(ភ្នំពេញ)៖ ផ្សារទំនើប AEON Mall,ផ្សារទំនើប Makro, ក្រុមហ៊ុន Park Café, ក្រុមហ៊ុន គង់ នួន គ្រុប, ក្រុមហ៊ុន ONLINE និងក្រុមហ៊ុន GFG Investment ក្រុមហ៊ុនទាំងនេះនឹងចូលរួមប្រកាសជ្រើសរើស បុគ្គលិកនៅក្នុងវេទិកាការងារ ដោយមានតម្រូវការបុគ្គលិកសរុបប្រមាណ៩០០នាក់។

នៅក្នុងវេទិកាការងារនាថ្ងៃព្រហស្បតិ៍ ទី២២ ខែកុម្ភៈ ឆ្នាំ២០១៨ខាងមុខនេះ ចាប់ពី​ម៉ោង៨៖០០ ដល់ម៉ោង៥៖៣០នាទីល្ងាច។ ដំណើរការជ្រើសរើសបុគ្គលិក​នេះ ដោយមានការសម្របសម្រួល​ដោយ ទីភ្នាក់ងារជាតិមុខរបរ និងការងារ (NEA) នៃក្រសួង​ការងារ និងបណ្តុះបណ្តាលវិជ្ជាជីវៈ។

លោកប៉ុល សុវណ្ណរស្មី ប្រធានគ្រប់គ្រងធនធានមនុស្សផ្សារ AEON MALL បានឲ្យដឹង លោកឲ្យដឹងទៀតថាវេទិកាសម្ភាសការងារស្អែកនេះ ខុសពីមុនបន្តិចដោយក្រុមហ៊ុនធ្វើការសម្ភាសតែម្តងទេ មានន័យថាជាប់ឬធ្លាក់គឺបេក្ខជននឹងបានដឹងក្រោយពេលសម្ភាសចប់តែម្តង។

លោករស្មីក៏បានឲ្យដឹងពីចំនួ​ន​បុគ្គលិកដែលកំពុងបម្រើការងារនៅក្រុមហ៊ុនរបស់លោក យ៉ាងដូច្នេះថា បច្ចុប្បន្ន ក្រុមហ៊ុនមានបុគ្គលិក កំពុងបម្រើការងារជិត៨០០នាក់ ក្នុងចំណោមនោះក៏មានបុគ្គលិកមួយចំនួនទទួលបានតាមរយៈការជ្រើសចេញពីការសម្ភាសនៅNEA”។ លោករស្មីបានជំរុញដល់ សិស្ស/និស្សិត ដែលចង់ទទួលបានការងារនៅ EON ត្រូវរៀបចំប្រវត្តិរូបសង្ខេបឲ្យបានស្អាត,រៀបចំខ្លួនឲ្យបានល្អ, ដឹងនូវមុខដំណែងអ្វីដែលខ្លួនជ្រើសរើស និងត្រូវគោរពពេលវេលាជាដើម។

សម្រាប់ព័ត៌មានបន្ថែម សូមទាក់ទងមជ្ឈមណ្ឌលការងាររាជធានីភ្នំពេញតាមរយៈលេខទូរស័ព្ទ៖ ០១៦ ៧៨៦៦៥៥ ឬគេហទំព័រ​របស់​ទីភ្នាក់ងារជាតិ​មុខរបរ​ និងការងារ www.nea.gov.kh និងទំព័រ facebook neakhmer (អិនអ៊ីអេខ្មែរ) ដោយ​ងាយ​ស្រួល៕