(មណ្ឌលគិរី)៖ ជនល្មើសទាំង៦នាក់ ពាក់ព័ន្ធការបាញ់សម្លាប់មនុស្ស៣នាក់ នៅស្រុកអូររាំង ខេត្តមណ្ឌលគិរី ត្រូវបញ្ចប់ការសួរនាំសម្រាប់ថ្ងៃនេះ នាល្ងាចថ្ងៃទី០៤ ខែកុម្ភៈ ឆ្នាំ២០១៨នេះ ដោយស្អែកទើបសួរនាំបន្ដទៀត។ នេះបើតាមព្រះរាជអាជ្ញារងខេត្តមណ្ឌលគិរី ថ្លែងប្រាប់ភ្នាក់ងារ Fresh News នៅមុននេះបន្ដិច។

ព្រះរាជអាជ្ញារងខេត្តមណ្ឌលគិរី លោក ម៉ម វ៉ាន់ដា បានថ្លែងថា ដោយសារតែការបញ្ជូនមកដល់តុលាការ មានពេលវេលាខ្លីពេកទើបការសួរនាំមិនទាន់បានបញ្ចប់ជាស្ថាពរ ប៉ុន្ដែស្អែកនេះជនល្មើសទាំង៦នេះ នឹងត្រូវសួរនាំបន្ថែមទៀត ដោយពេលនេះត្រូវបានបញ្ជូនទៅរក្សាទុក្ខ នៅកន្លែងមានសុវត្ថិភាព។

សូមជម្រាបថា ជនល្មើសទាំង៦នាក់ រួមមានជនដៃដល់ឈ្មោះ ផល ពេញ ជានាយនគរបាលប៉ុស្តិ៍អូររលែ រហូតមកដល់ម៉ោងជាង២៖១០នាទីរសៀលថ្ងៃទី៤ ខែកុម្ភៈ ឆ្នាំ២០១៨នេះ បានបញ្ជូនទៅកាន់តុលាការដើម្បីកាត់ទោសតាមផ្លូវច្បាប់ បន្ទាប់ពីបានសាកសួរនាំនៅទីបញ្ជាការដ្ឋានអាវុធហត្ថខេត្តមណ្ឌលគីរី។

​បើតាមសេចក្តីរាយការណ៍បានឲ្យដឹងថា នៅតាមដងផ្លូវដែលបញ្ជូនជនសង្ស័យទាំង៦នាក់ ពីទីបញ្ជាការដ្ឋានអាវុធហត្ថខេត្ត ទៅកាន់អយ្យការអមសាលាតុលាការខេត្តមណ្ឌលគីរី មានការយាមកាមយ៉ាងតឹងរ៉ឹង ដើម្បីសុវត្ថិភាពពេលបញ្ជូនជនសង្ស័យទៅកាន់តុលាការ។

សូមបញ្ជាក់ថា ជនដៃដល់ និងជនពាក់ព័ន្ធក្នុងរឿងឃាតកម្មបាញ់សម្លាប់មនុស្សនេះកើនឡើងរហូតដល់៦នាក់ រួមមាន៖

ទី១៖ ​ឈ្មោះ ផល ពេញ ជានាយនគរបាលប៉ុស្ដិ៍អូររលែ នៃវរការពារព្រំដែនលេខ៦២១ ស្នងការដ្ឋាននគរបាលខេត្តមណ្ឌលគិរី ត្រូវបានចាប់ខ្លួននៅព្រឹកថ្ងៃ ទី០២ ខែកុម្ភៈ ស្ថិតនៅហាងគុយទាវមួយកន្លែង ក្នុងស្រុកមេមត់ ខេត្តត្បូងឃ្មុំ គឺជាអ្នកបាញ់ផ្ទាល់ទៅលើជនរងគ្រោះទាំង៣នាក់
ទី២៖ ឈ្មោះ កើត វេហា ហៅឆៃ ជាទាហានការពារព្រំដែន ត្រូវបានចាប់ខ្លួនកាលពីយប់ថ្ងៃទី៣១ ខែមករា ជាជនពាក់ព័ន្ធ
ទី៣៖ ឈ្មោះ កើត វេតា ជាទាហានការពារព្រំដែន
ទី៤៖ ឈ្មោះ ឡាយ សាវី ជាទាហានការពារព្រំដែន
ទី៥៖ ឈ្មោះ ទន់ ធារ៉ា ជាមន្ដ្រីនគរបាលប៉ុស្ដិ៍អូររលែ ដែលអ្នកទាំង៣នេះ ត្រូវបានចាប់ខ្លួននៅយប់ថ្ងៃទី០១ ខែកុម្ភៈ
ទី៦៖ ឈ្មោះ ឈាង វ៉ាន់និត ប្អូនថ្លៃ ផល ពេញ ត្រូវបានចាប់ខ្លួននៅរសៀលថ្ងៃទី២ ខែកុម្ភៈ ឆ្នាំ២០១៨។

ដោយឡែកជនរងគ្រោះទាំង៣នាក់ រួមមាន៖ មន្ដ្រីអាវុធហត្ថលើផ្ទៃប្រទេសម្នាក់ឈ្មោះ សេក វឌ្ឍនា, មន្ដ្រីឧទ្យានុរក្ស នៃមន្ទីរបរិស្ថានខេត្តមណ្ឌលគិរី ឈ្មោះ តើន សុខណៃ និងបុគ្គលិកអង្គការសមាគម អភិរក្សាសត្វព្រៃ Wildlife Conservation Society (WCS) ឈ្មោះ ថុល ខ្នា ដែលការបាញ់ប្រហារនេះផ្តើមចេញពីបទល្មើសព្រៃឈើ។

សូមបញ្ជាក់ថា ការបាញ់ប្រហារនេះបានកើតឡើងនៅចំណុចប៉ុស្ដិ៍អូររលែ ក្នុងភូមិសាស្ដ្រភូមិ​ពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី នៅចន្លោះម៉ោង៤ ទៅម៉ោង៥ល្ងាចថ្ងៃទី៣០ ខែមករា ឆ្នាំ២០១៨ បានបណ្ដាលឲ្យស្លាប់មនុស្ស៣នាក់៕