(បាត់ដំបង)៖ នាយឧត្តមសេនីយ៍ សន្តិបណ្ឌិត សុខ ផល អគ្គនាយកអន្តោប្រវេសន៍ និងលោកវេជ្ជបណ្ឌិត លូល មេកូណិន (Dr. Leul MEKONEN) ប្រធានបេសកកម្ម នៃអង្គការអន្តរជាតិទេសន្តរប្រវេសន៍ IOM បានអញ្ជើញជាអធិបតីក្នុង
ពិធី និងដាក់ឲ្យប្រើប្រាស់ប្រព័ន្ធគ្រប់គ្រង និងត្រួតពិនិត្យប័ណ្ណព្រំដែន (MIDAS)ជាជំនួយរបស់រដ្ឋាភិបាលកាណាដា និងអនុវត្តគំរោងដោយអង្គការ IOM នៅប៉ុស្តិ៍នគរបាលច្រកទ្វារព្រំដែនអន្តរជាតិដូង ស្រុកកំរៀង ខេត្តបាត់ដំបង។
ពិធីសម្ពោធដាក់ឲ្យប្រើប្រាស់ប្រព័ន្ធគ្រប់គ្រង និងត្រួតពិនិត្យប័ណ្ណព្រំដែនថ្មីនេះ រៀបចំឡើងនៅថ្ងៃសុក្រ ១០កើត ខែមាឃ ឆ្នាំរកា នព្វស័ក ព.ស២៥៦១ ថ្ងៃទី២៦ ខែមករា ឆ្នាំ២០១៨។
ប្រព័ន្ធគ្រប់គ្រង និងត្រួតពិនិត្យប័ណ្ណព្រំដែនថ្មី ឈ្មោះថា Migration Information Data Analysis System ហៅកាត់ MIDAS ដែលនឹងជួយសម្រួលដល់ការងារគ្រប់គ្រង និងការត្រួតពិនិត្យដំណើរចេញ-ចូលប្រទេសរបស់ពលរដ្ឋកម្ពុជា ជាអ្នកប្រើប្រាស់ប័ណ្ណព្រំដែន សំរាប់ការចេញ-ចូល បំពេញការងារ និងប្រកបរបរទទួលទានផ្សេងៗតាមតំបន់ព្រំដែនក្នុងទឹកដីថៃ។
ដោយឡែក នៅរសៀលថ្ងៃដដែលនេះ នៅប៉ុស្តិ៍នគរបាលច្រកទ្វារព្រំដែនអន្តរជាតិព្រំ ខេត្តប៉ៃលិន នាយឧត្តមសេនីយ៍ សន្តិបណ្ឌិត សុខ ផល បានអញ្ជើញជាអធិបតីក្នុងពិធីសម្ភោធដាក់ឲ្យប្រើប្រាស់ អគារស្នាក់នៅ និងអគាររដ្ឋបាល របស់ប៉ុស្តិ៍នគរបាលច្រកទ្វារព្រំដែនអន្តរជាតិព្រំ ។
ក្នុងឱកាសនោះ នាយឧត្តមសេនីយ៍ សន្តិបណ្ឌិត សុខ ផល បានក្រើនរំលឹកដល់មន្ត្រីនគរបាលនៃប៉ុស្តិ៍នគរបាលច្រកទ្វារព្រំដែនអន្តរជាតិព្រំទាំងអស់ ត្រូវយកចិត្តទុកដាក់បំពេញភារកិច្ច ត្រូវរួមសហការជាមួយសមត្ថកិច្ចពាក់ព័ន្ធ ពិសេសសមត្ថកិច្ចនៃប្រទេសថៃបង្ការ និងបង្ក្រាបបទល្មើសឆ្លងដែនគ្រប់ប្រភេទអោយសំរេចបានជោគជ័យ៕
