(ភ្នំពេញ​)៖​ Viber ដែលជាកម្មវិធីផ្ញើសារឈានមុខគេ​មួយ លំដាប់ពិភពលោកបង្កើតឡើង ដោយក្រុមហ៊ុន «Rakuten Viber» ចាប់ផ្តើមយុទ្ធនាការ «យើងស្រឡាញ់កម្ពុជា» ជាផ្លូវការនៅក្នុងប្រទេសកម្ពុជា នៅថ្ងៃ​ទី ២៣ ខែកុម្ភៈឆ្នាំ ២០១៨នេះ ។ គោលបំណងនៃយុទ្ធនាការនេះ គឺដើម្បីបង្កើនមូលដ្ឋានអ្នកប្រើប្រាស់ ដ៏រឹងមាំឲ្យបានចំនួន ២ លាននាក់នៅកម្ពុជា ដែលជាផ្នែកមួយនៃការពង្រីកខ្លួន ទៅក្នុងតំបន់អាស៊ីអាគ្នេយ៍។

ជាផ្នែកមួយនៃយុទ្ធនាការ «យើងស្រឡាញ់កម្ពុជា» អ្នកប្រើរបស់ Viber នៅកម្ពុជាឥឡូវនេះ អាចទាញយកកញ្ចប់ sticker ថ្មីៗរបស់ Viber ដែលមានលក្ខណៈពិសេស សម្រាប់កម្ពុជាដោយឥតគិតថ្លៃ។ ចំពោះរូបស្ទីកឃរ័ដ៏ពេញនិយម ដែលមានសរសេរជាខេមរភាសា ដូចជា «ហេឡូ​, ​តោះទៅ» និង «តោះញ៉ាំ» ។ រូបស្ទីកឃ័រទាំងនោះ គឺត្រូវបានបង្កើតឡើងដោយវិចិត្រករ ក្នុងស្រុក និងអាចរកបានចាប់ពីពេលនេះតទៅ​។ ​លោកអ្នកអាចធ្វើការទាញយកបាន ដោយគ្រាន់តែចូល​ទៅកាន់គេហទំពរ័ http://bit.ly/welovecambodia ។

លោក Anubhav Nayyar ប្រធានផ្នែកអភិវឌ្ឍន៍ធុរកិច្ច ប្រចាំតំបន់អាស៊ីអាគ្នេយ៍ និង អាស៊ីខាងត្បួង បានថ្លែងថា «Viber បានសំឡឹងឃើញកំណើនចំនួន អ្នកប្រើប្រាស់នៅក្នុងប្រទេសកម្ពុជា កាលពីឆ្នាំមុន។ ទិសដៅរបស់យើង គឺធ្វើឲ្យ Viber កាន់តែមានទំនាក់ទំនង ជាមួយ​ប្រជាជនកម្ពុជា ដើម្បីទំនាក់ទំនងជាមួយ មនុស្សជាទីស្រឡាញ់របស់ពួកគេ។ យើងបានទទួលជោគជ័យរួចមកហើយ នៅទីផ្សារអាស៊ីអាគ្នេយ៍សំខាន់ៗ មួយចំនួនមានដូចជា​ ប្រទេសហ្វីលីពីន ប្រទេស​វៀតណាម និងប្រទេសមីយ៉ាន់ម៉ា»។

លោក Nayyar បាន​បន្ថែមទៀតថា​ «​យើងសង្ឃឹមថា នឹងធ្វើការសហការចាប់ដៃគូ ជាមួយនឹងអ្នកមានឥទ្ធិពលក្នុងស្រុក និងបង្កើតមាតិកាជាភាសាខ្មែរជាច្រើន ដូចជារូបស្ទីកឃ័រ Chatbots និងការបង្កើតសេវាកម្មផ្សេងៗជាច្រើនទៀត ដែលទាក់ទងនឹងប្រជាជនកម្ពុជា»។

សូមបញ្ជាក់ថា យោងតាមរបាយការណ៍ របស់ក្រសួងប្រៃសណីយ៍ និងទូរគមនាគមន៍កម្ពុជា នៅឆ្នាំ ២០១៧ ប្រទេសកម្ពុជាមានអ្នកប្រើប្រាស់ អ៊ិនធឺណិតចំនួន ៨,៦ លាននាក់ ដោយក្នុងនោះ មានប្រមាណជា៥៤​ភាគរយ ឬស្មើ៧​លាននាក់ ប្រើប្រព័ន្ធផ្សព្វផ្សាយសង្គម ដែលមាន​៨១​ភាគរយ ប្រើតាមទូរស័ព្ទចល័ត៕