(ភ្នំពេញ)៖ សម្តេច ហេង សំរិន ប្រធានសភាកម្ពុជា រៀបរាប់ប្រាប់ លោក ផនពេជ្រ វិចិតឆុលឆ័យ (Pornpetch Wichitcholchai) ប្រធានសភានីតិប្បញ្ញត្តិថៃ អំពីឧបាយកលប៉ុនប៉ងផ្តួលរំលំរាជរដ្ឋាភិបាលស្របច្បាប់ តាមរយៈការបំផុសធ្វើបដិវត្តន៍ពណ៌ របស់អតីតគណបក្សប្រឆាំងនៅកម្ពុជា។ សម្តេចបានបញ្ជាក់ទៅកាន់ប្រធានសភាថៃថា ស្ថានភាពនយោបាយកម្ពុជាកាន់តែល្អប្រសើរ ក្រោយរំលាយគណបក្សសង្រ្គោះជាតិ។
ក្នុងជំនួបជាមួយលោក ផនពេជ្រ វិចិតឆុលឆ័យ នៅវិមានរដ្ឋសភាថៃ នាថ្ងៃទី០១ ខែកុម្ភៈ ឆ្នាំ២០១៨ ម្សិលមិញនេះ សម្តេច ហេង សំរិន បានពន្យល់លោកផនពេជ្រ វិចិតឆុលឆ័យ ឱ្យដឹងថា សភាពការណ៍នយោបាយនៅកម្ពុជាបច្ចុប្បន្ន មានលក្ខណៈកាន់តែល្អប្រសើរ បន្ទាប់ពីរាជរដ្ឋាភិបាលកម្ពុជា បានទប់ស្កាត់ទាន់ពេលវេលានូវឧបាយកលប៉ុនប៉ងផ្តួលរំលំរាជរដ្ឋាភិបាលស្របច្បាប់ តាមរយៈការបំផុសធ្វើបដិវត្តន៍ពណ៌របស់បក្សប្រឆាំង ដោយមានការជួយជ្រោមជ្រែងពីខាងក្រៅ។
សម្តេចបានបន្ថែមទៀតថា កន្លងមកបក្សនេះតែងតែបំពាន ញុះញង់ បង្កឲ្យមានអស្ថិរភាព អសន្តិសុខ រំលោភបំពានច្បាប់ រដ្ឋធម្មនុញ្ញ ដែលបង្ខំឲ្យតុលាការកំពូលចាត់ការតាមនីតិវិធីច្បាប់រំលាយគណបក្សនេះ និងហាមឃាត់សិទ្ធិធ្វើនយោបាយរយៈពេល៥ឆ្នាំ ហើយប្រធានបក្សប្រឆាំង ត្រូវបានចាប់ខ្លួន ពីបទធ្វើសន្ទិដ្ឋិភាពជាមួយបរទេស ដែលជាបទល្មើសក្បត់ជាតិ។
សម្តេចប្រធានរដ្ឋសភា បានគូសបញ្ជាក់ទៀតថា កម្ពុជាខិតខំរក្សាបាននូវសុខសន្តិភាព ស្ថិរភាព នយោបាយ និងស្ថិរភាពម៉ាក្រូសេដ្ឋកិច្ច រយៈពេលវែង ព្រមទាំងធ្វើកិច្ចសហការល្អជាមួយបណ្តាប្រទេស ក្នុងតំបន់ និងសកលលោក ដើម្បីធ្វើការអភិវឌ្ឍប្រទេសជាតិ ឲ្យកាន់តែថ្កុំថ្កើងឡើង។
លោក ផនពេជ្រ វិចិតឆុលឆ័យ បានបានទ្រចំពោះការលើកឡើងរបស់សម្តេច ពីវិធានការរបស់រាជរដ្ឋាភិបាលកម្ពុជា ក្នុងការរក្សាសុខសន្តិភាព ស្ថិរភាពនយោបាយនៅក្នុងប្រទេស។ ប្រធានសភានីតិប្បញ្ញត្តិ របស់ប្រទេសថៃ បានមានប្រសាសន៍ថា ជាធម្មតានៅក្នុងសង្គមប្រជាធិបតេយ្យ គឺរដ្ឋាភិបាលមានកាតព្វកិច្ចថែរក្សាសុខសន្តិភាព ស្ថិរភាពសង្គមជូនពលរដ្ឋ និងប្រទេសជាតិ៕
