(ភ្នំពេញ)៖ អគ្គស្នងការនគរបាលជាតិ រៀបចំពិធីចុះហត្ថលេខាលើកិច្ចសន្យា​ ជាមួយក្រុមហ៊ុន យូចរ៉ក់ (ខេមបូឌា) អ៊ិនធើប្រាយ នៅថ្ងៃទី១២ ខែកុម្ភៈ ឆ្នាំ២០១៨នេះ ក្រោមអធិបតីភាពនាយឧត្តមសេនីយ៍ សួស អង្គារ អគ្គស្នងការរងនគរបាលជាតិ និងលោកស្រី Ou Haiyan ប្រធានក្រុមហ៊ុន យូចរ៉ក់​។​

លោកស្រី Ou Haiyan ប្រធានក្រុមហ៊ុន យូចរ៉ក់ (ខេមបូឌា) អ៊ិនធើប្រាយ បានថ្លែងថា ដើម្បីឆ្លើយតបនូវគ្រោះមហន្តរាយដែលកើតមានឡើង ក្រុមហ៊ុននឹងខិតខំនាំយកឧបករណ៍ទំនើបៗ សម្រាប់បំពាក់តាមអគារខ្ពស់ៗ ស្ថាប័ននានា បើកសាលាបណ្តុះបណ្តាលជំនាញបង្ការ ពន្លត់អគ្គិភ័យ និងសហការជាមួយក្រុមហ៊ុនដែលមានបទពិសោធន៍ ក្នុងការរៀបចំប្រព័ន្ធការពារ និងពន្លត់អគ្គិភ័យ បំណងជួយលើកកំពស់ប្រសិទ្ធភាពការងារបង្ការ ពន្លត់អគ្គិភ័យ ឲ្យមានប្រសិទ្ធភាពខ្ពស់​នៅកម្ពុជា​។​

ជាមួយគ្នានោះ លោកឧត្តមសេនីយ៍ទោ ​នេត វន្ថា ប្រធាននាយកដ្ឋាន បង្ការ ពន្លត់អគ្គិភ័យ នៃអគ្គស្នងការដ្ឋាននគរបាលជាតិ បានឲ្យដឹងថា ការចុះហត្ថលេខានេះ គឺផ្តោតសំខាន់លើការបំពាក់ឧបករណ៍បង្ការ ពន្លត់អគ្គិភ័យ នៅតាមអង្គភាព ស្ថាប័ន ពិសេសអគារខ្ពស់ៗ ​ដោយខាងក្រុមហ៊ុនជាអ្នកទទួលខុសត្រូវ ចំណែកខាងអគ្គស្នងការនគរបាល មានភារកិច្ចត្រួតពិនិត្យការបំពាក់ប្រព័​ន្ធបង្ការ និងពន្កត់អគ្គិភ័យ នៅតាមគោលដៅសំណង់​ដែលបានបំពាក់រួច​។

ឆ្លៀតក្នុងឱកាសនោះ ​លោក នេត វន្ថា បានអំពាវនាវដល់ប្រជាពលរដ្ឋ នៅដើរចូលឆ្នាំចិន វៀតណាមខាងមុខនេះ ត្រូវមានការប្រុងប្រយ័ត្នខ្ពស់ ចំពោះភ្លើងទៀន ធូក ពិសេសការតចរន្តភ្លើងអគ្គសនី ត្រូវមានជំនាញច្បាស់ កុំចេះតែធ្វើតាមការនឹកឃើញ គ្មានលក្ខណៈបច្ចេកទេសគ្រប់គ្រាន់ ខ្សែភ្លើងចាស់ៗនោះ វាអាចនាំមានការឆ្លងដោយប្រការណាមួយ ហើយអាចបង្កជាអគ្គិភ័យបាន៕