(ភ្នំពេញ)៖ ក្រុមអតីតតំណាងរាស្រ្ត CNRP មួយចំនួនតំណាងដោយ លោក ម៉ៅ មុនីវណ្ណ នៅថ្ងៃទី១៦ ខែមករា ឆ្នាំ២០១៨នេះ បានដាក់លិខិតជូន តុលាការ ក្រុងភ្នំពេញ ដើម្បីស្នើសុំជួប លោក កឹម សុខា អតីតប្រធាន CNRP នៅក្នុងពន្ធនាគារត្រពាំងផ្លុង ខេត្តត្បូងឃ្មុំ ក្រោយផ្ទុះទំនាស់ផ្ទៃក្នុង ក្រោយពេល លោក សម រង្ស៊ី បង្កើត «ចលនាសង្រ្គោះជាតិ»។
សំណើសុំជួបសួរសុខទុក្ខលោក កឹម សុខា ត្រូវបានធ្វើឡើងដោយ លោក ម៉ៅ មុនីវណ្ណ អតីតតំណាងរាស្រ្តគណបក្សសង្រ្គោះជាតិមណ្ឌលខេត្តកំពង់ចាម ដោយសុំជួប លោក កឹម សុខា នៅព្រឹកថ្ងៃទី១៩ ខែមករា ឆ្នាំ២០១៨។ សមាសភាពអតីតតំណាងរាស្រ្ត អតីតថ្នាក់ដឹកនាំ CNRP ដែលនឹងសួរសុខទុក្ខនេះ រួមមាន លោក ម៉ៅ មុនីវណ្ណ លោក អ៊ូ ចាន់រ័ត្ន លោក ជាម ចន្នី លោក កង គឹមហាក់ និង លោកស្រី តែ ច័ន្ទមុនី រួមទាំងសហការីមួយចំនួនទៀត។
ទោះជាយ៉ាងនេះក្តី ចៅក្រមស៊ើបសួរ នៃសាលាដំបូងរាជធានីភ្នំពេញ លោក គី ឫទ្ធី មិនទាន់សម្រេចយ៉ាងណាទេ ចំពោះសំណើមួយនេះ។ លោកបានបញ្ជាក់ ប្រាប់បណ្តាញព័ត៌មាន Fresh News ឱ្យដឹងថា ពេលនេះលោកកំពុងពិនិត្យចំពោះលិខិតរបស់ លោក ម៉ៅ មុនីវណ្ណ។ លោកថ្លែងថា លោកទើបទទួលបានលិខិតរបស់លោក ម៉ៅ មុនីវណ្ណ នៅរសៀល ថ្ងៃទី១៦ ខែមករា ឆ្នាំ២០១៨នេះ ប៉ុណ្ណោះ។
សូមបញ្ជាក់ថា កាលពីថ្ងៃទី១២ ខែមករា ឆ្នាំ២០១៨ លោក សម រង្ស៊ី, លោក អេង ឆៃអ៊ាង, លោកស្រី មូ សុខហួរ និង លោកស្រី ជូឡុង សូមូរ៉ា បានប្រកាសបង្កើត ចលនាសង្រ្គោះជាតិនេះ ហើយអះអាងថា ចលនានេះ ត្រូវបានបង្កើតឡើង ដើម្បីទាមទារឲ្យមានការដោះលែង លោក កឹម សុខា និងទាមទារឲ្យមានការបោះឆ្នោតដោយសេរី និងយុត្តិធម៌នៅកម្ពុជា។
ភ្លាមៗនោះ អតីតសមាជិកបក្សប្រឆាំងប្រមាណ៥០នាក់ ដែលសុទ្ធសឹងតែជាបក្ខពួករបស់ លោក កឹម សុខា បានចេញសេចក្តីប្រកាសប្រឆាំងចំពោះចលនា ដែលបង្កើតឡើងដោយ ក្រុមរបស់ទណ្ឌិត សម រង្ស៊ី នាពេលនេះ។ ជាមួយគ្នានេះ អតីតសមាជិកបក្សប្រឆាំងទាំងនោះបានអះអាងថា ពួកគេនឹងមិនចូលរួម ជាមួយចលនានេះនោះឡើយ ហើយបន្តធ្វើសកម្មភាពក្រោមក្របខណ្ឌគណបក្សសង្រ្គោះជាតិ ដែលមានលោក កឹម សុខា ជាប្រធាន៕
