(សៀមរាប)៖ លោក ថោង ខុន រដ្ឋមន្ត្រីក្រសួងទេសចរណ៍ និងលោក ឃឹម ប៊ុនសុង អភិបាលខេត្តសៀមរាប រួមនឹងវត្តមានចូលរួមពីលោក លោកស្រី ប្រតិបត្តិករទេសចរណ៍ អាជ្ញាធរជាតិអប្សរា មន្ទីរ អង្គភាព ស្ថាប័ន អាជ្ញាធរ និងដៃគូរពាក់ព័ន្ធ បានអញ្ជើញចូលរួមក្នុង “កិច្ចប្រជុំបូកសរុបការងារទេសចរណ៍ឆ្នាំ២០១៧ និងទិសដៅអនុវត្តការងារបន្តឆ្នាំ២០១៨របស់មន្ទីរទេសចរណ៍ខេត្តសៀមរាប” ដែលមានអ្នកចូលរួមសរុបប្រមាណជា ៤០០នាក់ នាសាលប្រជុំរដ្ឋបាលខេត្តសៀមរាប នៅរសៀលថ្ងៃអង្គារ៍ ៦កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២០ ខែកុម្ភៈ ឆ្នាំ២០១៨។
លោក ឃឹម ប៊ុនសុង បានថ្លែងបើកកិច្ចប្រជុំនេះថា ព្រមជាមួយគ្នានិងសមិទ្ធិផលជាច្រើន ដែលរដ្ឋបាលខេត្តសម្រេចបានក្នុងឆ្នាំ២០១៧ ស្របតាមកម្មវិធីគោលនយោបាយ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលកម្ពុជា។ រដ្ឋបាលខេត្តសៀមរាប ក៏បានជួបការងារប្រឈម និងបញ្ហាដែលនៅសេសសល់មួយចំនួនដែលយើងត្រូវត្រួតពិនិត្យ និងវាយតម្លៃឲ្យបានស៊ីជម្រៅរាល់សកម្មភាពការងារដែលយើងបានអនុវត្តការងារកន្លងមក និងកំពុងអនុវត្តដើម្បីមានមូលដ្ឋានដ៏ ត្រឹមត្រូវ រៀបចំយុទ្ធសាស្ត្រ វិធានការថ្មីសម្រាប់អនុវត្តបន្តឲ្យទទួលបានលទ្ធផលល្អ និងមានប្រសិទ្ធភាព។
លោកបន្តថា ពាក់ព័ន្ធទៅនឹងសោភ័ណភាពក្រុងទោះបីជាទិដ្ឋភាពជាក់ស្តែង យើងពិនិត្យឃើញថានៅមានសភាពមិន ទាន់បានល្អប្រសើរ ដូចដែលយើងចង់បានបានសម្រាប់ទទួលភ្ញៀវទេសចរជាតិ និងអន្តរជាតិ ក៏រដ្ឋបាលខេត្តអាចវាយ តម្លៃបានថា តាមរយៈការប្តេជ្ញាចិត្តពីគ្រប់ពាក់ព័ន្ធទាំងអស់ ហេដ្ឋារចនាសម្ព័ន្ធនានា ពិសេសផ្លូវក្នុងក្រុង និងផ្លូវជនបទទៅតាមគោលដៅទេសចរណ៍ត្រូវបានកែលម្អ និងស្ថាបនាឡើងវិញ ដើម្បីបម្រើនូវសេចក្តីត្រូវការរបស់ ប្រជាពលរដ្ឋ និងភ្ញៀវទេសចរឲ្យកាន់តែល្អប្រសើរ។
លោកបានលើកឡើងថា ដើម្បីរៀបចំអភិវឌ្ឍន៍វិស័យទេសចរណ៍ខេត្តសៀមរាប គ្រប់ផ្នែកពាក់ព័ន្ធទាំងអស់ ត្រូវប្តេជ្ញាចិត្តខ្ពស់ ដោយផ្តោតការយកចិត្តទុកដាក់លើចំណុចមួយចំនួន៥ដូចខាងក្រោម៖
