(ភ្នំពេញ)៖ កម្មវិធី «មែកសឺដេស និងកំណប់អាថ៌កំបាំង» នៅថ្ងៃចន្ទ ទី២៩ ខែមករា ឆ្នាំ២០១៨ស្អែកនេះ នឹងចាប់ផ្តើមចេញដំណើរទៅគាស់កកាយរកកំណប់ទេសចរណ៍ និងផលិតផលនានានៅលើទឹកដីនៃខេត្តកំពង់ស្ពឺ ជាពិសេសនៅលើភ្នំឱរ៉ាល់ ដែលជាភ្នំខ្ពស់ជាងគេរបស់កម្ពុជា។

​លោក ឃុន ចាន់ថា នាយក​គ្រប់គ្រង​ផ្នែក​លក់ និង​ទីផ្សារនៃ​ក្រុមហ៊ុនស្ដារអូតូខេមបូឌា ដែលជាក្រុមហ៊ុនលក់រថយន្តដ៏ល្បីលើពិភពលោក Mercedes-Benz បានបញ្ជាក់ថា បេសកកម្ម​ពិសេសលើក​ទី​២​នេះ ក្រុមការងារ​នឹងធ្វើ​ដំណើរ​ឆ្ពោះទៅកាន់​ខេត្តកំពង់ស្ពឺ ដោយក្នុងនោះក្រុមបេសកកម្មនឹងទៅ​ទស្សនា និងផ្សព្វផ្សាយពីផលិតផលត្នោត ​(ផលិតផល​អត្តសញ្ញាណ​​ខេត្តកំពង់ស្ពឺ) ដែលមាននៅក្នុង​សិប្បកម្ម​ស្ករត្នោត។ ​ជាពិសេសក្រុមបេសកកម្ម​នឹង​​ឡើងលើ​​ភ្នំ​ឱ​រ៉ា​ល់ ជាភ្នំខ្ពស់​ជាងគេ​នៅ​កម្ពុជា មាន​កម្ពស់ដល់ទៅ ១,៨១៣​ម៉ែត្រ​ កប់ពពកទល់មេឃ។​

សូមបញ្ជាក់ថា ​ក្រុមហ៊ុនស្ដារអូតូខេមបូឌា អង្គភាពព័ត៌មាន Fresh News និងអង្គភាពសារព័ត៌មានអេឡិចត្រូនិក ThmeyThmey.com បានចាប់ដៃគ្នាបង្កើតកម្មវិធីមួយឈ្មោះថា «មែកសឺដេស (Mercedes-Benz) និងកំណប់អាថ៌កំបាំង» ដើម្បីរួមចំណែកផ្សព្វផ្សាយគោលដៅទេសចរណ៍ និងផលិតផលរបស់ខ្មែរនៅតាមបណ្តាខេត្តនានា។ តាមរយៈកម្មវិធីនេះ ក្រុមអ្នកព័ត៌មាននៃអង្គភាពព័ត៌មាន Fresh News និង «ថ្មីៗ» ដែលនាំដំណើរដោយរថយន្តដ៏ល្បាញល្បីរបស់អាល្លឺម៉ង់ «Mercedes-Benz» បានចុះទៅផ្តិតយករូបភាព និងយកព័ត៌មាននៅតំបន់ទេសចរណ៍ធម្មជាតិឆ្ងាយៗ និងដាច់ស្រយាល ដែលមិនសូវមានមនុស្សបានទៅដល់។

ក្នុងបេសកកម្មលើកទី១ ដែលចាប់ផ្តើមឡើងកាលពីខែសីហា ឆ្នាំ២០១៧ «មែកសឺដេស (Mercedes-Benz) និងកំណប់អាថ៌កំបាំង» បានធ្វើដំណើរទៅកាន់តំបន់ទេសចរណ៍អូរសោម នៃស្រុកវាលវែង ខេត្តពោធិ៍សាត់។ បើទោះបីផ្លូវធ្វើដំណើរទៅកាន់តំបន់ទេសចរណ៍អូរសោមមានការលំបាកយ៉ាងណាក្តី តែ «មែកសឺដេស (Mercedes-Benz) និងកំណប់អាថ៌កំបាំង» បានពុះពារការលំបាករហូតទៅដល់គោលដៅដោយផ្តិតយកនូវទិដ្ឋភាព និងទេសភាពដ៏ស្រស់ស្អាតលើខ្នងភ្នំ ព្រមទាំងទឹកជ្រោះឆាយប្រុយ។ យើងក៏បានផ្សព្វផ្សាយនូវអត្តសញ្ញាណម្ហូបអាហារអត្តសញ្ញាណក្នុងខេត្តពោធិ៍សាត់ ដែលធ្វើពីដើមក្រវាញផងដែរ។

សម្រាប់បេសកកម្មលើកទី២លើទឹកដីនៃខេត្តកំពង់ស្ពឺ ជាពិសេសការឡើងទៅកាន់ភ្នំឱរ៉ាល់នេះ «មែកសឺដេស (Mercedes-Benz) និងកំណប់អាថ៌កំបាំង» ក៏នឹងផ្តិតយកនូវផ្ទាំងទស្សនីយភាពនៃសម្រស់ដងភ្នំ ព្រៃឈើដ៏ស្រស់ស្អាតមកចែកជូនប្រជាពលរដ្ឋខ្មែរបានទស្សនាផងដែរ។ ដើម្បីជ្រាបថា សោភណ្ឌ និងទេសភាពនលើភ្នំឱរ៉ាល់ស្រស់ស្អាតយ៉ាងណានោះ សូមរង់ចាំទស្សនានូវការផ្សព្វផ្សាយរបស់អង្គភាពព័ត៌មាន Fresh News និង «ថ្មីៗ» ដែលនឹងមានផ្សាយជូនជាបន្តបន្ទាប់ចាប់ពីថ្ងៃទី២៩ ខែមករា ស្អែកនេះតទៅ។

មុននឹងចេញដំណើរទៅស្វែងរកកំណប់ទេសចរណ៍នៅក្នុងខេត្តកំពង់ស្ពឺ និងលើភ្នំឱរ៉ាល់នៅថ្ងៃស្អែកនេះ ក្រុមការងារ «មែកសឺដេស (Mercedes-Benz) និងកំណប់អាថ៌កំបាំង» ក៏មានការជជែកពិភាក្សាបង្ហាញចំណាប់អារម្មណ៍ និងព័ត៌មានខ្លះៗជុំវិញដំណើរទៅកាន់ខេត្តកំពង់ស្ពឺ និងឡើងភ្នំឱរ៉ាល់នេះផងដែរ។

សូមទស្សនាវីដេអូនៃការជជែកលើគម្រោងទៅកាន់ខេត្តកំពង់ស្ពឺ និងឡើងភ្នំឱរ៉ាល់នៅខាងក្រោម៖