(មណ្ឌលគិរី)៖ ជនល្មើសទាំង៦នាក់ ដែលមានឈ្មោះ ផល ពេញ នាយនគរបាលប៉ុស្តិ៍អូររលែ ជាជនដៃដល់នោះ រហូតមកដល់ល្ងាចថ្ងៃទី៣ ខែកុម្ភៈ ឆ្នាំ២០១៨នេះ បាននិងកំពុងស្ថិតក្រោមការសួរនាំ នៅទីបញ្ជាការដ្ឋានអាវុធហត្ថខេត្តមណ្ឌលគិរីនៅឡើយ មុនពេលបញ្ជូនទៅកាន់តុលាការ ដើម្បីចាត់បន្តតាមនីតិវិធីច្បាប់។ នេះបើយោងតាមមន្រ្តីអាវុធហត្ថជាន់ខ្ពស់ ខេត្តមណ្ឌលគិរី បានថ្លែងប្រាប់ភ្នាក់ងារព័ត៌មាន Fresh News នៅល្ងាចថ្ងៃនេះ។

បើតាមមន្រ្តីអាវុធហត្ថរូបនេះ ជនដៃដល់ ផល ពេញ ត្រូវបានសមត្ថកិច្ចនាំខ្លួនពីក្រសួងមហាផ្ទៃ មកដល់ខេត្តនៅល្ងាចថ្ងៃនេះ ដូច្នេះបូកជាមួយជនជាប់ព័ន្ធ៥នាក់ទៀត កំពុងស្ថិតនៅទីបញ្ជាការដ្ឋានអាវុធ ហត្ថខេត្ត ធ្វើការសួរនាំបន្ត ក្តាប់យកចម្លើយពីពួកគេម្នាក់ៗ ដើម្បីដាក់សំណុំឯកសារបញ្ជូនទៅកាន់តុលាការកាត់ទោសតាមច្បាប់។

សូមបញ្ជាក់ថា ជនដៃដល់ និងជនពាក់ព័ន្ធក្នុងរឿងឃាតកម្មបាញ់សម្លាប់មនុស្សនេះកើនឡើងរហូតដល់៦នាក់ រួមមាន៖
ទី១៖ ​ឈ្មោះ ផល ពេញ ជានាយនគរបាលប៉ុស្ដិ៍អូររលែ នៃវរការពារព្រំដែនលេខ៦២១ ស្នងការដ្ឋាននគរបាលខេត្តមណ្ឌលគិរី ត្រូវបានចាប់ខ្លួននៅព្រឹកថ្ងៃ ទី០២ ខែកុម្ភៈ ស្ថិតនៅហាងគុយទាវមួយកន្លែង ក្នុងស្រុកមេមត់ ខេត្តត្បូងឃ្មុំ គឺជាអ្នកបាញ់ផ្ទាល់ទៅលើជនរងគ្រោះទាំង៣នាក់
ទី២៖ ឈ្មោះ កើត វេហា ហៅឆៃ ជាទាហានការពារព្រំដែន ត្រូវបានចាប់ខ្លួនកាលពីយប់ថ្ងៃទី៣១ ខែមករា ជាជនពាក់ព័ន្ធ
ទី៣៖ ឈ្មោះ កើត វេតា ជាទាហានការពារព្រំដែន
ទី៤៖ ឈ្មោះ ឡាយ សាវី ជាទាហានការពារព្រំដែន
ទី៥៖ឈ្មោះ ទន់ ធារ៉ា ជាមន្ដ្រីនគរបាលប៉ុស្ដិ៍អូររលែ ដែលអ្នកទាំង៣នេះ ត្រូវបានចាប់ខ្លួននៅយប់ថ្ងៃទី០១ ខែកុម្ភៈ
ទី៦ឈ្មោះ ឈាង វ៉ាន់និត ប្អូនថ្លៃ ផល ពេញ ត្រូវបានចាប់ខ្លួននៅរសៀលថ្ងៃទី២ ខែកុម្ភៈ ឆ្នាំ២០១៨។

ដោយឡែក ជនរងគ្រោះទាំង៣នាក់ រួមមាន៖ មន្ដ្រីអាវុធហត្ថលើផ្ទៃប្រទេសម្នាក់ឈ្មោះ សេក វឌ្ឍនា, មន្ដ្រីឧទ្យានុរក្ស នៃមន្ទីរបរិស្ថានខេត្តមណ្ឌលគិរី ឈ្មោះ តើន សុខណៃ និងបុគ្គលិកអង្គការសមាគម អភិរក្សាសត្វព្រៃ Wildlife Conservation Society (WCS) ឈ្មោះ ថុល ខ្នា ដែលការបាញ់ប្រហារនេះផ្តើមចេញពីបទល្មើសព្រៃឈើ។

សូមបញ្ជាក់ថា ការបាញ់ប្រហារនេះ បានកើតឡើងនៅចំណុចប៉ុស្ដិ៍អូររលែ ក្នុងភូមិសាស្ដ្រភូមិ​ពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី នៅចន្លោះម៉ោង៤ ទៅម៉ោង៥ល្ងាចថ្ងៃទី៣០ ខែមករា ឆ្នាំ២០១៨ បានបណ្ដាលឲ្យស្លាប់មនុស្ស៣នាក់៕