(កំពង់ចាម)៖ អ្នកធ្វើដំណើរជាច្រើននាក់ ក្នុងនោះមានពលរដ្ឋខ្មែរ និងបរទេសផងនោះ ខណៈកំពុងជិះលើរថយន្តក្រុងមួយគ្រឿង បានភ័យស្លន់ស្លោរដោយសារតែមានអ្នកដំណើរម្នាក់ ដែលឈ្លោះជាមួយប្រពន្ធ ស្រាប់តែស្ទុះរត់ទៅទាញបួងចង្កូតរថយន្ត ដែលកំពុងបើកបរនៅលើផ្លូវជាតិលេខ៦ ត្រង់ចំណុចគីឡូលេខ៧០ ក្នុងភូមិរវៀង ឃុំខ្នុរដំបង ស្រុកជើងព្រៃ នៅថ្ងៃទី៥ ខែកុម្ភៈ ឆ្នាំ២០១៨។ អ្នកបង្កនោះ ត្រូវបានបញ្ជូនទៅស្នងការដ្ឋាននគរបាលខេត្ត ដើម្បីចាត់វិធានការតាមច្បាប់ហើយ ប៉ុន្តែរូបគេត្រូវបានអ្នកជិះលើរថយន្តក្រុងព្រួតវាយស្ទើស្លាប់ផងដែរ។
លោកវរសេនីយ៍ឯក ប្រាក់ សុគុណ អធិការនគរបាលស្រុកជើងព្រៃ ប្រាប់ឲ្យដឹងថា រថយន្តក្រុងដឹកអ្នកដំណើរ ម៉ាកហ៊ីយ៉ានដាយ១គ្រឿង ពាក់ស្លាកលេខ ភ្នំពេញ 3A-1863 បើកបរដោយឈ្មោះ ភុំ ណាក់ ភេទប្រុស អាយុ២៥ឆ្នាំ នៅភូមិចុងដូង ឃុំចុងដូង ស្រុកបារាយរណ៍ ខេត្តកំពង់ធំ កាលពីព្រឹកថ្ងៃទី០៥ ខែកុម្ភៈ បានដឹកអ្នកដំណើរខ្មែរ និងបរទេសពេញរថយន្ត ចេញពីរាជធានីភ្នំពេញដើម្បីឆ្ពោះទៅកាន់ទឹកដីអង្គរខេត្តសៀមរាប។
អធិការនគរបាលស្រុកជើងព្រៃ ប្រាប់បន្តថា ស្របពេលវេលាម៉ោង៩៖៣០នាទីព្រឹក មកដល់ត្រង់ចំណុចភូមិរវៀង ឃុំខ្នុរដំបង ស្រុកជើងព្រៃ នោះស្រាប់តែ អ្នកដំណើរម្នាក់ឈ្មោះ សំ សុជាន ភេទប្រុស អាយុ៣០ឆ្នាំ រស់នៅភូមិគោកចាន់ ឃុំតាសោម ស្រុកអង្គជុំ ខេត្តសៀមរាប ខណៈឈ្លោះជាមួយប្រពន្ធឈ្មោះ តឹប នីន អាយុ២៩ឆ្នាំ ក៏ស្ទុះទៅចាប់ទាញចង្កូតរថយន្តក្រុង ដែលកំពុងបើកបរតាមផ្លូវជាហេតុធ្វើឲ្យរថយន្តវេចុះឡើងៗ និងបានឡើងលើសួនច្បារដាំលំអរផ្លូវ។ ពេលនោះអ្នកដំណើរលើរថយន្តក្រុង មានបរទេស និងខ្មែរ នាំគ្នាភ័យទាំងព្រលឹងនៅចុងសក់ ដោយហេតុតែខឹងពេកអ្នកធ្វើដំណើរនាំគ្នាវាយដំលើរាងកាយជនបង្ក ដែលបំរុងឲ្យមនុស្សមួយរថយន្ត ត្រូវរងគ្រោះថ្នាក់ទាំងអស់គ្នា និងបានបញ្ជូនទៅកាន់អធិការដ្ឋាននគរបាលស្រុកជើងព្រៃ សួរនាំចោទប្រកាន់ពីបទបំផ្លិចបំផ្លាញទ្រព្យសម្បត្តិអ្នកដ៏ទៃ ហើយតាមតាមរយៈការធ្វើតេស្តទឹកនោម រកឃើញមានសារធាតុញៀនផងដែរ។
លោកឧត្តមសេនីយ៍ត្រី សោម រស់ ស្នងការរងនគរបាលទទួលផែនសណ្តាប់ធ្នាប់ បានប្រាប់ឲ្យដឹងដែរថា តាមគោលការណ៍ជនបង្កខាងលើនោះ នឹងត្រូវបញ្ជូនទៅសាលាដំបូងខេត្ត នឹងអាចដាក់ពន្ធនាគារខេត្តដើម្បីឲ្យរាងចាលកុំឲ្យថ្ងៃក្រោយ ធ្វើសកម្មភាពបែបនេះបន្តទៀត៕