១៖ ការរៀបចំក្រុងសៀមរាប ដែលត្រូវអភិវឌ្ឍឲ្យទៅជាទីក្រុងទេសចរណ៍ ជាទីក្រុង បេតិកភ័ណ្ឌ ជាទីក្រុងដែលបានគិតគូរពីបរិស្ថាន ដើម្បីទ្រទ្រង់កំណើនភ្ញៀវទេសចរមកកម្សាន្តនៅខេត្តសៀមរាប ។
២៖ ជំរុញការអភិវឌ្ឍហេដ្ឋារចនាសម្ព័ន្ធនានាក្នុងខេត្ត ការរៀបចំផ្គត់ផ្គង់ទឹក អគ្គិសនី ការគ្រប់គ្រងសំណល់រឹងរាវឲ្យបានគ្រប់គ្រាន់ និងត្រឹមត្រូវតាមស្តង់ដាបរិស្ថាន. ការរៀបចំសណ្តាប់ធ្នាប់សាធារណឲ្យបានល្អ របៀបរៀបរយ ស្លាកសញ្ញាចរាចរណ៍ ភ្លើងបំភ្លឺ ទីក្រុង ពង្រីកផ្លូវក្នុងក្រុង ពិសេសផ្លូវថ្មើរជើង និងផ្លូវសម្រាប់ជិះកង់ ។ បច្ចុប្បន្នរដ្ឋបាលខេត្តបាននឹង កំពុងរៀបចំផ្លូវ ចំណតរថយន្ត សួនច្បារ និងកន្លែងហាត់ប្រាណនៅចន្លោះស្ពានថ្មមន្ទីរទេសចរណ៍ចាស់ ដល់ស្ពានថ្មព្រះរាជដំណាក់ ។ ការរៀបចំតំបន់ផ្សារចាស់ ( Pub Street) បានល្អប្រសើរ ។
៣៖ ជំរុញការអភិវឌ្ឍខ្សែក្រវាត់បៃតង ដើម្បីកាត់បន្ថយការធ្នុះធ្លាយនៃសេដ្ឋកិច្ចវិស័យទេសចរណ៍ ដូចជានាំការចូលនូវដាំបន្លែ ផ្លែឈើ សាច់ពីបរទេស ជំរុញសកម្មភាពប្រជាពលរដ្ឋដាំបន្លែ ផ្លែឈើ និងចិញ្ចឹមសត្វ ជាលក្ខណះគ្រួសារ និងធម្មជាតិ ដើម្បីផ្គត់ផ្គង់តម្រូវការរបស់ភ្ញៀវទេសចរ។
៤៖ ជំរុញការអភិវឌ្ឍតំបន់ទេសចរណ៍ជុំវិញក្រុងសៀមរាប ដោយពង្រឹងគុណភាពសេវា និងបង្កើតចលនាទេសចរណ៍ថ្មីបន្ថែមទៀត ជំរុញការឃោសនា ផ្សព្វផ្សាយឲ្យបានទូលំទូលាយដល់ភ្ញៀវទេសចរ ដោយសហការជាមួយផ្នែកឯកជន ដៃគូរអភិវឌ្ឍន៍ និងរៀបចំកញ្ចប់ទស្សនកិច្ចក្រៅតំបន់ប្រាសាទ ។
៥៖ ជំរុញការពង្រឹងការងារសន្តិសុខ សណ្តាប់ធ្នាប់ និងសុវត្ថិភាពភ្ញៀវទេសចរ កិច្ចប្រជុំបូកសរុបការងារទេសចរណ៍ឆ្នាំ២០១៧ និងទិសដៅអនុវត្តការងារបន្តឆ្នាំ២០១៨ របស់មន្ទីរ ទេសចរណ៍ខេត្តសៀមរាប ថ្ងៃនេះគឺដើម្បីត្រួតពិនិត្យ និងវាយតម្លៃឲ្យបានហ្មត់ចត់ និងគ្រប់ជ្រុងជ្រោយនូវលទ្ធផល បទពិសោធន៍ចំណុចខ្លាំង ចំណុចខ្សោយបញ្ហាប្រឈមដែលមន្ទីរសម្រេចបានកន្លងមក ។
