(ប៊ុយដាប៉ែល-ហុងគ្រី)៖ នៅក្នុងឱកាសដឹកនាំគណៈប្រតិភូកម្ពុជាមកចូលរួម «កិច្ចប្រជុំគណៈកម្មាធិការប្រតិបត្តិ នៃអង្គការអ្នកប្រជាធិបតេយ្យនិយមកណ្ដាល» (Executive Committee Meeting of Centrist Democrat International – CDI) នៅរដ្ឋធានីប៊ុយដាប៉ែស ប្រទេសហុងគ្រី ពីថ្ងៃទី១៥-១៧ ខែកុម្ភៈ ឆ្នាំ២០១៨ ឧបនាយករដ្ឋមន្ត្រី ហោ ណាំហុង ​បានជួបសំណេះសំណាលនិងពិភាក្សាការងារជាមួយ លោក Zsolt Semjén ឧបនាយករដ្ឋមន្ត្រីហុងគ្រី និងលោក​ Viktor Orbán នាយករដ្ឋមន្ត្រីនៃ​ហុងគ្រី នៅវិមានរដ្ឋសភា រដ្ឋធានីប៊ុយដាប៉ែស។

​ឧបនាយករដ្ឋមន្ត្រី ហោ ណាំហុង បានលើកនូវចំណុចខ្លះៗដូចជា រដ្ឋាភិបាល និងគណបក្សប្រជាជនកម្ពុជា ប្រកាន់ភ្ជាប់តាមរបៀបវារៈនយោបាយនិយមកណ្ដាល តែអតីតបក្សប្រឆាំង ដែលមាននយោបាយជ្រុលនិយម បានឃុបឃិតជាមួយបរទេសដើម្បីធ្វើបដិវត្តន៍ពណ៌ ហើយបញ្ចុះបញ្ចូលសភាអឺរ៉ុបដើម្បីប្រឆាំងនឹងកម្ពុជា ហើយរាជរដ្ឋាភិបាលកម្ពុជាពុំអាចអនុញ្ញាតឲ្យមានបដិវត្តន៍ពណ៌ជាដាក់ខាតនៅកម្ពុជា និងត្រូវអនុវត្តច្បាប់ និងរដ្ឋធម្មនុញ្ញស្របតាមនីតិរដ្ឋ។
ឧបនាយករដ្ឋមន្ដ្រី ហោ ណាំហុង បានបញ្ជាក់ថា កម្ពុជាដាច់ខាតការពារឯករាជ្យ អធិបតេយ្យជាតិ និងបូរណភាពទឹកដី ប្រឆាំងនឹងការជ្រៀតជ្រែកពីបរទេស ឲ្យបានជាដាច់ខាត ហើយរាជរដ្ឋាភិបាលកម្ពុជា បានអនុវត្តដោយពេញលេញនូវគោលការណ៍ប្រជាធិបតេយ្យសេរីពហុបក្សដូច ដែលបានចែង នៅក្នុងរដ្ឋធម្មនុញ្ញរបស់កម្ពុជា។

​ឧបនាយករដ្ឋមន្ត្រី បានស្នើសុំការគាំទ្រពីហុងគ្រី ដើម្បីកុំឲ្យសហភាពអឺរ៉ុបដាក់ទណ្ឌកម្មប្រឆាំងនឹងកម្ពុជា ហើយដោយសារសន្តិភាពមានទូទាំងប្រទេស នាំអោយរាជរដ្ឋាភិបាលកម្ពុជា អាចសម្រេចបាននូវកំណើនសេដ្ឋកិច្ច ៧,៧% ជាងពីរទសវត្សរ៍កន្លងមក បានធ្វើឲ្យជីវភាពប្រជាជនបានរីកចម្រើន និងកាត់បន្ថយភាពក្រីក្រ។

