(ព្រះសីហនុ)៖ នៅវេលាម៉ោង១០៖២០នាទីយប់ ថ្ងៃទី១០ ខែកុម្ភៈ ឆ្នាំ២០១៨ ជនសង្ស័យចំនួន២នាក់ ជិះម៉ូតូ១គ្រឿង ធ្វើសកម្មភាពឆក់កាបូបនារីជនជាតិចិនម្នាក់ ដែលកំពុងដើរតាមផ្លូវ នៅមុខសណ្ឋាគារវិមានខ្សាច់ស ម្តុំអូរឈើទាល សង្កាត់លេខ៤ ក្រុងព្រះសីហនុ តែមិនបានសម្រេចបណ្តាលឲ្យជនរងគ្រោះដួលរងរបួស។
លោកឧត្តមសេនីយ៍ត្រី កុល ផាលី ស្នងការរងទទួលផែនព្រហ្មទណ្ឌ បានឲ្យដឹងថា ក្រោយពេលទទួលបានព័ត៌មាននេះភ្លាម និងមានបញ្ជាពី លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត កម្លាំងនគរបាលព្រហ្មទណ្ឌខេត្ត និងនគរបាលប៉ុស្តិ៍រដ្ឋបាលសង្កាត់លេខ៤សង្កាត់លេខ២ បានសហការគ្នាប្រកាសតាមវិទ្យុទាក់ទង ស្ទាក់ដេញប្រផាប់ប្រភីង ស្ទាក់ចាប់បានជនសង្ស័យ២នាក់ នៅចំណុចផ្លូវកោង កែងតុលាការចាស់ សង្កាត់លេខ៤។
ស្នងការរងរូបនេះបញ្ជាក់ថា ជនសង្ស័យទី១៖ឈ្មោះ នួន ករណាវិសុទ្ធ អាយុ១៦ឆ្នាំ មានទីលំនៅសង្កាត់ក្បាលកោះ ខណ្ឌមានជ័យ រាជធានីភ្នំពេញ និងទី២៖ឈ្មោះ ឃុន ធីចាន់ដារិទ្ធ ហៅចាន់ អាយុ១៦ឆ្នាំ មានទីលំនៅ ខណ្ឌច្បារអំពៅ រាជធានីភ្នំពេញ ក្នុងសមត្ថកិច្ចដកហូតបាន ម៉ូតូ១គ្រឿង ម៉ាកនិច ពណ៌ខ្មៅ ស្លាកលេខភ្នំពេញ1GT-9845 ជាមធ្យោបាយធ្វើសកម្មភាព។
ដោយឡែកស្រ្ដីរងគ្រោះឈ្មោះ REN FANG អាយុ២៨ឆ្នាំ ភ្ញៀវទេសចរ ស្នាក់នៅសណ្ឋាគារ THE PALM PALACE RESORT ក្រុមទី១៤ ភូមិ៤ សង្កាត់៤ ក្រុង-ខេត្តព្រះសីហនុ ពុំមានការបាត់បង់សម្ភារអ្វីឡើយ តែមានរបួសបន្តិចបន្តួច។ ក្រោយឃាត់ខ្លួនជនសង្ស័យទាំង២ ត្រូវបានបញ្ជូនទៅស្នងការដ្ឋាននគរបាលខេត្ត ដើម្បីសាកសួរកសាងសំណុំរឿង តាមនីតិវិធីបញ្ជូនទៅសាលាដំបូងខេត្ត៕
