(ភ្នំពេញ)៖ ថ្លែងក្នុងឱកាសផ្តល់បទសម្ភាសន៍ជាមួយអ្នកយកព័ត៌មាន Fresh News នៅថ្ងៃទី២១ ខែកុម្ភៈ ឆ្នាំ២០១៨នេះ លោកបណ្ឌិត ឈឹម សុធារ៉ា អ្នកឯកទេសជំងឺផ្លូវចិត្ត ទទូចឲ្យអ្នកជំងឺផ្លូវចិត្តកុំខ្មាសអៀន ត្រូវមកទទួលសេវាព្យាបាលនៅតាមមន្ទីរពេទ្យជំនាញផ្នែករោគផ្លូវចិត្ត, ខណៈបច្ចុប្បន្ននេះ មានអ្នកជំងឺសម្រេចធ្វើអត្តឃាតកើនឡើងជារៀងរាល់ឆ្នាំ។
លោកវេជ្ជបណ្ឌិត ឈឹម សុធារ៉ា បានថ្លែងថា អ្នកដែលមានជំងឺបាក់ទឹកចិត្តតែងតែសោកសៅ អស់សង្ឃឹម ឯកោ និងបាត់បង់ចំណាប់អារម្មណ៍ទៅលើអ្វីដែលពួកគេធ្លាប់ចូលចិត្ត។ អារម្មណ៍ទាំងអស់នេះអាចរំខានដល់សមត្ថភាពរបស់ពួកគេ ក្នុងការមានដំណើរការត្រឹមត្រូវ និងមានផលប៉ះពាល់យ៉ាងខ្លាំង ទៅលើគុណភាពនៃជីវិត។ ភាគច្រើនមនុស្សសុទ្ធតែដឹងពីរោគសញ្ញាផ្នែកផ្លូវចិត្ត នៃជំងឺបាក់ទឹកចិត្ត ប៉ុន្តែរោគសញ្ញាលើរាងកាយទាក់ទងនឹងជំងឺបាក់ទឹកចិត្ត តែងតែត្រូវបានមើលរំលង ដោយសារតែរោគសញ្ញាទាំងនោះហាក់ដូចជា មិនមានការទាក់ទងជាមួយជំងឺនេះទេ។
បើតាមលោកបណ្ឌិត ឈឹម សុធារ៉ា ពាក្យថាអត្តឃាតវាអាចជាផ្នែកមួយនៃជំងឺផ្លូវចិត្ត ហើយមួយភាគធំ នៃអ្នកធ្វើអត្តឃាតភាគច្រើន គឺអ្នកមានជំងឺធ្លាក់ទឹកចិត្ត ហើយផ្នែកខ្លះទៀតវាអាចមកពីជំងឺចិត្តវិកល (សតិមិនគ្រប់) ដោយធ្វើអត្តឃាតតាមរយៈសំឡេង គឺគាត់ឮសំឡេង ដែលគ្មានអ្នកណាឮ ហើយមួយផ្នែកទៀតអាចមកពីស្រ្តេស មានន័យថា មានសំពាធស្រួចស្រាវកើតឡើងភ្លាម ឬក៏មានការបាត់បង់ អ្វីមួយភ្លាមៗ ករណីនឹងវាអាចធ្វើឲ្យបុគ្គលបាត់បង់សេចក្តីសង្ឃឹមភ្លាម ហើយឈានទៅដល់ការសម្លាប់ខ្លួន។
លោកបណ្ឌិត ឈឹម សុធារ៉ា បានលើកឡើងថា «យើងគួរមើលសញ្ញាមួយចំនួនទៀត ព្រោះអ្នកជំងឺធ្លាក់ទឹកចិត្តតែងតែទុកសញ្ញាសំគាល់អ្វីមួយ ឧទាហរណ៍ គឺគាត់អាចឲ្យរបស់ដែលគាត់ស្រឡាញ់ ទៅនណាមួយ មានន័យថា គាត់លែងត្រូវការរបស់នឹងហើយនេះជាសញ្ញាមួយ ហើយជួនកាលនៅសុខៗគាត់លា ហើយផ្តាំផ្ញើឲ្យជួយមើលកូនមើលចៅ ឬជួយមើលរបស់នេះ របស់នោះ ឫក៏ពេលបាត់ខ្ញុំទៅអ្នកឯង យករបស់នឹងទៅ ឫក៏អ្នកខ្លះគាត់និយាយថា លាតែមួយម៉ាត់ ហើយអ្នកខ្លះទៀត គាត់សរសេរជាក្រដាសផ្លាំផ្ញើសញ្ញាទាំងអស់នេះហើយដែលយើង គិតគាត់សម្គាល់ថា អ្នកនឹងអាចនឹងសម្លាប់ខ្លួន»។
រោគសញ្ញានៃជំងឺបាក់ទឹកចិត្ត៖
* អារម្មណ៍ក្រៀមក្រមខុសប្រក្រតី
* បាត់បង់សកម្មភាពរីករាយដែលធ្លាប់តែរីករាយ
* អស់កម្លាំង
* ការមានអារម្មណ៍រសាប់រសល់
* គ្មានអារម្មណ៍ក្នុងខ្លួន ឬស្ពឹក
* មិនចាប់អារម្មណ៍នឹងអ្វីទាំងអស់ដោយសារតែគ្មានអ្វីគួរឲ្យអស់សំណើច
* យំ តែមិនដឹងថា យំដោយសារមូលហេតុអ្វី
* ឈឺក្បាល ឬឈឺពោះ
* មិនញ៉ាំអាហារ ស្រកទំងន់
* ញ៉ាំអាហារច្រើនខុសពីធម្មតា
* គេងមិនលក់ ឬក្រកពីដំណេកលឿន
* មិនចង់ធ្វើអ្វីក្រៅពីការគេង
* មួរម៉ៅក្ដៅក្រហាយ
* ចាប់ផ្ដើមប្រើថ្នាំ ថែមទាំងគ្រឿងស្រវឹង ឬថ្នាំជក់
* គិតតែពីរឿងស្លាប់ ឬធ្វើអត្តឃាត៕
