(ភ្នំពេញ)៖​ លោកឧកញ៉ា អូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្ត្រី រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងជាប្រធានអង្គការមូលនិធិអភិវឌ្ឍន៍មុស្លិមកម្ពុជា នៅថ្ងៃទី០១ ខែកុម្ភៈ ឆ្នាំ២០១៨នេះ បានអនុញ្ញាតគណៈប្រតិភូសហករណ៍ជាតិម៉ាឡេស៊ី (ANGKASA) ដឹកនាំដោយ លោក Dato' Abdul Fattah Abdullah ប្រធានសហករណ៍ជាតិម៉ាឡេស៊ី និងជាប្រធានសហករណ៍អាស៊ាន ចូលជួបសំណេះសំណាល និង​ពិភាក្សាការងា​រដើម្បីសិក្សាផ្លាស់ប្តូរបទពិសោធន៍ការងារពាណិជ្ជកម្ម វិនិយោគ ទីផ្សារកា​រងារពលករកម្ពុជា និងការងារសហគមន៍ឥស្លាមកម្ពុជាក្រោម។​

​បន្ទាប់ពីចែករំលែកបទពិសោធន៍ដល់ភាគីម៉ាឡេស៊ី ស្តីពីឱកាសវិនិយោគនៅកម្ពុជា លោក អូស្មាន ហាស្សាន់ បានលើកឡើងថា ដោយមានការសហប្រតិបត្តិការយ៉ាងល្អ រវាងរាជរដ្ឋាភិបាលកម្ពុជា និង​ម៉ាឡេស៊ី ក្រោមការដឹកនាំប្រមុខរាជរដ្ឋាភិបាលកម្ពុជា ដែលមាន​សម្តេច​តេជោ ហ៊ុន សែន នាយករដ្ឋមន្ត្រី​នៃ​កម្ពុជា ​ក្នុងការដឹកនាំប្រទេស​ដែលធ្វើឲ្យមានសុខសន្តិភាព ស្ថេរភាព និងការអភិវឌ្ឍយ៉ាងឆាប់រហ័ស ធ្វើឲ្យគ្រប់សាសនា​នៅ​កម្ពុជាគ្មានទំនាស់ និងរើសអើង។

លោក អូស្មាន ហាស្សាន់ បញ្ជាក់ទៀតថា ​ក្រោមឆត្រគណបក្សប្រជាជនកម្ពុជា ក្រោយទទួលបានជ័យជម្នះ ក្នុងការបោះឆ្នោតជាតិកន្លងមក បានតែងតាំងមុខតំណែង​ជូនដល់ថ្នាក់ដឹកនាំឥស្លាម​ចំនួន​៧០០​ពាន់​នាក់ ស្មើនឹង​៤​ភាគរយ នៃចំនួនប្រជាជន​១៥​លាន​នាក់ មានតំណែងជារដ្ឋមន្រ្តី​២​រូប​ ដែលជាការបង្ហាញពីការជឿ ទុកចិត្តដល់សហគមន៍ឥស្លាម ក្នុងការចូលរួមអភិវឌ្ឍន៍ សហគមន៍ និងប្រទេសជាតិពី សម្តេចតេជោ ហ៊ុន សែន ជាពិសេសបង្កើតឲ្យមានស្ថាប័នគណៈដឹកនាំជាន់ខ្ពស់ នៃសាសនាឥស្លាមកម្ពុជាដែលមាន លោកឧកញ៉ា សុះ កំរី ជាចាងហ្វាង ធ្វើឲ្យប្រមុខថ្នាក់ដឹកនាំ នាបណ្តាប្រទេសឥស្លាមនៅទូទាំងពិភពលោក ជាពិសេសរាជរដ្ឋាភិបាល និង​ប្រជាជនម៉ាឡេស៊ី មានការអបអរសាទរ កោតសរសើរគោរពស្រលាញ់ពេញចិត្ត។

សូមបញ្ជាក់ថា ANGKASA ជាសហករណ៍ជាតិ ម៉ាឡេស៊ីដ៏ធំមួយ​បង្កើតឡើងឆ្នាំ​១៩៦៦ មានដៃគូសហការណ៍ចំនួន​១៣,៤២៨ និងសមាជិក​៧,០៦៦,២២២​លាននាក់ និងដើមទុន ១៣០,៧៤០.៦៨ លានរីង្ហិតម៉ាឡេស៊ី ដែលបានចូលរួមគ្នាមកពី គ្រប់មជ្ឈដ្ឋានការ​ងាររកស៊ីនៅម៉ាឡេស៊ី៕