(ព្រះសីហនុ)៖ កម្លាំងកងរាជអាវុធហត្ថខេត្តព្រះសីហនុ បានឃាត់ខ្លួនជនសង្ស័យ២នាក់ ពាក់ព័ន្ធករណីគ្រឿងញៀននៅចំណុចផែរ៉ូយ៉ាល់ ស្ថិតក្រុម១៤ ភូមិ០៤ សង្កាត់៤ ក្រុងព្រះសីហនុ ដោយដកហូតបានថ្នាំញៀន និងវត្ថុតាងមួយចំនួន។
មេបញ្ជាការអាវុធហត្ថខេត្តព្រះសីហនុ លោកឧត្តមសេនីយ៍ត្រី ហេង ប៊ុនទី បានឲ្យដឹងនៅព្រឹកថ្ងៃទី០៧ ខែកុម្ភៈ ឆ្នាំ២០១៨នេះថា ប្រតិបត្តិការនេះត្រូវបានធ្វើឡើងនៅថ្ងៃទី០៦ ខែកុម្ភៈ ម្សិលមិញ ដែលដឹកនាំដោយលោកវរសេនីយ៍ត្រី ឡុង គឹមហួរ នាយការិយាល័យបទល្មើស។
បើតាមលោកមេបញ្ជាការ ជនសង្ស័យទាំង២នាក់នេះឈ្មោះ ឡៅ ហាក់ អាយុ៣២ឆ្នាំ មានទីលំនៅឃុំត្រពាំងអង្កែរ ស្រុកទឹកឈូ ខេត្តកំពត និងឈ្មោះ ម៉ែល ចំប៉ី (ហៅអាពៅ) ភេទស្រី អាយុ៣២ឆ្នាំ មានស្រុកកំណើតឃុំត្រពាំងអង្កែរ ស្រុកស្អាង ខេត្តកណ្តាល ដោយដកហូតវត្ថុតាង ថ្នាំញៀនប្រភេទម្សៅសថ្លា ០៦កញ្ចប់, ទូរស័ព្ទដៃ០១គ្រឿង និងម៉ូតូ០១គ្រឿង។
ក្រោយឃាត់ខ្លួនជនសង្ស័យ និងវត្ថុតាងត្រូវបានកម្លាំងការិយាជំនាញ កំពុងកសាងសំណុំរឿង ដើម្បីបញ្ជូនទៅចាត់ការតាមនីតិវិធី៕
