(ពោធិ៍សាត់)៖ គ្រាប់យុទ្ធភណ្ឌមិនទាន់ផ្ទុះ ដែលនៅសេសសល់ពីសម័យសង្គ្រាម សរុបចំនួន១៤១គ្រាប់ ត្រូវបានអង្គការ Halo Trust យកទៅកម្ទេចចោល ៨៩គ្រាប់ និង៥២គ្រាប់ទៀត រក្សាទុកនៅអធិការដ្ឋាននគរបាលស្រុកកណ្តៀង រងចាំកម្ទេចនៅពេលក្រោយ បន្ទាប់ពីសមត្ថកិច្ចរកឃើញ ហើយបានរាយការណ៍ទៅឲ្យក្រុមជំនាញរុករកបន្ថែម ដើម្បីរំដោះចេញពីក្នុងដី។

ប្រតិបត្តិការនេះធ្វើឡើងនៅថ្ងៃទី១០-១១ ខែកុម្ភៈ ឆ្នាំ២០១៨ នៅក្នុងបរិវេណសាលាអនុវិទ្យាល័យក្ងាន ស្ថិតនៅភូមិឈើទាល ឃុំ ស្វាយលួង ស្រុកកណ្តៀង ខេត្តពោធិ៍សាត់។

សេចក្តីរាយការណ៍ពីភ្នាក់ងារ Fresh News បានឲ្យដឹងថា កាលពីថ្ងៃទី១០ ខែកុម្ភៈ ឆ្នាំ២០១៨ ក្នុងបរិវេណសាលាអនុវិទ្យាល័យក្ងាន សមត្ថកិច្ចនគរបាលស្រុកកណ្តៀង បានប្រទះឃើញគ្រាប់យុទ្ធភណ្ឌមិនទាន់ផ្ទុះ ដែលកប់ក្នុងដី​ហើយបានរាយការណ៍ជូនក្រុមជំនាញ អង្គការ Halo Trust រៀវរកបន្ថែមក៏ប្រទះឃើញគ្រាប់​៦០mm សរុបចំនួន១៤១គ្រាប់ និងបានយកទៅកម្ទេចចោល នៅថ្ងៃទី១១ ខែកុម្ភៈ ខាងលិចសាលាចម្ងាយ៧០០m ចំនួន៨៩គ្រាប់ សល់៥២គ្រាប់ទៀត រក្សាទុកនៅអធិការដ្ឋាននគរបាលស្រុក រងចាំកម្ទេចចោលនៅពេលក្រោយ។

សេចក្តីរាយការណ៍បន្តថា គ្រាប់យុទ្ធភណ្ឌមិនទាន់ផ្ទុះទាំង១៤១គ្រាប់នោះ ជាគ្រាប់បាញ់ប្រភេទ ៦០mm ដែលនៅសេសសល់ពីសម័យសង្គ្រាមទាំងអស់។

ជាមួយគ្នានោះ តំណាងអង្គការ Halo Trust បានអំពាវនាវដល់ប្រជាពលរដ្ឋនៅទីនោះ ត្រូវមានការប្រុងប្រយ័ត្នខ្ពស់ បើមានឃើញគ្រាប់យុទ្ធភណ្ឌមិនទាន់ផ្ទុះ ត្រូវរាយការណ៍ជាបន្ទាន់ ទៅកម្លាំងមានសមត្ថកិច្ច ឬអង្គភាពជំនាញ Halo Trust ដើម្បីយកទៅកម្ទេចចោល ជៀសវាងគ្រោះថ្នាក់ជាយថាហេតុណាមួយ៕​