លោកអភិបាលបានបន្តថា កិច្ចប្រជុំនេះពិតជាមានសារ សំខាន់សម្រាប់ផ្តល់នូវភាពនុវត្តភាពដល់គ្រប់ប្រតិបត្តិករទេសចរណ៍ មន្ទីរជំនាញនានា សមត្ថកិច្ចពាក់ព័ន្ធទាំងអស់ ពិសេសផ្នែកឯកជន បានប្រមូលផ្តុំនូវគន្លឹះសំខាន់ៗក្នុងការដោះស្រាយបញ្ហាប្រឈមនានា និងផ្តល់មតិយោបល់តាមរយៈ ការពិភាក្សាឈរលើមូលដ្ឋានកែលម្អស្ថាបនា រួមទាំងការអនុវត្តការងារ និងឥរិយាបទរបស់មន្ត្រីរាជការគ្រប់ផ្នែកក្នុងការផ្តល់សេវាសាធារណៈគ្រប់ប្រភេទជូនដល់ប្រតិបត្តិករទេសចរណ៍ ឲ្យបានកាន់តែល្អប្រសើរថែមទៀត។
ថ្លែងក្នុងឱកាសនោះ លោក ថោង ខុន បានលើកឡើងថា វិស័យទេសចរណ៍នៅខេត្តសៀមរាប បាននិងកំពុងបន្តបោះជំហ៊ានទៅមុខ ស្របនឹងវិស័យផ្សេងទៀត មិនថាតែនៅខេត្តសៀមរាប ឬនៅទូទាំងព្រះរាជាណាចក្រកម្ពុជា ដែលកំពុងអភិវឌ្ឍឈានឡើងពីមួយឆ្នាំទៅមួយឆ្នាំ។ បច្ចុប្បន្ននេះ ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់ សម្តេចតេជោនាយករដ្ឋមន្ត្រី ប្រទេសជាតិយើងពោរពេញដោយសុខសន្តិភាព និងការអភិវឌ្ឍ ដែលយើងទាំងអស់គ្នាចាំបាច់ត្រូវខិតខំថែរក្សាការពារឱ្យបាន ព្រោះវាជាអាយុជីវិត និងសេចក្តីសុខសាន្តរបស់យើងសម្រាប់ពេលបច្ចុប្បន្ន និងសម្រាប់កូនចៅយើងរាប់ជំនាន់ទៅអនាគត។ វិស័យទេសចរណ៍មិនអាចអភិវឌ្ឍបានទេ បើប្រទេសជាតិមួយគ្មានសន្តិភាព។ ពិតណាស់ថា កម្ពុជាពិតជាមានឧត្តមភាពប្រកួតប្រជែងខ្ពស់ខាងវិស័យទេសចរណ៍ ក្រោមម្លប់នៃសន្តិភាព ស្ថិរភាពនយោបាយ និងសុខសុវត្ថិភាព ដែលជាគ្រឹះដ៏រឹងមាំនៃការអភិវឌ្ឍ។
លោករដ្ឋមន្ត្រីបានរំលឹកថា នៅឆ្នាំ២០១៧ ក្នុងចំណោមទេសចរអន្តរជាតិ ជាង ៥.៦លាននាក់ មកកម្ពុជា ក្នុងនោះមកទស្សនាខេត្តសៀមរាប មានចំនួនជាង ២.៤លាននាក់ កើនឡើង ១១.៤% ធៀបនឹងរយៈពេលដូចគ្នាឆ្នាំ២០១៦ ។ ដោយឡែកនៅឆ្នាំ២០១៧ ខេត្តសៀមរាបបានទទួលភ្ញៀវទេសចរជាតិ និងអន្តរជាតិសរុបចំនួនប្រមាណជិត ៥.៦លាននាក់ កើន៩.៩៣% បើធៀបនឹងរយៈពេលដូចគ្នាក្នុងឆ្នាំ២០១៦ ក្នុងនោះ ភ្ញៀវទេសចរអន្ដរជាតិមានចំនួនប្រមាណ ២.៥លាននាក់ កើន១១.៤២% ធៀបនឹង ឆ្នាំ២០១៦ និងភ្ញៀវទេសចរជាតិមានចំនួនប្រមាណ ៣លាននាក់ កើន៨.៧៧% ធៀបនឹងឆ្នាំ២០១៦ ។
