(កំពង់ចាម)៖ កម្លាំងការិយាល័យប្រឆាំងគ្រឿងញៀន សហការជាមួយកម្លាំងនគរបាលជំនាញអធិការដ្ឋាននគរបាលស្រុកជើងព្រៃ នៃស្នងការដ្ឋាននគរបាលខេត្តកំពង់ចាម នៅថ្ងៃទី០៦ ខែកុម្ភៈ ឆ្នាំ២០១៨នេះ បានឃាត់ខ្លួនជនសង្ស័យ៥នាក់ និងដកហូតបានថ្នាំញៀនជិត៥០កញ្ចប់។
ស្នងការនគរបាលខេត្តកំពង់ចាម លោកឧត្តមសេនីយ៍ត្រី ឯម កុសល បានប្រាប់ឲ្យដឹងថា ការបង្ក្រាបនេះត្រូវបានឡើង ក្នុងភូមិឈើទាល ឃុំផ្តៅជុំ ស្រុកជើងព្រៃ ដែលដឹកនាំដោយលោកវរសេនីយ៍ត្រី ជីវ សេងរស់ នាយរងការិយាល័យប្រឆាំងគ្រឿងញៀន បើកកិច្ចប្រតិបត្តិការបង្ក្រាបករណី ជួញដូរដោយខុសច្បាប់នូវសារធាតុញៀន ដោយប្រើវិធានញុះញង់។
លោកស្នងការបានបញ្ជាក់ថា ជនសង្ស័យទាំង៥នាក់ ដែលត្រូវបានឃាត់ខ្លួនទី១៖ ឈ្មោះ រី មាស អាយុ៣៥ឆ្នាំ, ទី២៖ ឈ្មោះ ជា ឧត្តម អាយុ២៨ឆ្នាំ, ទី៣៖ ឈ្មោះ ម៉ើ ម៉ាក អាយុ១៨ឆ្នាំ, ទី៤៖ ឈ្មោះ ឡាន សុខឡាត់ អាយុ១៩ឆ្នាំ និងទី៥៖ ឈ្មោះ ឌន ឌុន អាយុ២១ឆ្នាំ ដកហូតបាន ម្សៅក្រាមពណ៌ស៤៦កញ្ចប់តូច ទូរស័ព្ទដៃ០៣គ្រឿង និងម៉ូត០២គ្រឿង។
ក្រោយឃាត់ខ្លួនជនសង្ស័យខាងលើ ត្រូវបានបញ្ជូនទៅការិយាល័យជំនាញ ដើម្បីកសាងសំណុំរឿងចាត់ការតាមនីតិវិធី៕