ជាមួយគ្នានោះ លោក​ Zsolt Semjén ឧបនាយករដ្ឋមន្ត្រីហុងគ្រី បានលើកឡើងថា ប្រទេសហុងគ្រីមានគោលនយោបាយបើកចំហរឆ្ពោះទិសខាងកើត គិតទាំងកិច្ចសហប្រតិបត្តិការ ជាមួយ​ចិន រុស្ស៊ី និងអាស៊ាន ជាពិសេសកម្ពុជា ហើយប្រទេសហុងគ្រីគឺជាផ្នែកមួយនៃ VISIGRAD (ប៉ូឡូញ ហុងគ្រី ស្លូវ៉ាគី និងសាធារណរដ្ឋឆេក) ដែលបច្ចុប្បន្នជា «ក្បាលម៉ាស៊ីន» នៃសហភាពអឺរ៉ុប។ ប្រទេសទាំងបួនមានឥទ្ធិពលសេដ្ឋកិច្ចយ៉ាងខ្លាំងនៅក្នុងសហភាពអឺរ៉ុប។

នៅទីបញ្ចប់ លោក Zsolt Semjén បន្ថែមថា ប្រទេសហុងគ្រីនឹងគាំទ្រដល់ប្រទេសកម្ពុជាទាំងផ្លូវការ និងក្រៅផ្លូវការ នៅក្នុងសហភាពអឺរ៉ុប សម្រាប់បញ្ហានានាដែលទាក់ទងនឹងការប្តេជ្ញាចិត្តរបស់សភាអឺរ៉ុបលើកម្ពុជា​ នឹងផ្តល់ការគាំទ្រកម្ពុជា ពិសេសនឹងមិនគាំទ្រសេចក្តីសម្រេចណា ដែលមានចេតនាដាក់ទណ្ឌកម្មលើកម្ពុជា នៅក្នុងសភាអឺរ៉ុបឡើយ។
ឯកឧត្តមឧបនាយករដ្ឋមន្ត្រី ហោ ណាំហុង៖
​
ដោយឡែក នៅរសៀលថ្ងៃ១៦ កុម្ភៈ ២០១៨ ឧបនាយករដ្ឋមន្ត្រី ហោ ណាំហុង ក៏បានជួបពិភាក្សាការងារ ជាមួយលោក Viktor Orbán នាយករដ្ឋមន្ត្រីហុងគ្រី ពិភាក្សាអំពីសភាពការណ៍នៅកម្ពុជា ដូចដែរ​ឧបនាយករដ្ឋមន្ត្រី បានជម្រាប លោក Zsolt Semjén ឧបនាយករដ្ឋមន្ត្រីហុងគ្រី កាលពីពេលព្រឹកថ្ងៃដដែរនោះ។

​នាយករដ្ឋមន្ត្រី របស់ប្រទេសហុងគ្រី បានថ្លែងអំរគុណសម្តេចតេជោ ហ៊ុន សែន ដែលបានចាត់ឲ្យ ​ឧបនាយករដ្ឋមន្ត្រី ហោ ណាំហុង មកចូលរួមកិច្ចប្រជុំ គណៈកម្មាធិការប្រតិបត្តិ នៃអង្គការអ្នកប្រជាធិបតេយ្យនិយមកណ្ដាល (CDI Executive Committee Meeting) ហើយបានបញ្ជាក់ថា ហុងគ្រីនឹងគាំទ្រកម្ពុជា ក្នុងបញ្ហានេះ ដោយលោក បានទទួលរបាយការណ៍ពី​ឧបនាយករដ្ឋមន្ត្រីហុងគ្រី រួចមកហើយ។

ជាទីបញ្ចប់ ​ឧបនាយករដ្ឋមន្ត្រី ហោ ណាំហុង បានជម្រាប ​នាយករដ្ឋមន្ត្រីហុងគ្រី អំពីការអញ្ជើញនាយករដ្ឋមន្ត្រីហុងគ្រី មកទស្សនកិច្ចផ្លូវការនៅកម្ពុជា ដើម្បីពង្រឹងពង្រីកមិត្តភាព ដ៏យូរលុងរវាងកម្ពុជា និងហុងគ្រី ព្រមទាំងសហប្រតិបត្តិការរវាងប្រទេសទាំងពីរ។ ​លោកនាយករដ្ឋមន្ត្រី សន្យាថា នឹងមកទស្សនកិច្ចកម្ពុជា តាមការអញ្ជើញរបស់​សម្តេច​តេជោ ហ៊ុន សែន នាយករដ្ឋមន្ត្រី​នៃកម្ពុជា នៅថ្ងៃក្រោយ៕