(ស្វាយរៀង)៖ ថ្លែងក្នុងសន្និបាតបូកសរុបលទ្ធផលការងារយោធាប្រចាំឆ្នាំ២០១៧ និងទិសដៅអនុវត្តបន្ត ឆ្នាំ២០១៨ នៅតំបន់ប្រតិបត្តិការសឹករងស្វាយរៀង នាថ្ងៃទី៣១ ខែមករា ឆ្នាំ២០១៨ នាយឧត្ដមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ តំណាងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានសង្កត់ធ្ងន់ទៅលើ ការងារសន្តិសុខ ក្នុងខេត្តស្វាយរៀង ដោយលោកបានជំរុញឲ្យកងកម្លាំងប្រដាប់អាវុធទាំងអស់ ត្រូវបង្ក្រាបបទល្មើសខុសច្បាប់ និងឈានទៅកម្ទេចកម្លាំង ដែលកើតដោយអំពើខុសច្បាប់។
នៅក្នុងសន្និបាតនោះ ក៏មានការអញ្ជើញចូលរួមពី លោក ម៉ែន វិបុល អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត និងលោកឧត្ដមសេនីយ៍ទោ ប៉ែន សារ៉ុន មេបញ្ជាការរងយោធភូមិភាគទី២ និងជាមេបញ្ជាការតំបន់ប្រតិបត្តិការសឹករងស្វាយរៀង។
ក្នុងនាមសម្តេចពិជ័យសេនា ទៀ បាញ់, នាយឧត្តមសេនីយ៍ ម៉ឹង សំផន បានសំដែងនូវការកោតសរសើរ និងវាយតំលៃខ្ពស់ចំពោះនាយទាហាន នាយទាហានរង និងពលទាហាន ក្នុងកងឯកភាពតំបន់ប្រតិបត្តិការសឹករងស្វាយរៀង ដែលក្នុងឆ្នាំ២០១៧ កន្លងមក បានខិតខំយកអស់កម្លាំងកាយចិត្ត ក្នុងការបំពេញតួនាទីភារកិច្ចសំដៅពង្រឹងកិច្ចការ ការពារឯករាជ្យជាតិ អធិបតេយ្យ បូរណភាពទឹកដី ការពាររដ្ឋធម្មនុញ្ញ រាជរដ្ឋាភិបាល និងការពារសន្តិសុខ សណ្ដាប់ធ្នាប់ សង្គមជូនប្រជាពលរដ្ឋ និងចូលរួមចំណែកក្នុងការកសាង ស្តារ និងអភិវឌ្ឍន៍ប្រទេសជាតិ។
លោក ម៉ឹង សំផន បានសង្កត់ធ្ងន់ថា ដោយសារមានការដឹកនាំរបស់សម្តេចតេជោ ហ៊ុន សែន បានធ្វើឲ្យប្រទេសជាតិមានសន្តិភាព និងការអភិវឌ្ឍន៍ ដូចនេះកងយោធពលខេមរភូមិន្ទ ត្រូវការពារឲ្យបាននូវសន្តិភាព ដែលមានក្នុងពេលបច្ចុប្បន្ន ដើម្បីធានាដល់ការអភិវឌ្ឍន៍យូរអង្វែងទៅថ្ងៃអនាគត និងដើម្បីឈានទៅសម្រេចគោលដៅខាងលើនេះ គឺទាមទារឲ្យកងទ័ពត្រូវមានភាព ស្មោះត្រង់ចំពោះរាជរដ្ឋាភិបាល ចំពោះជាតិ និងមាតុភូមិ ត្រូវគោរពស្រឡាញ់ប្រជាជន មានឆន្ទៈប្រយុទ្ធប្តូរផ្តាច់ មានសមត្ថភាព គ្រប់គ្រាន់ក្នុងកិច្ចការពារជាតិ មាតុភូមិ។
ឆ្លៀតក្នុងឱកាសនោះ នាយឧត្តមសេនីយ៍ ម៉ឹង សំផន ក៏បានផ្ដាំផ្ញើ និងបានដាក់ចេញនូវទិសដៅការងារសំខាន់ៗមួយចំនួន ដល់តំបន់ប្រតិបត្តិការសឹករងស្វាយរៀង និងកងកម្លាំងទាំងអស់ឲ្យសហការគ្នា បំពេញតួនាទីភារកិច្ចឲ្យបានកាន់តែល្អប្រសើរថែម លើកិច្ចការការពារ សន្តិសុខ សណ្តាប់ធ្នាប់សង្គម និងត្រូវប្រឆាំងដាច់ខាតនូវរាល់ការប៉ុនប៉ងទាំងឡាយណា ដែលមានបំណងធ្វើបដិវត្តន៍ពណ៌ នាំទៅដល់ការបំផ្លាញនូវសុខសន្តិភាព ការអភិវឌ្ឍប្រទេសជាតិ និងសេចក្ដីសុខរបស់ប្រជាជន ដើម្បីធានាឲ្យបាននូវសន្តិសុខ សុវត្ថិភាព សម្រាប់ដំណើរការបោះឆ្នោតជ្រើសតាំង សមាជិកព្រឹទ្ធសភានីតិកាលទី៤ នៅថ្ងៃទី២៥ ខែកុម្ភៈ ឆ្នាំ២០១៨ និងការបោះឆ្នោតជ្រើសតាំងតំណាងរាស្ត្រនីតិកាលទី៦ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ។
លោក ម៉ឹង សំផន ក៏បាននាំយកនូវអំណោយរបស់ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ផ្តល់ជូនដល់បញ្ជាការដ្ឋាន តំបន់ប្រតិបត្តិការសឹករងស្វាយរៀងមាន៖ អង្ករ៥តោន មី១០០កេស ត្រីខ១០កេស និងថវិកា១០លានរៀល ផ្តល់ជូនកងរាជអាវុធហត្ថខេត្តស្វាយរៀង មានថវិកា៥លានរៀល មី១០០កេស និងស្នងការដ្ឋាននគរបាលខេត្ត ទទួលបានថវិកា៥លានរៀល និងមី១០០កេស៕
