(ភ្នំពេញ)៖ យោងតាមរបាយការណ៍​ផ្លូវការ ដែលបណ្ដាញព័ត៌មាន Fresh News ទទួលបានពីស្ថានទូតថៃ បានឲ្យដឹងថា នៅឆ្នាំ២០១៧ទំហំពាណិជ្ជ កម្មរវាងកម្ពុជា-ថៃ បានកើនដល់​ជាង​៦ពាន់លានដុល្លារ។

របាយការណ៍បានបញ្ជាក់ថា នៅឆ្នាំ២០១៧​ ទំហំពាណិជ្ជកម្ម​រវាងប្រទេសជាប់ព្រំដែនគ្នាទាំង២នេះ មានរហូតដល់​៦,១៦៤.៨៧លានដុល្លារ កើនឡើង១០​ភាគរយ បើធៀបឆ្នាំ២០១៦ ដែលមានចំនួន៥,៦០៩.៤៨លានដុល្លារ។

របាយការណ៍​ដដែលបានឲ្យដឹងថា ទំហំនៃការនាំចូលទំនិញរបស់កម្ពុជា ទៅកាន់ប្រទេសថៃ តិចជាងថៃនាំចូលមកកម្ពុជា រហូតដល់ជិត៦ដង។ ដោយកម្ពុជា​ នាំចេញទៅប្រទេសថៃ មានចំនួន៨៩៤.៨៨លានដុល្លារ ធ្លាក់ចុះ៥ភាគរយ បើធៀបនឹងឆ្នាំ២០១៦ ដែលមានចំនួន ៩៣៧.៦៣​លានុដល្លារ។ ចំណែកឯថៃនាំចូលមកកម្ពុជា មានចំនួន៥,២៦៩.៩៨លានដុល្លារ កើនឡើងជិត១៣ភាគរយ បើធៀបនឹងឆ្នាំ​២០១៦ ដែលត្រឹមតែ៤,៦៧១.៨៥លានដុល្លារ។

សូមបញ្ជាក់ថា កម្ពុជា និងថៃ គឺជាប្រទេសភូមិផងរបងតែមួយ មានទំនាក់ទំនងពាណិជ្ជកម្មខ្លាំងក្លា ដូចប្រទេសវៀតណាមផងដែរ។ ផលិតផល ដែលកម្ពុជា នាំចេញទៅថៃ ភាគច្រើនជាកសិផល រួមមានដូចជា ពោត ដំឡូងមី សណ្តែក ជាដើម ខណៈប្រទេសថៃនាំចូលមក កម្ពុជាវិញ មានដូចជា គ្រឿងចក្រ ឧបករណ៍អេឡិចត្រូនិច ប្រេងឥន្ធនៈ សំភារៈសំណង់ គ្រឿងឧបភោគបរិភោគ គ្រឿងសម្អាង សម្រាប់ភារៈប្រើប្រាស់ក្នុងផ្ទះជាដើម៕