(ភ្នំពេញ)៖ ក្រុមហ៊ុនជីប ម៉ុង អ៊ីនដាស្ទ្រីស៍ បានចាប់ផ្តើមដំឡើងរោងចក្រទុយោទឹក ដោយប្រើប្រាស់គ្រឿងម៉ាស៊ីនទំនើបចុងក្រោយពីប្រទេសអ៊ីតាលី នៅដើមខែកុម្ភៈ ឆ្នាំ២០១៨នេះ។
រោងចក្រនេះ នឹងក្លាយជារោងចក្រទុយោទឹកទី១នៅប្រទេសកម្ពុជា ដែលបានប្រើប្រាស់បច្ចេកវិទ្យាទំនើបចុងក្រោយពីអឺរ៉ុប។
រោងចក្រទុយោទឹករបស់ជីប ម៉ុង មានទីតាំងស្ថិតតាមបណ្តោយផ្លូវជាតិលេខ២ ភូមិកណ្តាល ឃុំរលួស ស្រុកកណ្តាលស្ទឹង ខេត្តកណ្តាល។
តំណាងក្រុមហ៊ុន ជីប ម៉ុង អ៊ីដាស្ទ្រីស៍ បានឲ្យដឹងថា តាមរយៈបច្ចេកវិទ្យាដ៏ទំនើប និងគ្រឿងផ្សំដ៏ល្អឥតខ្ចោះ រោងចក្រទុយោទឹកនេះ នឹងមានលទ្ធភាពផលិតទុយោទឹក ដែលមានគុណភាពខ្ពស់ សម្រាប់ផ្គត់ផ្គង់ក្នុងទីផ្សារកម្ពុជា ដែលទុយោទឹកភាគច្រើនក្នុងទីផ្សារបច្ចុប្បន្ន ត្រូវបាននាំចូលពីបរទេស។
ក្រៅពីរោងចក្រទុយោទឹកនេះ ក្រុមហ៊ុន ជីប ម៉ុង អ៊ីនដាស្ទ្រីស៍ បច្ចុប្បន្នក៏មានរោងចក្របេតុងលាយស្រេច ដែលទទួលបានវិញ្ញាបនបត្រISO បញ្ជាក់ពីប្រព័ន្ធគ្រប់គ្រងគុណភាព និងរោងចក្រក្បឿងបេតុង ដែលប្រើប្រាស់បច្ចេកវិទ្យាទំនើបចុងក្រោយពីអ៊ីតាលី និងមានសមត្ថភាពផលិតក្បឿងបាន១៤០សន្លឹកក្នុងមួយនាទី៕
