(ភ្នំពេញ)៖ អ្នកវិភាគនយោបាយនៅកម្ពុជា លោក ឡៅ ម៉ុងហៃ និងជាអតីតជំនួយការលោក កឹម សុខា បានលើកឡើងថា ចលនាសង្រ្គោះជាតិរបស់លោក សម រង្ស៊ី ប្រហែលមិនទទួលបាន ជោគជ័យឡើយ ព្រោះក្រោយពេលមានការបង្កើតចលនាសង្គ្រោះជាតិភ្លាមមានប្រតិកម្មគាំទ្រអ្នកដែលមានប្រវត្តិតស៊ូជាមួយគណបក្ស សម រង្ស៊ី ប៉ុន្តែអ្នកស្មោះស្ម័គ្រជាមួយលោក កឹម សុខា មួយចំនួនបដិសេធមិនចូលរួមចលនានេះ, នេះបើយោងតាមសារព័ត៌មានភ្នំពេញប៉ុស្តិ៍ចេញផ្សាយនៅព្រឹកថ្ងៃទី៣០ ខែមករា ឆ្នាំ២០១៨នេះ។
លោក ឡៅ ម៉ុងហៃ បានថ្លែងប្រាប់ភ្នំពេញប៉ុស្តិ៍យ៉ាងដូច្នេះថា៖ «កាលពីនៅក្នុងប្រទេសហើយលំហប្រជាធិបតេយ្យពេលនោះមានទូលាយជាងសព្វថ្ងៃ ហើយគាត់នៅក្នុងប្រទេសទៀត គណបក្សរបស់គាត់មិនបានធំធាត់ណាស់ណាទេ ហើយដល់មកបក្សសង្គ្រោះជាតិក៏គាត់នៅក្នុងប្រទេសដែរហើយជាមួយឯកឧត្តម កឹម សុខា ទៀត។ ទាំង២នាក់ក៏មិនបានជោគជ័យក្នុងការកសាងគណបក្សសង្គ្រោះជាតិឲ្យទៅជាគណបក្សមានឯកភាពគ្នាពេញលេញទេ»។ លោកបានបញ្ជាក់ថា៖ «សព្វថ្ងៃនេះគាត់នៅក្រៅហើយស្ថានភាពក្នុងប្រទេស លំហប្រជាធិបតេយ្យកាន់តែរួញតូចស្របពេលដែលគណបក្សប្រជាជនពង្រឹងកម្លាំងសន្តិសុខ បង្ក្រាបតំណាងរាស្ត្រ សកម្មភាពនយោបាយណាដែលធ្វើឲ្យប៉ះពាល់ដល់គណបក្សប្រជាជនហ្នឹង ដូច្នេះសកម្មភាពរបស់ចលនាហ្នឹងពិបាកនឹងមានជោគជ័យដូចដែលបានគ្រោង»។ លោកថ្លែងថាចលនាមួយអាចជោគជ័យបានទាល់តែមានបណ្ដាញ និងសកម្មជននៅក្នុងប្រទេសដែលអាចធ្វើសកម្មភាពបាន។
លោក ឡៅ ម៉ុងហៃ បានថ្លែងថា គណបក្សសង្គ្រោះជាតិមិនសូវមានឯកភាពផ្ទៃក្នុងតាំងពីដំបូងដោយសារតែអ្នកស្មោះត្រង់ជាមួយលោក កឹម សុខា និងអ្នកស្មោះត្រង់ជាមួយលោក សម រង្ស៊ី ស្មោះត្រង់ទៅមេដឹកនាំរបស់ពួកគេរៀងៗខ្លួន។ លោកបន្តថា៖ «ការបែកបាក់យើងឃើញច្បាស់ហើយគឺលោក កឹម សុខា គាត់អត់គាំទ្រចលនានេះទេ»៕
សូមបញ្ជាក់ថា នៅថ្ងៃទី២៨ ខែមករា ឆ្នាំ២០១៨ លោក សម រង្ស៉ី រួមទាំងបក្ខពួករបស់លោកមួយចំនួនទៀត បង្កើតចលនាថ្មីមួយឈ្មោះ «ចលនាសង្រ្គោះជាតិ»។ ចលនាថ្មីនេះ ត្រូវបានលោក សម រង្ស៉ី អះអាងថា បង្កើតឡើងដើម្បីចូលរួមស្តារប្រជាធិបតេយ្យនៅកម្ពុជា ទាមទារឱ្យដោះលែង លោក កឹម សុខា រួមទាំងទាមទារឱ្យអតីតគណបក្សសង្រ្គោះជាតិ អាចចូលរួមការបោះឆ្នោតខាងមុខនេះឡើងវិញ។
ក្រុម កឹម សុខា និយម បានចាត់ទុកថា ចលនានេះនឹងបន្ថែមបន្ទុកទោសដល់លោក កឹម សុខា ដែលកំពុងជាប់ចោទពាក់ព័ន្ធ នឹងអំពើក្បត់ជាតិនៅកម្ពុជា។ ចំណែកគណបក្សប្រជាជនកម្ពុជា បានចាត់ទុកថា ចលនានេះជាក្រុមឧទ្ទាម ដែលច្បាប់មិនអនុញ្ញាតទេ។ ដោយឡែក លោក កឹម សុខា បានប្រកាសជំហររបស់លោកពីពន្ធនាគារត្រពាំងផ្លុងមកថា លោកមិនគាំទ្រ និងចូលរួមជាមួយចលនាសង្រ្គោះជាតិ ដែលបង្កើតឡើងដោយ លោក សម រង្ស៉ី នេះទេ៕
