(ភ្នំពេញ)៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី២៤ ខែមករា ឆ្នាំ២០១៨នេះបានបញ្ជាក់ជាថ្មីម្តងទៀតថា នៅមុនបុណ្យចូលឆ្នាំខ្មែរ ចូលមកដល់ក្នុងខែមេសា ឆ្នាំ២០១៨ខាងមុខនេះ ក្រសួងនឹងដាក់ឲ្យដំណើរការ នូវរថភ្លើងដឹកអ្នកដំណើរ ពីស្ថានីយរថភ្លើង ទៅកាន់ព្រលានយន្តហោះអន្តរជាតិភ្នំពេញ ខណៈកាណូតដឹកអ្នកដំណើរពីព្រែកព្នៅមកភ្នំពេញ និងពីភ្នំពេញ ទៅក្រុងតាខ្មៅ ខេត្តកណ្តាលត្រូវដាក់ឲ្យដំណើរការផងដែរ។

ការបញ្ជាក់ពីគម្រោងនេះ របស់លោកទេសរដ្ឋមន្ត្រី ស៊ុន ចាន់ថុល ធ្វើឡើងក្នុងឱកាលលោកអញ្ជើញចូលរួម ក្នុងកិច្ចប្រជុំបូកសុរបលទ្ធផល ការងារ​សុវត្ថិភាពចរាចរណ៍ផ្លូវគោកឆ្នាំ២០១៧ និងទិសដៅបន្ដឆ្នាំ២០១៨ នៅក្រសួងមហាផ្ទៃ។

បើតាមការបញ្ជាក់របស់លោក ស៊ុន ចាន់ថុល រថភ្លើងចំនួន៣គ្រឿងដែលបញ្ជាទិញពីប្រទេសម៉ិចស៊ិក នឹងមកដល់កម្ពុជា នៅខែមីនា ឆ្នាំ២០១៨នេះ។ ចំណែកឯកាណូត ដឹកអ្នកដំណើរវិញ ត្រូវដាក់ឲ្យដំណើរការ ចំនួន២គ្រឿងផងដែរ។

លោក ស៊ុន ចាន់ថុល ធ្លាប់បានបញ្ជាក់ថា ការដាក់ដំណើរការរថភ្លើងដឹកអ្នកដំណើរទៅកាន់ព្រលានយន្តហោះអន្តរជាតិនេះ នឹងអនុញ្ញាតឲ្យប្រជាពលរដ្ឋធ្វើដំណើររយៈពេល៣ខែ ដោយឥតគិតថ្លៃ។

លោកថា ការដាក់ឲ្យដំណើរការរថភ្លើងដឹកអ្នកដំណើរទៅកាន់ព្រលានយន្តហោះនេះ នឹងចូលរួមកាត់បន្ថយការកកស្ទះចរាចរណ៍ ហើយក៏ជួយសម្រួលដល់ការធ្វើដំណើររបស់ភ្ញៀវចេញចូលព្រលានយន្តហោះផងដែរ។

បើតាមលោកទេសរដ្ឋមន្រ្តី ការដំណើរតាមរថភ្លើងពីព្រលានយន្តហោះអន្តរជាតិភ្នំពេញ ទៅស្ថានីយរថភ្លើងក្នុងរាជធានីភ្នំពេញ ឬ ពីស្ថានីយរថភ្លើងក្នុងរាជធានីភ្នំពេញ ទៅកាន់ព្រលានយន្តហោះអន្តរជាតិភ្នំពេញ ត្រូវចំណាយពេលប្រមាណ២០ ទៅ ២៥នាទី។ នៅក្នុងរថភ្លើងមានដាក់ម៉ាស៊ីនត្រជាក់ ហើយប្រជាពលរដ្ឋដែលរស់នៅក្បែរព្រលានយន្តហោះ ហើយចង់ឡើងមករាជធានីភ្នំពេញ ក៏អាចប្រើប្រាស់រថភ្លើងនេះបានដែរ។

ក្រៅពីការប្រកាសដាក់ឲ្យដំណើរការ រថភ្លើងទៅកាន់ព្រលានយន្តហោះហើយនោះ លោក ស៊ុន ចាន់ថុល បានប្រកាសដែរថា ការធ្វើដំណើរតាមផ្លូវទឹកពីព្រែកព្នៅ មកកាន់រាជធានីភ្នំពេញ និងឆ្ពោះទៅកាន់ក្រុងតាខ្មៅ ខេត្តកណ្តាល ក៏គ្រោងនឹងដាក់ឲ្យដំណើរការ នៅមុនពេលបុណ្យចូលឆ្នាំខ្មែរផងដែរ។ បើតាមក្រសួងសាធារណការ និងដឹកជញ្ជូន បានបញ្ជាក់ថា មានកំពង់ផែចំនួន ១៥ទីតាំង ត្រូវបានរៀបចំសម្រាប់ឲ្យការណូតចូលសំចតដឹកអ្នកដំណើរ។ កំពង់ផែទាំង ១៥ទីតាំងនោះរួមមាន៖

* រាជធានីភ្នំពេញ
- ទី១៖ គល់ស្ពានព្រែកព្នៅត្រើយខាងកើត (កំពុងពិចារណា)
- ទី២៖ គីឡូម៉ែត្រលេខ៦
- ទី៣៖ ខាងមុខឃ្លាំងសាំងឬស្សីកែវជាប់ នឹងទីលានប្រជាធិបតេយ្យថ្មី
- ទី៤៖ ផែបណ្ដែតមុខផ្សាររាត្រី
- ទី៥៖ កំពង់ចម្លងកោះពេជ្រ-អារីយ៍ក្សត្រ
- ទី៦៖ ភូមិដើមចាន់ ឬគល់ស្ពានក្បាលថ្នល់ខាងកើត
- ទី៧៖ ចំណតរថយន្តចាក់អង្រែក្រោម
- ទី៨៖ បាក់ខែង ត្រង់ផ្លូវបំបែកលី យ៉ុងផាត់
- ទី៩៖ ទល់មុខផ្សារព្រែកលៀប (កំពង់ចម្លងព្រែកលៀប)
- ទី១០៖​​ ជាប់សណ្ឋាគារសុខាភ្នំពេញ
- ទី១១៖ ភូមិកោះនរា
- ទី១២៖ កំពង់ចម្លងក្តីតាកុយ
- ទី១៣៖ កំពង់ចម្លងតាព្រហ្មមាត់ក្រសះ

* ខេត្តកណ្តាលៈ
- ទី១៖ មុខវត្តព្រែកសំរោងក្រុងតាខ្មៅ (កំពុងពិចារណា)
- ទី២៖ កំពង់ចម្លងរោងចក្រក្តាបន្ទះផ្លូវត្រី