ផលវិជ្ជមានទាំងអស់នេះ ពុំមែនកើតឡើងដោយចៃដន្យនោះទេ គឺជាការខិតខំប្រឹងប្រែងយកអស់កម្លាំងកាយចិត្ត និងបញ្ញាស្មារតី រួមទាំងការធ្វើពលីកម្មគ្រប់បែបយ៉ាង របស់ឥស្សរជនជាន់ខ្ពស់ នៃគណបក្សប្រជាជនកម្ពុជា ហើយលោកបានធ្វើការសំណូមពរដល់ប្រជាពលរដ្ឋបន្ត ចូលរួមថែរក្សាការពារសុខសន្តិភាពនេះ ឲ្យបានគង់វង្ស ដោយការបោះឆ្នោតជូនគ ណបក្សប្រជាជនកម្ពុជា ព្រោះមានតែគណបក្សនេះមួយគត់ ទើបមានសមត្ថភាពគ្រប់គ្រាន់ ក្នុងការដឹកនាំប្រទេសជាតិ។
ជាចុងក្រោយ លោកអភិបាលខេត្ត បានថ្លែងអំណរគុណដល់ ព្រះសង្ឃ អាចារ្យ គណៈកម្មការ និងសប្បុរសជន ដែលបានឧបត្ថម្ភដល់ដំណើរការ សាងសង់សមិទ្ធិផលព្រះពុទ្ធសាសនា ដែលជាថ្នាលបណ្តុះបណ្តាលអភិវឌ្ឍន៍ធនធានមនុស្ស និងការអប់រំមនុស្ស ឲ្យក្លាយជាពុទ្ធសាសនិកជនល្អ កូនល្អ សិស្សល្អ និងប្រជាពលរដ្ឋល្អរស់នៅក្នុងសង្គមជាតិ៕