លោកក៏បានគូសបញ្ជាក់ផងដែរថា ជាមួយនឹងកំណើនដ៏ឆាប់រហ័សនៃលំហូរភ្ញៀវទេសចរ និងវិនិយោគិនមកកាន់ព្រះរាជាណាចក្រកម្ពុជា យើងសង្កេតឃើញមានការរីកចំរើន ជាបន្តបន្ទាប់នូវសម្បទាទេសចរណ៍នៅទូទាំងប្រទេសក្នុងនោះរួមមានសណ្ឋាគារមានប្រមាណជា ៧៨១កន្លែង(ស្មើនឹង៤៥,០៧០បន្ទប់) ផ្ទះភ្ញៀវមានប្រមាណជា ២,២៥៥កន្លែង(ស្មើនឹង៣៣,៧២៧បន្ទប់) ភោជនីយដ្ឋាន-អាហារដ្ឋានមានប្រមាណជា ២,២៣៩កន្លែង(ស្មើនឹង១៣០,៨៨៥កៅអី) ម៉ាស្សាមានប្រមាណជា ៣០៨កន្លែង(ស្មើនឹង២,៧៧៩គ្រែ) សេវាកម្សាន្តទេសចរណ៍សម្រាប់មនុស្សពេញវ័យមានប្រមាណជា ៨៨១កន្លែង ទីភ្នាក់ងារទេសចរណ៍មានប្រមាណជា ៦១៩កន្លែង មគ្គុទ្ទេសក៏ទេសចរណ៍មានប្រមាណជា ៦,១២៣នាក់(សរុបមាន១២ភាសា)។
លោករដ្ឋមន្ត្រីបន្តថា ដោយឡែកសម្រាប់ខេត្តសៀមរាប មានសណ្ឋាគារចំនួនប្រមាណជា ២២៥ កន្លែង ផ្ទះភ្ញៀវមាន ចំនួនប្រមាណជា ៣១៦កន្លែង ភោជនីយដ្ឋាន-អាហារដ្ឋានមានប្រមាណជា ១៩០ កន្លែង សេវាកម្សាន្ដទេសចរណ៍មានប្រមាណជា ១៣កន្លែង ម៉ាស្សាសុខភាព មានចំនួនប្រមាណ ៥០កន្លែង ទីភ្នាក់ងារទេសចរណ៍មានប្រមាណជា ២៨៤ កន្លែង មគ្គុទ្ទេសក៏ទេសចរណ៍មានប្រមាណជា ៤,១៥២នាក់ ។
លោកបន្តឲ្យដឹងទៀតថា គួរចាប់អារម្មណ៍ផងដែរថា ខេត្តសៀមរាបត្រូវបានទទួលស្គាល់ជា «គោលដៅទេសចរណ៍ដ៏ទាក់ទាញ» សម្រាប់តំបន់និងជាអន្តរជាតិផងដែរ។ ជាក់ស្តែងកាលពីថ្ងៃទី២៦ ខែមករា ឆ្នាំ២០១៨ នាឱកាសវេទិកាទេសចរណ៍អាស៊ានឆ្នាំ២០១៨ នៅទីក្រុងឈៀងម៉ៃ ប្រទេសថៃកន្លងទៅថ្មីៗនេះ ក្រុងសៀមរាបត្រូវបានពិនិត្យនិងវាយតម្លៃដោយសហគមន៍អាស៊ាន ទទួលស្គាល់ជា «ទីក្រុងទេសចរណ៍ស្អាតអាស៊ាន»។
លោកបន្ថែមថា សមិទ្ធផលដែលយើងទាំងអស់គ្នាទទួលបាននេះ មិនមែនកើតមានដោយចៃដន្យនោះទេ គឺសុទ្ធសឹងជាផលពីកម្លាំងខិតខំប្រឹងប្រែងរបស់គ្រប់ភាគីពាក់ព័ន្ធ ពិសេសប្រជាពលរដ្ឋដែលរស់នៅផ្ទាល់នៅខេត្តសៀមរាបនេះតែម្តង។ សព្វថ្ងៃមិត្តប្រតិបត្តិករ និងវិនិយោគិនទេសចរណ៍ទាំងអស់កំពុងទាញយកផលពីសមិទ្ធផលមួយនេះ ដូច្នេះគួរណាស់យើងត្រូវចូលរួមទាំងអស់គ្នាថែរក្សា។ ការអភិវឌ្ឍតំបន់បេតិកភណ្ឌវប្បធម៌សៀមរាបអង្គរយើងនេះ ត្រូវដើរត្រង់លើមាគ៌ានិរន្តរភាព និងការទទួលខុសត្រូវរួមមួយរវាងគ្រប់ភាគីពាក់ព័ន្ធ ក្នុងការរក្សាតុល្យភាពរវាងផលប្រយោជន៍ខាងផ្នែកបរិស្ថាន សេដ្ឋកិច្ច-សង្គម និងវប្បធម៌។
