(ភ្នំពេញ)៖ លោកបណ្ឌិត គីម ហ៊ាង ប្រធានសមាគមអ្នកវាយតម្លៃអចលនវត្ថុកម្ពុជា បានលើកឡើងថា ការបង្កើតអ្វីមួយឲ្យចេញជារូបរាង មានគ្រឹះរឹងមាំ និងមានគោលដៅច្បាស់លាស់ ច្បាស់ណាសថា នឹងត្រូវមានការចូលរួមចំណែករវាងគ្នា និងគ្នា។ ជាក់ស្ដែងដូចជាការបង្កើតសាលាបង្រៀនវិស័យដីធ្លីនៅកម្ពុជាដូចច្នេះដែរ កាលណាមានការគាំទ្រពីសំណាក់សមាជិកសមាគម វាជាគ្រឹះមួយដ៏រឹងមាំ ក្នុងការធ្វើឲ្យសាលាមួយនេះ បន្ដដំណើរទៅមុន និងទទួលបានភាពជោគជ័យ។
ការលើកឡើងបែបនេះ របស់ប្រធានសមាគមធ្វើឡើង នាឱកាសដែលលោកអញ្ជើញចូលរួម សន្និតបាតប្រចាំឆ្នាំ២០១៧ របស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា នារសៀលថ្ងៃទី០៣ ខែកុម្ភៈ ឆ្នាំ២០១៨ ក្រោមការចូលរួមជាអធិបតីភាពរបស់លោកស្រី អុយ ចាន់និមល ជាអនុប្រធាននាយកដ្ឋានគ្រប់គ្រងអាជីវកម្មអចលនវត្ថុ។
លោកបណ្ឌិត គីម ហ៊ាង បានថ្លែងថា «មូលហេតុដែលសមាគមអ្នកវាយតម្លៃអចលនវត្ថុ ព្យាយាមបើកសាលាបណ្ដុះបណ្ដាលវិជ្ជាជីវៈវិស័យដីធ្លីអស់រយៈពេល១០ឆ្នាំកន្លងទៅ តែនៅតែបើកមិនចេញបណ្ដាលមកពី ពេលដែលប្រធានសមាគមបើកជាលក្ខណៈសមាគម មិនអាចដំណើរការបានតែបើបើក ជាលក្ខណៈឯកជនវិញបែរជាមិនមានក្រុមហ៊ុនផ្សេងៗបញ្ជូនបុគ្គលិកមករៀន...អ្នកណាក៏ដោយដែលបើកសាលាបង្រៀនវិស័យដីធ្លីជាឯកជន ច្បាស់ណាស់ថាមិនមានសិស្សទៅរៀននោះឡើយ។ វិធីសាស្រ្ដតែមួយប៉ុណ្ណោះ ដែលធ្វើឲ្យការបើកសាលាបង្រៀនវិស័យដីធ្លីនេះ ដំណើរការបាន គឺត្រូវបើកសាលានេះ ជាកម្មសិទ្ធិរបស់សមាគម»។
លោកបន្ដទៀតថា បច្ចុប្បន្ននេះក្រុមហ៊ុនដីធ្លីមានចំនួន១៥០ក្រុមហ៊ុន ហើយអ្នកដែលធ្វើការក្នុងវិស័យនេះ មានរាប់ពាន់រាប់ម៉ឺននាក់ តែមិនមានសាលាសម្រាប់បង្រៀននោះឡើយ ប៉ុន្ដែបើបង្កើតសាលាដីធ្លីជារបស់សមាគម លុយដែលបានមកសមាគមយក លុយដែលចំណេញ សមាគមទុកនោះ ក្រុមហ៊ុនទាំងអស់នឹងបញ្ជូនបុគ្គលិកឲ្យទៅសិក្សាជាក់ជាពុំខាន។ ផ្ទុយទៅវិញប្រសិនបើមានបុគ្គលណា បើកសាលាដីធ្លី ជាលក្ខណៈផ្ទាល់ខ្លួន គាត់ច្បាស់ជាមើលឃើញថា មានតម្រូវការច្រើន មានអ្នកចង់រៀនច្រើនចេះច្រើន តែបើកជាលក្ខណៈផ្ទាល់ខ្លួននេះ គឺក្រុមហ៊ុនផ្សេងៗពិបាកនឹងបញ្ជូនបុគ្គលិកគេទៅរៀនណាស់ ព្រោះនេះជាកត្តាចិត្តសាស្រ្ដមួយ ដែលមានភាពវិជ្ជមាន ទៅលើសមាគមច្រើនជាងឯកជន មានន័យថាបើសមាគមបើនឹងដើរ។
លោកបានបញ្ជាក់ទៀតថា «បច្ចុប្បន្ននេះក្នុងចំណោមសមាជិកចំនួន១០០ក្រុមហ៊ុន មានត្រឹមតែ១៧ក្រុមហ៊ុនប៉ុណ្ណោះដែលបានឯកភាព ស្ម័គ្រចិត្តចូលរួម ដូច្នេះខ្ញុំគិតថា នេះជាចំនួនមួយដែលមិនទាន់គ្រប់គ្រាន់នៅឡើយ កាលណាមានសមាជិកគាំទ្រចាប់ពី៤០ក្រុមហ៊ុនឡើងទៅ នោះការបើកសាលាបណ្ដុះបណ្ដាលមួយនេះនឹងដើរ ដូចយើងគិតមើលចុះថា១០០ក្រុមហ៊ុនមានតែ១៧ដែលចូលរួម ឃើញថាសំឡេងនេះពិត
ជាតិចតួចខ្លាំងមែនទែន»។
លោកបញ្ជាក់បន្ថែមថា ការបើកសាលាបង្រៀនវិស័យដីធ្លី មិនមានមែនត្រូវការលុយច្រើន ហើយក៏មិនមានតម្រូវការធ្ងន់ធ្ងរនោះឡើយ អ្វីដែលត្រូវការគឺការគាំទ្រ បើមាន៤០ក្រុមហ៊ុនគាំទ្រ មានន័យថាក្រុមហ៊ុនទាំងឡាយនឹងបញ្ជូនបុគ្គលិកពួកគាត់ឲ្យមករៀនជាពុំខាន ដូច្នេះសាលានឹងដើរដោយខ្លួនឯង។
លោកស្រី អុយ ចាន់និមល បានឲ្យដឹងទាក់ទងនឹងការចង់បង្កើត សាលារបស់សមាគមអ្នកវាយតម្លៃអចលនវត្ថុថ្ងៃនេះ ក្រសួងក៏បានកំពុងរៀបចំសេចក្ដីព្រាងច្បាប់មួយ ឈ្មោះថាសេចក្ដីព្រាងច្បាប់ស្ដីពីការ គ្រប់គ្រងអាជីវកម្មផ្ដល់សេវាកម្មវាយតម្លៃ និងសេវាកម្មអចលនវត្ថុ ក្នុងនោះក៏មានបទបញ្ញាតិមួយ ចែងពីការគ្រប់គ្រងគ្រឹះស្ថានបណ្ដុបណ្ដាលនានា ក្នុងវិស័យអចលនវត្ថុ៕
