(ភ្នំពេញ)៖ រំលងបានត្រឹមតែ១០ថ្ងៃប៉ុណ្ណោះ ក្រុមឃាតកដែលបានកាប់សម្លាប់បុរសម្នាក់ យ៉ាងសាហាវព្រៃផ្សៃ នៅស្រុកមោងឬស្សី ខេត្តបាត់ដំបង ត្រូវបានកម្លាំងកងរាជអាវុធហត្ថតាមប្រមាញ់ ដោយចាប់ក្រុមឃាតកបាន៣នាក់ នៅថ្ងៃទី១៩ ខែមករា ឆ្នាំ២០១៨នេះ នៅសង្កាត់ផ្សារដើមគរ ខណ្ឌទួលគោក រាជធានីភ្នំពេញ។
ប្រតិបត្តិការក្ដៅគគុកនេះ ត្រូវបានធ្វើឡើងក្រោមការណែនាំពី នាយឧត្តមសេនីយ៍ សៅ សុខា អគ្គមេបញ្ជាការរង និងជាមេបញ្ជាការអាវុធហត្ថលើផ្ទៃប្រទេស និងបញ្ជាផ្ទាល់ដោយលោកឧត្តមសេនីយ៍ត្រី មាស សុវណ្ណ មេបញ្ជាការកងរាជអាវុធហត្ថខេត្តបាត់ដំបង ដោយកម្លាំងការិយាល័យព្រហ្មទណ្ឌកងរាជអាវុធហត្ថខេត្ត សហការជាមួយកម្លាំងកងរាជអាវុធហត្ថលើផ្ទៃប្រទេស និងកម្លាំងកងរាជអាវុធហត្ថរាជធានីភ្នំពេញ។
មេបញ្ជាការអាវុធហត្ថខេត្តបាត់ដំបង បានឲ្យដឹងថា ក្រុមឃាតកដែលចាប់បាន៣នាក់នោះ ទី១៖ ឈ្មោះ ជីប ធឺន ហៅជៀប ធឿន អាយុ២២ឆ្នាំ, ទី២៖ ឈ្មោះ សាយ សឹង្ហ អាយុ១៨ឆ្នាំ និងទី៣៖ ឈ្មោះ វង្ស វី អាយុ១៨ឆ្នាំ។
លោកឧត្ដមសេនីយ៍ត្រី មាស សុវណ្ណ បានបញ្ជាក់ថា តាមចម្លើយឆ្លើយសារភាពរបស់ជនល្មើស មូលហេតុដែលពួកគេកាប់ទៅលើជនរងគ្រោះ គឺមកពីជនរងគ្រោះជិះម៉ូតូសម្លឹងមើលមុខបក្ខពួកខ្លួន ហើយជនរងគ្រោះបានចុះមកវាយពួកខ្លួនមុន ទើបពួកខ្លួនវាយ និងកាប់ជនរងគ្រោះបណ្តាលរបួសធ្ងន់រហូតដល់ស្លាប់តែម្តង។
សូមរំលឹកថា នៅយប់ថ្ងៃទី០៩ ខែមករា ឆ្នាំ២០១៨ នៅភូមិរាមគន់ ឃុំគារ ស្រុកមោងឬស្សី ខេត្ដបាត់ដំបង មានករណីឃាតកម្មមួយកើតឡើង បង្កដោយជនល្មើសមិនស្គាល់សាវតាមួយក្រុម ដែលមានគ្នាចាប់ពី៥នាក់ ទៅ៧នាក់ ប្រដាប់ដោយដាវសាំម៉ារ៉ៃ, កាំបិតប៉័ងតោ, កាំបិតខ្វែវ និងចបជីកដងដែក បានធ្វើសកម្មភាពវាយ និងកាប់ទៅលើដៃគូទំនាស់មួយក្រុមផ្សេងទៀតដែលមានគ្នា៥នាក់ បណ្តាលឲ្យជនរងគ្រោះឈ្មោះ ណែម ភា អាយុ២៧ឆ្នាំ បណ្ដាលឲ្យស្លាប់នៅនឹងកន្លែងកើតហេតុ និង០២នាក់ផ្សេងទៀតរងរបួស៕
