(ភ្នំពេញ)៖​ ផលិតកម្ម C-Star បានបញ្ចេញស្នាដៃដំបូងរបស់ខ្លួន មានចំណងជើងថា «ប៊ីអាយជី និងខ្មោចយក្សធំ» ដែលជាភាពយន្តខ្នាតធំ ត្រូវបានសម្រិតសម្រាំងយ៉ាពិសេស ពីផលិតករ ដោយបានធ្វើពិធីបើកសម្ពោធ កាលពីល្ងាចថ្ងៃទី១៤ កុម្ភៈ ឆ្នាំ២០១៨ ​នេះ នៅរោងកុន Prime Cineplex ស្ថិតក្នុងផ្សារទំនើបសុវណ្ណា ​ខណៈដែលស្នាដៃនេះ​ ត្រូវបញ្ចាំងជាផ្លូវការថ្ងៃទី១៥ កុម្ភៈ ឆ្នាំ២០១៨ តទៅនារោងភាពយន្តនានា ក្នុងរាជធានីភ្នំពេញ។

នៅក្នុងរឿង «ប៊ីអាយជី និងខ្មោចយក្សធំ» របស់ផលិតកម្ម ស៊ីស្តារ បានសម្រេចជ្រើសយកតួសម្តែងក្នុងរឿង ដែលមានដូចជា អ្នកនាង សុខ សោម៉ាវត្តី តួឯកស្រី, លោក ឈី រដ្ឋា តួឯកប្រុស, នាយក្រូច, នាង អ៊ីត, លោក BIG និងតារាប្រុសស្រីជាច្រើនរូបទៀត។

តារាកំប្លែង នាយក្រូច ​ជាតួអង្គដ៏សំខាន់ក្នុងរឿងនេះ​ បានបង្ហាញចំណាប់អារម្មណ៍ថា លោកមានការរីករាយ ដែលស្នាដៃដំបូងរបស់ផលិតកម្មស៊ីស្តា បានផុសឡើង។ លោកបន្តថា រឿង «ប៊ីអាយជី និងខ្មោចយក្សធំ» គឺសិល្បករតស៊ូថតណាស់បាយទឹករួមគ្នា ពោលរឿងនេះបានផ្តល់នូវអនុស្សាវរីយ៍ជាច្រើន សម្រាប់ផលិតករ និងក្រុមការងារទាំងអស់ និងក៏បានផ្ដល់នូវបទពិសោធជាច្រើន ដល់គ្នាទៅវិញទៅមក ផងដែរ។

ចាងហ្វាងផលិតកម្ម ស៊ីស្តា លោក ឈី រដ្ឋា បានឲ្យដឹងថា នេះជាស្នាដៃលើកទី១ របស់ផលិតកម្ម C-Star ដែលបានពាំនាំសាច់រឿងបែបកំប្លែង ជូនប្រិយមិត្តគាំទ្រស្នាដៃ ផលិតកម្មរបស់យើង​។ ​ក្រោមការយកចិត្តទុកដាក់ខិតខំទាំងអស់គ្នា គឺពេលនេះបានសម្រេចលទ្ធផលជាផ្លូវការហើយ ដោយស្នាដៃដំបូងនេះ ក៏ជាបទពិសោធន៍មួយសម្រាប់ ខាងក្រុមការងារផលិតកម្ម។

យ៉ាងណាមិញ លោករំពឹងថា បងប្អូនទស្សនិកជន នឹងចូលរួមគាំទ្រ ដើម្បីបានចូលរួមជាកម្លាំងចិត្ត ហើយផ្តល់ជាមតិរិះគន់កែលម្អ ដើម្បីបានសាងភាពយន្តខ្មែរថ្មីៗ​ បន្ថែមទៀត ក្នុងន័យលើកមុខមាត់ វិស័យសិល្បៈភាពយន្តខ្មែរ របស់យើងទាំងអស់គ្នា៕