លោករដ្ឋមន្ត្រី ក៏បានលើកឡើងនូវអនុសាសន៍មួយចំនួន សម្រាប់ការអភិវឌ្ឍ និងលើកកម្ពស់វិស័យទេសចរណ៍ នៅខេត្តសៀមរាប ដើម្បីឈានឆ្ពោះប្រកបដោយនិរន្តរភាព ៣ចំណុចធំៗ ដូចជា ៖
១៖ រដ្ឋបាលខេត្តសៀមរាប ត្រូវខិតខំគ្រប់គ្រង និងអភិវឌ្ឍន៍ទេសចរណ៍ខេត្តសៀមរាបដោយស្មារតីប្រុងប្រយ័ត្ន ធ្វើយ៉ាងណារក្សាជ័យលាភីនេះឱ្យបាន។ ខេត្តសៀមរាប ហ៊ុព័ទ្ធដោយមជ្ឈដ្ឋានសម្បត្តិបេតិកភណ្ឌជាតិ និងអន្តរជាតិជាច្រើន ដែលទាមទារឱ្យមានការយកចិត្តទុកដាក់ខ្ពស់។ មានន័យថា រាល់សកម្មភាពណាមួយដែលបានដាក់ចេញត្រូវមានការគិតគូរ និងដាក់ផែនការត្រឹមត្រូវ។ ក្នុងន័យនេះ ខេត្តគួរត្រូវមានផែនការអភិវឌ្ឍក្រុង និងផែនការប្រើប្រាស់ដីទីក្រុង ជាឯកសារផ្លូវការនិងដាក់ឱ្យអនុវត្តឱ្យបានក្នុងឆ្នាំ២០១៨នេះ។
២៖ មន្ទីរទេសចរណ៍ខេត្តសៀមរាប ក្នុងនាមជាសេនាធិការបច្ចេកទេសឱ្យរដ្ឋបាលខេត្តត្រូវខិតខំដាក់ចេញក្នុងឆ្នាំ២០១៨នេះផងដែរនូវការងារជាអាទិភាពចំពោះមុខចំនួន។
៣៖ មន្ទីរទេសចរណ៍ខេត្តសៀមរាប ត្រូវបន្តខិតខំប្រឹងប្រែងការងារគ្រប់គ្រងអាជ្ញាបណ្ណទេសចរណ៍ និងចំណាត់ថ្នាក់ក្នុងសេវាកម្មទេសចរណ៍ ដើម្បីរុញភ្ជាប់នឹងសមិទ្ធផលដែលយើងបានទទួលដោយមោទនហើយនេះ គឺ «ក្រុងសៀមរាប ជាទីក្រុងទេសចរណ៍ស្អាតអាស៊ាន» ស្របតាមទិសដៅចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ» ។
សូមបញ្ជាក់ថា នៅក្នុងក្នុងពិធីនេះផងដែរ ខាងរដ្ឋបាលខេត្តសៀមរាប បានប្រគល់ជូននូវប័ណ្ណសរសើរដល់មូលដ្ឋានអាជីវកម្មទេសចរណ៍ ក្នុងខេត្តសៀមរាប ចំនួន ២២កន្លែង រួមមាន សណ្ឋាគារ១កន្លែង ភោជណីយដ្ឋាន៤កន្លែង សមាគមបើកតាក់ស៊ី១ ម្ចាស់ហាងផលិតផលខ្មែរ១កន្លែង បណ្ដាញសហគមទេសចរណ៍ស្រុកបន្ទាយស្រី១កន្លែង ផ្ទះសំណាក់១កន្លែង មគ្គុទ្ទេសក៍ទេសចរណ៍៥នាក់ អ្នកបើកបររ៉ឺម៉កជានារី៤នាក់ ក្រុមហ៊ុន សាម សុជាង ឌីវេឡុបម៉ិន ១កន្លែង និងក្រុមហ៊ុនទីភ្នាក់ងារទេចរណ៍ ចំនួន៣កន្លែង សរុបចំនួន ២២ប័ណ្ណសរសើរ៕
