(ព្រះសីហនុ)៖ ចោរឆក់មួយក្រុម ត្រូវកម្លាំងនគរបាលខេត្តព្រះសីហនុ ចាប់បានជាបន្ដបន្ទាប់សរុប៦នាក់ បន្ទាប់ពីពួកគេបានធ្វើសកម្មភាពឆកទូរស័ព្ទ ពីជនជាតិចិនម្នាក់ ដែលកំពុងធ្វើដំណើរតាមដងផ្លូវ នៅថ្ងៃទី២៣ ខែកុម្ភៈ ឆ្នាំ២០១៨ នៅតាមដងផ្លូវលេខ៥០២ ក្រុមទី១៤ ភូមិ៤ សង្កាត់៤ ក្រុងព្រះសីហនុ។
ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានឲ្យដឹងនៅព្រឹកថ្ងៃទី២៤ ខែកុម្ភៈ ឆ្នាំ២០១៨នេះថា ដំបូងឡើយមានជនសង្ស័យ០២នាក់ ជិះម៉ូតូ០១គ្រឿង មិនស្គាល់ម៉ាក បានធ្វើសកម្មភាពឆក់ទូរស័ព្ទដៃម៉ាកIphone X ខណៈជនរងគ្រោះកំពុងដើរ និងនិយាយទូរស័ព្ទហើយគេចខ្លួនបាត់។ ភ្លាមៗនោះ កម្លាំងអន្តរាគមន៍ នៃស្នងការដ្ឋាននគរបាលខេត្តព្រះសីហនុ បានធ្វើការដេញពីក្រោយស្ទាក់ពីមុខ ជនសង្ស័យភ័យបានទុកម៉ូតូចោលរត់ចូលព្រៃ។
ខណៈនោះមានជនសង្ស័យ២នាក់ បានជិះម៉ូតូ១គ្រឿង ម៉ាក Honda Dream C125 ស៊េរីឆ្នាំ២០១៣ មកបម្រុងរំដោះបក្ខពួក តែសមត្ថកិច្ចជំនាញក៏ធ្វើការស្ទាក់ចាប់ពួកគេទាំង២នាក់នោះ តែជនសង្ស័យបានជិះម៉ូតូរត់ និងបានដកកាំភ្លើងខ្លីពីចង្កេះ ភ្ជង់មកលើកម្លាំងសមត្ថកិច្ចគំរាមកុំឲ្យតាមចាប់ តែកម្លាំងសមត្ថកិច្ចនៅតែតាម ជនសង្ស័យក៏បោះកាំភ្លើងខ្លីនោះចោលនៅតាមដងផ្លូវ សមត្ថកិច្ចបានដេញរហូតដល់មុខផ្សារលើ ទើបអាចស្ទាក់ចាប់ពួកគេទាំង ២នាក់នេះបាន បន្ទាប់មកបានចាប់ឃាត់ខ្លួនជនសង្ស័យទាំង២នាក់ ដែលរត់ចូលព្រៃ និងឃាត់ខ្លួនបក្ខពួក២នាក់ទៀត ដែលជាអ្នកសមគំនិតបិទគូថ សរុបចំនួន៦នាក់ ។
ចំណែកជនរងគ្រោះត្រូវបានលោកឧត្តមសេនីយ៍ស្នងការ ឲ្យដឹងថា ឈ្មោះ GUO PING ភេទស្រី អាយុ៣០ឆ្នាំ មុខរបរទេសចរណ៍ លិខិតឆ្លងដែនលេខE២១១០៨៦២៩។ សម្ភារៈបាត់បង់ ទូរស័ព្ទដៃ ០១គ្រឿង ម៉ាកIphone X ពណ៌ខ្មៅ។ ដោយឡែកជនសង្ស័យ ទី១៖ឈ្មោះ កែម ច័ន្ទសង្ហា, ទី២៖ឈ្មោះ ជា ច័ន្ទដេវីត, ទី៣៖ឈ្មោះ ណារិទ្ធ រតនៈ, ទី៤៖ឈ្មោះ សែម ច័ន្ទកក្កដា, ទី៥៖ឈ្មោះ តេង តូណា និងទី៦៖ឈ្មោះ សុខ ជីមី។ ក្រោយឃាត់ខ្លួនកម្លាំងជំនាញដកហូតបាន ទូរស័ព្ទដៃអិនចុចពិល០១គ្រឿង, ម៉ូតូ២គ្រឿង ម៉ាកស្កុបពី ពណ៌សលាយផ្កាឈូក ស្លាកលេខភ្នំពេញ1CE-0624 (មធ្យោបាយធ្វើសកម្មភាព) និងម៉ាក Honda Dream C125 ស៊េរីឆ្នាំ២០១៣ ពណ៌ខ្មៅ ស្លាកលេខភ្នំពេញ1BE-1584 (មធ្យោបាយធ្វើសកម្មភាព), ប្រអប់អាវុធខ្លី ប្រើហ្គាស០១, ហ្គាស០១កំប៉ុង, គ្រាប់កាំភ្លើងជ័រមូល០២ថង់, គ្រាប់កាំភ្លើងដែកមូល០២ប្រអប់។
ចំពោះអាវុធខ្លីប្រើហ្គាស ដែលជនសង្ស័យបានទម្លាក់ចោលពេលសមត្ថកិច្ចដេញចាប់ មិនទាន់រកឃើញនៅឡើយទេ សមត្ថកិច្ចកំពុងបន្តស្វែងរក។ ជនសង្ស័យទាំងទាំង៦នាក់ បានសាភាពបន្ថែមថា ពួកវាបានធ្វើសកម្មភាពលួចមានស្ថានទម្ងន់ទោស (ឆក់) ចំនួន៧លើក នៅរាជធានីភ្នំពេញ។
ជាមួយគ្នានេះ លោកឧត្តមសេនីយ៍ស្នងការ ក៏បានឲ្យដឹងពីប្រតិបត្តិការបង្ក្រាបគ្រឿងញៀនផងដែរ នៅវេលាម៉ោង០៨៖៤០នាទីយប់ ថ្ងៃទី២៣ ខែកុម្ភៈ ឆ្នាំ២០១៨ ដោយកម្លាំងជំនាញរបស់ការិយាលយ័ប្រឆាំងគ្រឿងញៀន បានសហការជាមួយកម្លាំងប៉ុស្ដិ៍នគរបាលសង្កាត់លេខ៤ ចុះបង្រ្កាបករណីគ្រឿងញៀន ត្រង់ចំណុចក្រុមទី១៧ ភូមិ៣ សង្កាត់៤ ឃាត់បានជនសង្ស័យម្នាក់ ឈ្មោះ ឈឹម ភារម្យ (ហៅអាក្របី) អាយុ34ឆ្នាំ ដកហូតបាន ម្សៅក្រាមពណ៌សចំនួន១៩កញ្ចប់តូច និងសម្ភារៈមួយចំនួន៕
