(ភ្នំពេញ)៖ ក្រុមហ៊ុន ព្រូដិនសលកម្ពុជា ដែលជាក្រុមហ៊ុនធានារ៉ាប់រងអាយុជីវិតឈានមុខគេមួយ របស់កម្ពុជា តាមរយៈមូលនិធិអភិវឌ្ឍន៍សហគមន៍របស់ខ្លួន គឺមូលនិធិព្រូដិនស៍ បានបន្តកិច្ចព្រមព្រៀងភាពជាដៃគូ ជាមួយនឹងស្ថានីយ៍ទូរទស្សន៍ CTN ដែលជាស្ថានីយ៍ទូរទស្សន៍ដ៏ពេញនិយមមួយនៅកម្ពុជា ដើម្បីផ្សព្វផ្សាយឯកសារអប់រំសំខាន់ៗ របស់មូលនិធិមួយសប្បុរសធម៌នេះ។

ឯកសារវីដេអូជាច្រើនរបស់មូលនិធិព្រូដិនស៍ មានគោលបំណងអប់រំប្រជាពលរដ្ឋខ្មែរ អំពីគ្រោះមហន្តរាយធម្មជាតិ សុវត្ថិភាពចរាចរណ៍ផ្លូវគោក កម្មវិធីអប់រំហិរញ្ញវត្ថុ។

អគ្គនាយកក្រុមហ៊ុន ព្រូដិនសលកម្ពុជា លោក David Nutman បានលើកឡើងថា៖ «ខ្ញុំមានជំនឿមុតមាំថា ភាពជាដៃគូនេះ នឹងផ្ដល់អត្ថប្រយោជន៍ច្រើនដល់សហគមន៍ ដែលយើងកំពុងជួយ។ ក្រុមហ៊ុនព្រូដិនសលកម្ពុជា តាមរយៈមូលនិធិអភិវឌ្ឍន៍សហគមន៍របស់ខ្លួន គឺមូលនិធិព្រូដិនស៍ មានការប្តេជ្ញាចិត្តយ៉ាងមុតមាំថា ក្នុងការអភិវឌ្ឍសង្គមនៅតាមសហគមន៍ដែលយើងធ្វើអាជីវកម្ម ហើយកម្មវិធីរបស់យើងបច្ចុប្បន្ន បាននឹងកំពុងរួមចំណែក និងផ្ដល់អត្ថប្រយោជន៍ដល់កុមាររាប់ម៉ឺននាក់ និងក្រុមគ្រួសាររបស់ពួកគេទូទាំងប្រទេសកម្ពុជា។ យើងសូមសម្ដែងនូវអំណរគុណដល់ស្ថានីយ៍ទូរទស្សន៍ CTN ក្នុងការសហការជាមួយយើងខ្ញុំ ដើម្បីផ្សព្វផ្សាយឯកសារអប់រំឲ្យបានកាន់តែទូលំទូលាយដល់ប្រជាពលរដ្ឋខ្មែរ, កាលណាកម្មវិធីអាចផ្សាយដល់ប្រជាពលរដ្ឋកាន់តែច្រើន នោះយើងនឹងអាចបង្កើតសង្គមដែលកាន់តែមានសុវត្ថិភាពថែមទៀត»។

ភាពជាដៃគូដំបូងរយៈពេល៣ឆ្នាំដំបូង រវាងស្ថានីយ៍ទូរទស្សន៍ CTN និងមូលនិធិព្រូដិនស៍ បានចាប់ផ្តើមកាលពីឆ្នាំ ២០១៤ ហើយភាពជាដៃគូថ្មី នឹងដំណើរការក្នុងរយៈពេល ៣ឆ្នាំជាបន្តបន្ទាប់ទៀត ចាប់ពីខែ ខែមករា ឆ្នាំ២០១៨ រហូតដល់ខែធ្នូ ឆ្នាំ២០២០។

