(ព្រៃវែង)៖ លោក ហ៊ូ សាគុណ ប្រធានក្រុមការងារចុះជួយឃុំអង្គរទ្រេត និងឃុំស្វាយអន្ទរ ស្រុកស្វាយអន្ទរ ខេត្តព្រៃវែង បានស្នើសមាជិក-សមាជិកា នៃគណបក្សប្រជាជនកម្ពុជា ត្រូវប្រកាន់ខ្ជាប់នូវគោលជំហរមុតមាំក្នុងការអនុវត្តលក្ខន្តិកៈ បទបញ្ជាផ្ទៃក្នុង និងកម្មវិធីនយោបាយរបស់គណបក្ស ក៏ដូចជា របស់រាជរដ្ឋាភិបាលឲ្យបានល្អ និងមានប្រសិទ្ធភាពខ្ពស់ ដើម្បីបង្កើនប្រជាប្រិយភាព ក៏ដូចជា ការគាំទ្រគណបក្ស សំដៅរក្សាជ័យជម្នះ នៅក្នុងការបោះឆ្នោតជ្រើសតាំងតំណាងរាស្រ្តនីតិកាលទី៦ ឆ្នាំ២០១៨។
ការថ្លែងអំពាវនាវដល់សមាជិកសមាជិកខាងលើនេះ បានធ្វើឡើងនៅថ្ងៃទី១០ ខែកុម្ភៈ ឆ្នំា២០១៨ ខណៈដែលលោក និងលោក ប៉ិច សុង អភិបាលស្រុកស្វាយអន្ទរ បានអញ្ជើញជាគណៈអធិបតី ក្នុងពិធីផ្សព្វផ្សាយឯកសារមហាសន្និបាតវិសាមញ្ញតំណាងទូទាំងប្រទេស របស់គណបក្សប្រជាជនកម្ពុជា នៅស្នាក់ការបក្សឃុំអង្គរទ្រេត ស្រុកស្វាយអន្ទរ រួមជាមួយគណៈកម្មាធិការបក្សឃុំ សាខាបក្សភូមិ ប្រជាការពារនិវត្តន៍ជនសរុបចំនួន២៥០នាក់។
បន្ទាប់ពីលោក កុល ទិត្យ ប្រធានក្រុមប្រឹក្សាឃុំអង្គទ្រេតអានរបាយការណ៍ស្វាគមន៍រួចមក លោក ឡាច យឺន អនុប្រធានក្រុមការងារចុះជួយឃុំ បានឡើងអានសុន្ទរកថា ផ្សព្វផ្សាយឯកសារមហាសន្និបាតតំណាងទូទាំងប្រទេសរបស់គណបក្សប្រជាជនកម្ពុជា និងលោក ប៉ិច សុង អភិបាលស្រុកស្វាយអន្ទរអានកម្មវិធីនយោបាយសម្រាប់អនុវត្តឆ្នាំ២០១៨-២០២៣ លោក ហ៊ូ សាគុណ បានអញ្ជើញមានមតិសំណេះសំណាល និងពាំនាំនូវការសាកសួរសុខទុក្ខពីលោក នេត សាវឿន ប្រធានក្រុមការងារចុះជួយស្រុកស្វាយអន្ទរ និងស្រុកកញ្រ្ជៀច ដល់សមាជិកសមាជិកាផងដែរ។
ជាចុងបញ្ចប់នៃអង្គពិធីលោក ហ៊ូ សាគុណ បានថ្លែងអំណរគុណដល់សមាជិក-សមាជិកាបក្សទាំងអស់ ដែលជានិច្ចកាលតែងស្មោះស្ម័គ្រជាមួយគណបក្សប្រជាជនកម្ពុជា និងបានយកចិត្តទុកដាក់អស់ពីកម្លាំងកាយចិត្ត ក្នុងការតស៊ូដណ្តើមយកជ័យជម្នះជូនគណបក្សនៅគ្រប់សមរភូមិបោះឆ្នោត និងជាពិសេសបានរួមចំណែកជាមួយរាជរដ្ឋាភិបាល ក្នុងការលើកកម្ពស់ជីវភាពរស់នៅរបស់ប្រជាជន និងការអភិវឌ្ឍមូលដ្ឋាន៕
