(ភ្នំពេញ)៖ រំលងបានតែមួយថ្ងៃប៉ុណ្ណោះ ជនសង្ស័យម្នាក់ដែលបានធ្វើសកម្មភាពគាស់ឃ្លាំងចូលលួចខោអាវ យកអស់ចំនួន៣,០០០ខោអាវនោះ ត្រូវបានកម្លាំងនគរបាលនៃអធិការដ្ឋាននគរបាលខណ្ឌសែនសុខ ឃាត់ខ្លួននៅរសៀលថ្ងៃទី១០ ខែកុម្ភៈ ឆ្នាំ២០១៨។
មន្ដ្រីនគរបាលខណ្ឌសែនសុខ បានឲ្យដឹងថា កម្លាំងនគរបាលប៉ុស្តិ៍រដ្ឋបាលភ្នំពេញថ្មី បានធ្វើការឃាត់ខ្លួនជនសង្ស័យម្នាក់ ករណីលួចមានស្ថានទម្ងន់ទោស ដោយគាស់ទម្លុះទម្លាយ (គាស់ឃ្លាំងចូលលួចយកខោអាវ) នៅចំណុចក្នុងឃ្លាំងសិប្បកម្មកាត់ដេរខោអាវ មីងរូយឃាង ផ្លូវលំ ភូមិឧញ្ញាវាំង សង្កាត់ភ្នំពេញថ្មី ខណ្ឌសែនសុខ ដែលជនសង្ស័យ ឈ្មោះ សុត សុភក្តិ អាយុ៣៥ឆ្នាំ មុខរបរមិនពិតប្រាកដ។
បើតាមការបំភ្លឺពីជនរងគ្រោះឈ្មោះ ម៉ូវ លីប៊ួយ ភេទស្រី អាយុ៣២ឆ្នាំ មុខរបរប្រធានរដ្ឋបាលសិប្បកម្មកាត់ដេរខោអាវ «មីង រូយឃាង» ស្នាក់នៅផ្ទះលេខ២០ ផ្លូវលេខ២ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ បានបញ្ជាក់ថា សម្ភារបាត់បង់គឺ ខោអាវសរុបចំនួន៣,០០០សម្រាប់ ហើយនៅកន្លែងកើតហេតុសម្ភារបន្សល់ទុក ខោជើងវែងពណ៌ខ្មៅចំនួន១៦៣៨ខោ, ខោជើងខ្លីពណ៌ខ្មៅចំនួន១២៧ខោ, អាវយឺតដៃខ្លីចំនួន៥០អាវ, អាវយឺតវាលឃ្លៀកចំនួន៥៨០អាវ។
សមត្ថកិច្ចបានឲ្យដែរថា មុនពេលកើតហេតុ ថ្ងៃទី០៩ ខែកុម្ភៈ ឆ្នាំ២០១៨ កម្លាំងប៉ុស្តិ៍រដ្ឋបាលភ្នំពេញថ្មី បានទទួលព័ត៌មានពីកន្លែងកើតថា នៅចំណុចខាងលើ ត្រូវបានចោរធ្វើសកម្មភាពគាស់ឃ្លាំង របស់សិប្បកម្មលួចយកខោ និងអាវអស់មួយចំនួនធំ ក្រោយពីទទួលព័ត៌មានសមត្ថកិច្ចបានចុះដល់ចំណុចកើតហេតុ ធ្វើការត្រួតពិនិត្យ និងស្រាវជ្រាវកំណត់មុខសញ្ញាបាន ឈានទៅធ្វើការឃាត់ខ្លួន ជនសង្ស័យតែម្ដង។
នៅក្នុងផ្ទះរបស់ជនសង្ស័យ រកឃើញវត្ថុតាងខាងលើ រួចកម្លាំងសមត្ថកិច្ចជំនាញ បាននាំខ្លួនជនសង្ស័យមកធ្វើការសាកសួរ នៅអធិការដ្ឋាននគរបាលខណ្ឌសែនសុខ៕
