(កំពង់ស្ពឺ)៖ ប្រធានក្រុមការងារចុះជួយស្រុកឧដុង្គ លោក លី សុន និងលោក អ៊ុក កោសា អនុប្រធាន នៅថ្ងៃទី១១ ខែកុម្ភៈ ឆ្នាំ២០១៨នេះ អញ្ជើញសម្ពោធដាក់ឲ្យប្រើប្រាស់ជាផ្លូវការ នូវសមិទ្ធផលនានាដែលមានតម្លៃជិត៨ម៉ឺនដុល្លារ នៅវត្តស្រះធុល ក្នុងភូមិស្រះធុល ឃុំយុទ្ធសាមគ្គី។
ក្នុងឱកាសនោះ លោក អ៊ុក កោសា ក៏បានលើកឡើងថា អ្វីដែលបានដាក់សម្ពោធឲ្យប្រើប្រាស់នៅថ្ងៃនេះ គឺកើតចេញពីការស្នើសុំរបស់មេភូមិ មេឃុំនៃគណបក្សប្រជាជន ហើយការស្នើសុំនេះសបញ្ជាក់ថា ពួកគាត់យកចិត្តទុកដាក់ចំពោះប្រជាជន មិនយកលុយមកដាក់ហោប៉ាវខ្លួនឯងចាយនោះទេ។
ឆ្លៀតក្នុងឱកាសនោះដែរ លោកក៏បានបញ្ជាក់ដែរថា បើទោះបីគណបក្សប្រឆាំងត្រូវតុលាការរំលាយទៅហើយក្តី គណបក្សប្រជាជនចង់រស់នៅជាមួយបងប្អូន អតីតបក្សប្រឆាំង ដោយសោមមនស្សរីករាយ ប្រកបដោយការអភិវឌ្ឍន៍ និងដោយសុខសន្តិភាព ក្នុងន័យជាពលរដ្ឋកម្ពុជាតែមួយ។
លោករំលឹកឡើងថា នៅឆ្នាំ១៩៧៧ គ្រាមួយរូបលោកមកដល់វត្តស្រះធុលដែលកំពុងសម្ភោធនេះ លោកមិនភ្លេចទេគឺលោកបានទទួលទានហូបបបរ មួយចានទើបមានជីវិតមកទល់ពេលនេះ ដូច្នេះទើបលោកគោរពដឹងគុណចំពោះ វត្តនេះមិនភ្លេចទេ ហើយលោកនឹងគៀងគរសប្បុរសដើម្បីជួយប្រជាពលរដ្ឋបន្ថែមទៀត ទាំងផ្លូវ សាលារៀន មន្ទីរពេទ្យ ប្រឡាយទឹក ដើម្បីឲ្យជីវភាពកាន់តែប្រសើរ។
លោក លី សុន ប្រធានក្រុមការងារគណបក្សប្រជាជនចុះជួយស្រុកឧដុង្គ ក៏បានបន្ថែមថា ការអភិវឌ្ឍន៍ និងសម្ពោធសមិទ្ធផលនានាថ្ងៃនេះ គឺបានមក ពីការដឹកនាំរបស់គណបក្សប្រជាជន បានមកពីការប្រឹងប្រែងរបស់រាជរដ្ឋាភិបាល ដែលដឹកនាំដោយគណបក្សប្រជាជន ហើយសមិទ្ធផលដ៏ច្រើនស្អេកស្កះ គណនាមិនបាន នេះគឺជាការខិតខំប្រឹងប្រែងដោយមិនខ្លាចនឿយហត់ របស់ក្រុមការងារគណបក្សប្រជាជន ជាពិសេសគឺសប្បុរសជនមានការជឿជាក់ លើកិច្ចការមនុស្សធម៌ដ៏ប្រសើរចំពោះប្រជាពលរដ្ឋស្រុកឧដុង្គនេះតែម្តង។
សមិទ្ធផលដែលត្រូវសម្ពោធនាថ្ងៃនេះរួមមាន បណ្តាល័យ០១ខ្នង, កុដិឈើ០១ខ្នង, កុដិថ្ម០១ខ្នង, បន្ទប់ទឹក០២ខ្នង, អណ្តូងទឹក, ស៊ីទែនទឹក, ម៉ូទ័រមូបទឹក, ក្លោងទ្វាវត្ត, មន្ទីរចូលបច្ច័យ, រោងទទួលភ្ញៀវ និងបំពាក់គ្រឿងសង្ហារឹមផ្សេងៗចំណាយថវិកាសរុប៧៧,៥៥០ដុល្លាអាមេរិច៕