លោក Glenn Ala ជានាយកផ្នែកទីផ្សារ នៃស្ថានីយ៍ទូរទស្សន៍ CTN បានថ្លែងផងដែរថា៖ «យើងខ្ញុំមានសេចក្តីរីករាយក្នុងការផ្ដល់ជាមធ្យោបាយដល់មូលនិធិព្រូដិនស៍ ក្នុងការផ្សព្វផ្សាយកម្មវិធីអប់រំរបស់ខ្លួន ឲ្យបានកាន់តែទូលំទូលាយដល់មហាជន ដែលក្នុងនោះមានវីដេអូអប់រំ ឆា-ឈីង ជាដើម ដែលខ្ញុំខ្លួនឯងផ្ទាល់ ជាមនុស្សពេញវ័យហើយនោះ ក៏យល់ឃើញថា សប្បាយ ហើយផ្ដល់ការអប់រំទៀត…តាមរយៈការលើកកម្ពស់ភាពជាពលរដ្ឋល្អ សុវត្ថិភាពទូទៅ និងការអប់រំផ្នែកហិរញ្ញវត្ថុដល់យុវជន និងមហាជន មានន័យថា យើងកំពុងតែជួយកសាងប្រទេសជាតិយើងឡើងវិញដូច្នោះដែរ»។

លោកបន្ដថា តាមរយៈកិច្ចព្រមព្រៀងភាពជាដៃគូថ្មីនេះ ស្ថានីយ៍ទូរទស្សន៍ ស៊ី ធី អិន នឹងផ្សព្វផ្សាយទូទាំងប្រទេសនូវខ្សែវីដេអូអប់រំ ដែលផលិតដោយមូលនិធិព្រូដិនស៍។ ទាំងនេះរួមមាន ខ្សែវីឌីអូ វិធានការសុវត្ថិភាព ស្ដីពីការត្រៀមបង្កាគ្រោះមហន្តរាយ វិធានការសុវត្ថិភាពស្តីពីសុវត្ថិភាពចរាចរណ៍ផ្លូវគោក ដែលកម្មវិធីទាំងពីរនេះ គឺជាគំនិតផ្តួចផ្តើម និងអនុវត្តទូទាំងតំបន់អាស៊ី ដោយមានការសហការជាដៃគូជាមួយតារាល្បីៗ ដូចជាលោក Manny Pacquiao និងលោកស្រី Michelle Yeoh ដើម្បីលើកទឹកចិត្តប្រជាពលរដ្ឋ ឲ្យក្លាយជាអ្នកប្រើប្រាស់ផ្លូវថ្នល់ប្រកបដោយសុវត្ថិភាពជាងមុន ឬក៏មានការត្រៀមលក្ខណៈជាងមុនសម្រាប់គ្រោះមហន្តរាយ ដើម្បីរក្សាសុវត្ថិភាពពួកគេផ្ទាល់ កម្មវិធី ឆា-ឈីង គឺជាកម្មវិធីអប់រំហិរញ្ញវត្ថុសម្រាប់កុមារ និងកម្មវិធីពាក់ព័ន្ធមួយចំនួនទៀត។

លោក Marc Fancy នាយកប្រតិបត្តិនៃមូលនិធិព្រូដិនស៍ បានបញ្ជាក់ទៀតថា «វត្ថុបំណងរបស់មូលនិធិយើង គឺការជួយសង្គ្រោះជីវិតបង្កើតសហគមន៍ដ៏រឹងមាំ និងផ្ដោតលើបញ្ហានានាដែលកើតមាននៅក្នុងតំបន់ទាំងមូល។ យើងផ្ដោតលើបញ្ហានានា ដូចជា កុមារតូច ការអប់រំ ហើជាពិសេស គឺយើងមិនត្រឹមតែផ្ដោតលើការឆ្លើយតបគ្រោះមហន្តរាយ និងការស្តារឡើងវិញពីគ្រោះមហន្តរាយប៉ុណ្ណោះទេ ប៉ុន្តែយើងផ្ដោតលើការត្រៀមលក្ខណៈទប់ទល់នឹងគ្រោះមហន្តរាយផងដែរ។ ដូច្នេះហើយ យើងបានបង្កើតឡើងនូវកម្មវិធីនានា ដែលយើងគិតថា មានសារសំខាន់ និងរួមចំណែកដល់ការងារទាំងអស់នេះ»។

ចាប់តាំងពីឆ្នាំ ២០១៣ ក្រុមហ៊ុនព្រូដិនសលកម្ពុជា តាមរយៈមូលនិធិព្រូដិនស៍ បានកំពុងអនុវត្តកម្មវិធីសង្គមជាច្រើនដើម្បីការរីកចម្រើននៅក្នុងសង្គមកម្ពុជាយើង៕