(ភ្នំពេញ)៖ បន្ទាប់បានប្រើកណ្ដាប់ដៃដែកដ៏មានឥទ្ធិពលរបស់ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ដោយបានបញ្ជាឲ្យអាជ្ញាធរ និងសមត្ថកិច្ច ចាប់រថយន្ដ​តទ្រុងខុសលក្ខណៈបច្ចេកទេសនោះ គេសង្កេតឃើញថា មន្ដ្រីអ្នកអនុវត្តច្បាប់បាន និងកំពុង​នូវបទបញ្ជានេះ យ៉ាងផុសផុលបំផុត ហើយ​នឹងត្រូវធ្វើជាបន្ដបន្ទាប់ផងដែរ។

តួរលេខដែលបណ្ដាញព័ត៌មាន Fresh News ទទួលបានពីក្រសួងសាធារណការ និងដឹកជញ្ជូន នៅរសៀលថ្ងៃទី១៤ ខែកុម្ភៈ ឆ្នាំ២០១៨នេះ បញ្ជាក់ថា ដោយគិតត្រឹមថ្ងៃទី១២ ខែកុម្ភៈ មានរថយន្ដជាង១ម៉ឺនគ្រឿង ត្រូវបានចាប់ត្រួតពិនិត្យ ដោយក្នុងនោះ​២៨៧គ្រឿង​បានកាត់ទ្រុង, ១៦២គ្រឿង​ត្រូវបានរុះរើ និងដោះទ្រុង​ដែលរៀបចំតខុសបច្ចេកទេស និង៣២១គ្រឿង​ត្រូវបានចាប់ទុក​រៀបចំកាត់ជាបន្ដបន្ទាប់។

យ៉ាងណាមិញ សម្រាប់តួរលេខខាងលើនេះ មិនទាន់មានចំនួនពេញលេញនៅឡើយទេ ដោយហេតុថាអាជ្ញាធរ និងសមត្ថកិច្ចនៅទូទាំងប្រទេស បាននិងកំពុងបើកប្រតិបត្តិនេះជាបន្ដបន្ទាប់។

សូមជម្រាបថា បន្ទាប់ពីឃើញហានិភ័យ នៃគ្រោះថ្នាក់ចរាចរលើដងវិថី និងការបំផ្លាញផ្លូវមកពីការដឹកលើសទម្ងន់ របស់រថយន្តតទ្រុង ខុសលក្ខណៈបច្ចេកទេសនោះ សម្តេចតេជោ ហ៊ុន សែន កាលពីថ្ងៃទី០៩ ខែកុម្ភៈ ឆ្នាំ២០១៨កន្លងទៅនេះ បានដាក់ចេញនូវបទបញ្ជាជាថ្មី ឲ្យចាត់វិធានការដ៏តឹងរឹងបំផុត ចំពោះរថយន្តតទ្រុងខុសលក្ខណៈបច្ចេកទេសទាំងនេះ។ ពោលចាប់ពីត្រឹមម៉ោង ១២៖០០នាទីយប់ថ្ងៃទី០៩ ខែកុម្ភៈ គ្រប់រថយន្តតទ្រុងមិនអាចធ្វើចរាចរលើដងវិថីបានឡើយ ហើយបើធ្វើចរាចរកន្លែងណា ត្រូវចាប់កាត់កន្លែងនោះ។

ក្រោយបទបញ្ជានេះ មន្ត្រីគ្រប់លំដាប់ថ្នាក់នៅតាមរាជធានី-ខេត្ត បានធ្វើសកម្មភាពយ៉ាងសស្រាក់សស្រាំចាប់កាត់រថយន្តតទ្រុងខុសបច្ចេកទេសទាំងនោះ ហើយក៏មានម្ចាស់រថយន្តខ្លះ បានយករថយន្តទៅកាន់ទ្រុងដោយខ្លួនឯងផងដែរ។​ សម្តេចតេជោ បានបញ្ជាក់ថា ប្រតិបត្តិការកាត់រថយន្តតទ្រុងខុសបច្ចេកទេសនេះ មិនមានការដកថយនោះឡើយ ហើយទឹកដីណា គឺថ្នាក់ដឹកនាំនៃខេត្តនោះជាអ្នកចាត់ការមិនចាំបាច់ក្រសួងសាធារណការនោះទេ។

សម្តេចតេជោ ហ៊ុន សែន ក៏បានឲ្យពិនិត្យមើលយានដ្ឋានទាំងឡាយណា ដែលនៅបន្តកែច្នៃរថយន្ត ឬ តទ្រុងរថយន្តខុសច្បាប់នេះផងដែរ បើមិនគោរពតាមច្បាប់ទេ គឺបិទចោលតែម្តងទៅ។

បើទោះបីជាការអនុវត្តន៍ចំណាត់ការនេះ កំពុងមានភាពសកម្មភាពយ៉ាងណាក្តី តែសម្តេចនាយករដ្ឋមន្ត្រី បានបង្ហាញចម្ងល់ថា តើមន្ត្រីពាក់ព័ន្ធ កំពុងតែអនុវត្តន៍ច្បាប់ ឬ​អនុវត្តន៍បទបញ្ជារបស់សម្តេច។ ចម្ងល់បែបនេះ ក៏ដោយសារតែច្បាប់ចាត់វិធានការលើរថយន្តតទ្រុងនេះ មានហើយហេតុអ្វី មន្ត្រីមិនអនុវត្តន៍ រង់ចាំដល់មានបទបញ្ជារបស់សម្តេចទើបអនុវត្តន៍ទៅវិញ។ សម្តេចតេជោថា ការរងចាំអនុវត្តន៍តែបទបញ្ជា មិនព្រមអនុវត្តន៍ច្បាប់ ជារឿងគ្រោះថ្នាក់មួយសម្រាប់ប្រព័ន្ធគ្រប់គ្រង និងការដឹកនាំរដ្ឋ៕