(ភ្នំពេញ)៖ អគ្គិភ័យដែលឆាបឆេះសណ្ឋាគារ ខារ៉ា នៅចំណុចផ្ទះលេខ​១៨ ផ្លូវលេខ៤៧ កែង៨៨ ក្រុម៧៣ ភូមិ១៣ សង្កាត់ស្រះចក ខណ្ឌដូនពេញ បានរលត់ទៅវិញហើយ នៅវេលាម៉ោងជាង១១ព្រឹក ថ្ងៃទី២៤ ខែកុម្ភៈ ឆ្នាំ២០១៨នេះ ក្រោយមានការជួយអន្ដរាគមន៍ពីកម្លាំងសមត្ថកិច្ច និងអាជ្ញាធរមូលដ្ឋាន។

សេចក្ដីរាយការណ៍ពីភ្នាក់ងារ Fresh News ប្រចាំខណ្ឌដូនពេញ បានឲ្យដឹងថា មូលហេតុដែលបណ្ដាលឲ្យឆាបឆេះ គឺផ្ដើមចេញពីការឆេះសម្ភារក្នុងផ្ទះបាយ ទើបបន្ដរីករាលដាល។

បើតាមសេចក្ដីរាយការណ៍​ ក្រោយកើតហេតុភ្លាមៗ​ លោក សុខ ពេញវុធ អភិបាល​ខណ្ឌដូនពេញ និងជាប្រធានគណៈបញ្ជាការឯកភាពខណ្ឌ បានចុះដល់កន្លែងកើតហេតុ និងបានដឹកនាំ​កម្លាំងគណៈបញ្ជាការឯកភាពខណ្ឌដោយផ្ទាល់ សហការជាមួយក្រុមអន្តរាគមន៍ឡានពន្លត់អគ្គភ័យ នៃស្នងការដ្ឋាននគរបាលរាជធានីភ្នំពេញ ជួយពន្លត់បានភ្លាមៗទាន់ពេលវេលា ដោយបាញ់ទឹកឲ្យរលត់ទៅវិញ ដោយប្រើប្រាស់រថយន្តពន្លត់អគ្គិភ័យចំនួន០៣​គ្រឿង។

សម្រាប់គ្រោះថ្នាក់សង្គមមួយនេះ មិនបណ្ដាលឲ្យមនុស្សស្លាប់ ឬរងរបួសនោះទេ ដោយគ្រាន់តែ​ខូចខាតទ្រព្យសម្បត្តិក្នុងសណ្ឋាគារ មួយចំនួន៕