(ពោធិ៍សាត់)៖ សិស្សានុសិស្សអនុ និងវិទ្យាល័យ ហ៊ុន សែន បាក់ចិញ្ជៀន១២នាក់ ក្នុងនោះស្រី១១នាក់ និងប្រុសម្នាក់ បានដួលសន្លប់បន្តបន្ទាប់គ្នា មិនដឹងមូលហេតុ។
ហេតុការណ៍នេះបានកើតឡើងនៅវេលាម៉ោង៩ព្រឹក ថ្ងៃទី២៥ ខែមករា ឆ្នាំ២០១៨ ក្នុងសាលាអនុ និងវិទ្យាល័យតែម្តង ស្ថិតក្នុងឃុំបាក់ចិញ្ជៀន ស្រុកភ្នំក្រវាញ ខេត្តពោធិ៍សាត់។
លោក ស៊ុម ផារិទ្ធ នាយកវិទ្យាល័យ ហ៊ុន សែន បាក់ចិញ្ជៀន បានឲ្យដឹងថា សិស្សានុសិស្សរបស់លោក នៅវែលាម៉ោង៩ព្រឹកនេះ មានការដួលសន្លប់បន្តបន្ទាប់គ្នា ក្នុងនោះមានស្រី១១នាក់ដោយមិនដឹងមូលហេតុនោះទេ។ ភ្លាមៗនោះ លោកគ្រូ អ្នកគ្រូរបស់លោក ក៏បានដឹកជញ្ជូនសិស្សានុសិស្សទាំងនោះ មកសង្គ្រោះបន្ទាន់ នៅមន្ទីរពេទ្យបង្អែកពោធិ៍សាត់ ដែលបង្កឲ្យមានការភ្ញាក់ផ្អើលតែម្តង។ នៅពេលនេះសិស្សសាលាទាំងនោះ បានមានអាក្ការធូរស្រាលបន្តិចហើយ គិតត្រឹមម៉ោង១២ថ្ងៃត្រង់នេះ។
ករណីដួលសន្លប់នេះ នៅមិនទាន់ដឹងមូលហេតុឲ្យច្បាស់លាស់នៅឡើយនោះទេ ព្រោះថា ក្រុមគ្រូពេទ្យកំពុងដុតដៃដុតជើង ធ្វើកោសល្យវិច្ច័យ៕
