(កៀវ)៖ ប្រធានាធិបតី​អ៊ុយក្រែន លោក ផេត្រូ ផរ៉ូហ្សេកូ (Petro Poroshenko) ទីបំផុតបាន​ចុះហត្ថលេខាលើ សេចក្តីព្រាងច្បាប់​ដ៏ចម្រូងចម្រាសមួយ ស្តីពីការ​រួម​បញ្ចូលនូវ​តំបន់ជម្លោះ​ដុនបាស់ (Donbas) ដែលស្ថិតនៅ​ភាគខាងកើត​ប្រទេស ឲ្យមកស្ថិតក្រោម​អធិបតេយ្យភាព ​របស់​រដ្ឋាភិបាល​​ទីក្រុងកៀវវិញ។ នេះបើតាម​ការចេញផ្សាយ​ដោយ ទីភ្នាក់ងារព័ត៌មាន​ចិន ស៊ីនហួរ នៅព្រឹក​ថ្ងៃពុធ ទី២១ ខែកុម្ភៈ ឆ្នាំ២០១៨។

ក្រោយពីការ​ចុះហត្ថលេខា លោក Poroshenko បានបង្ហោះសារ​ពន្យល់បកស្រាយ​ថា ច្បាប់ថ្មីនេះ ពុំរំលោភលើ​កាតព្វកិច្ចអន្តរជាតិ​​របស់អ៊ុយក្រែនឡើយ មានដូចជាកិច្ច​ព្រមព្រៀង​ទីក្រុង Minsk ជាដើម។ ការចុះ​ហត្ថលេខា​នេះ ត្រូវបានធ្វើឡើង បន្ទាប់ពី​នាខែមករា​​កន្លងទៅ សភាអ៊ុយក្រែនបានអនុម័ត​ច្បាប់ខាងលើ​ ស្តីពីការធ្វើសមាហរណកម្ម​តំបន់ Donbas មកវិញ ដែលច្បាប់​នេះ បានកំណត់​តំបន់​ទាំងប៉ុន្មាន ដែលគ្រប់គ្រង​ដោយក្រុមឧទ្ទាម​ចង់បានឯករាជ្យ ថាជាទឹកដី​ស្ថិតក្រោម​ការកាប់កាន់​ជាបណ្តោះ​អាសន្ន​​របស់​ភាគី​​ដទៃ​។

កាលនោះ​ក្រសួង​ការ​បរទេសរុស្ស៊ី បានមើលឃើញច្បាប់​​នេះថា ជា​ការត្រៀម​រៀបចំ​សម្រាប់ធ្វើ​សង្រ្គាម​ថ្មីមួយ ហើយបានចោទ​​​ទីក្រុងកៀវ ថាបានបំពាន​លើកិច្ចព្រមព្រៀង​​ទីក្រុង Minsk ដែលបង្កើតឡើង​ដើម្បីបញ្ចប់បញ្ហាវិវាទ​នៅ Donbas ដោយ​សន្តិវិធី។

គួរជម្រាបថា ជម្លោះ​ក្នុងតំបន់ Donbas ភាគខាងកើត​អ៊ុយក្រែន បានចាប់ផ្តើម​កាលពី​ខែមេសា ឆ្នាំ២០១៤ ក្រោយពីកងទ័ព​រដ្ឋា​ភិ​បាល​ បានបើក​ប្រតិបត្តិការ​យោធា ដើម្បីដណ្តើមយកទីក្រុង និងក្រុងនានា ដែលគ្រប់គ្រង​ដោយ​ក្រុមប្រដាប់អាវុធ ដែលបាន​ប្រកាស​​ទាមទារឯករាជ្យ​ពីទីក្រុង​កៀវ ហើយត្រូវ​បានគេដឹងថា ក្រុមឧទ្ទាមទាំងនោះ ទទួលការគាំទ្រពីរុស្ស៊ី៕