(កំពង់ស្ពឺ)៖ ថ្លែងចេញពីតំបន់ភ្នំធំម្រះព្រៅ ទីដែលកងទ័ពហ្វឹកហ្វឺនបាញ់គ្រាប់ពិត លោកឧត្តមសេនីយ៍ឯក ហ៊ុន ម៉ាណែត នាយរងសេនាធិការចម្រុះ នៃកងយោធពលខេមរភូមិន្ទ និងជាមេបញ្ជាការរងកងទ័ពជើងគោក បានប្រកាសថា កងទ័ពត្រូវត្រៀមហ្វឹកហ្វឺន ត្រៀមការពាររាជរដ្ឋាភិបាលស្របច្បាប់ និងការពារបូរណភាពទឹកដីជានិច្ច។
លោក ហ៊ុន ម៉ាណែត បានសង្កត់ធ្ងន់ថា សង្គ្រាមផ្ទុះឡើងដោយសារកងទ័ព បញ្ចប់ក៏ដោយសារកងទ័ព ហើយបើសិនកងទ័ពមិនច្បាស់លាស់ គឺកងកម្លាំងប្រដាប់អាវុធនឹងដូចប្រទេសស៊ីរី លីបី និងបណ្តាប្រទេសមួយចំនួនទៀត ដូច្នេះកងទ័ពដែលច្បាស់លាស់ និងការពាររាជរដ្ឋាភិបាលស្របច្បាប់នេះហើយ ទើបកម្ពុជាមានសុខសន្តិភាពពេញលេញ ដល់សព្វថ្ងៃ ។
ថ្លែងសង្កត់ធ្ងន់បែបនេះ របស់លោកឧត្តមសេនីយ៍ឯក ហ៊ុន ម៉ាណែត ត្រូវបានធ្វើឡើងនៅថ្ងៃទី១៥ ខែមករា ឆ្នាំ២០១៨នេះ ក្នុងឱកាសអញ្ជើញជាអធីបតី បិទវគ្គហ្វឺកហ្វឺន លំហាត់បាញ់ គ្រាប់ពិតចល័ត វាយសង្គ្រុប ថ្នាក់កងអនុសេនាធំថ្មើរជើងយានយន្ត របស់សិក្ខាកាមកងពលតូចលេខ៧០។
ក្នុងនោះក៏មានការចូលរួមពី សិក្ខាកាមមកពីយោធ ភូមិភាគទី២, យោធភូមិភាគទី៣, យោធភូមិភាគពិសេស និងកងពលធំអន្តរាគមន៍លេខ៣ នៅទីលាន សាលាហ្វឹកហ្វឺនរបស់កងពលនៅតំបន់ភ្នំធំម្រះព្រៅ ស្រុកសំរោងទង ខេត្តកំពង់ស្ពឺ។
បើតាមលោកឧត្តមសេនីយ៍ ហ៊ុន ម៉ាណែត កងទ័ពគឺជាកម្លាំងស្នូល ត្រូវស្មោះត្រង់ដាច់ខាត ចំពោះជាតិមាតុភូមិទាំងមូល ការពារដាច់ខាតសន្តិភាព និងស្ថិរភាព ឲ្យប្រទេសជាតិរីកចម្រើនទុកឲ្យកូនចៅជំនាន់ក្រោយ ហើយដោយសារកងកម្លាំងប្រដាប់អាវុធទាំងអស់បំពេញភារកិច្ច ធ្វើឲ្យប្រជាជនមានភាពកក់ក្តៅ
វត្តមាននៃកងកម្លាំងប្រដាប់អាវុធ មិនមែនជាការបន្លាច តែជាការធ្វើឲ្យមានភាពកក់ក្តៅ។
ក្នុងឋានៈជាមេដឹកនាំមួយរូប លោកបានឲ្យដឹងដែរថា អ្នកនយោបាយ និងក្រុមអមិត្តខ្លះ កំពុងទាញទម្លាក់រាជរដ្ឋាភិបាល ដូច្នេះសំខាន់បំផុតត្រូវថែរក្សាសុខសន្តិភាព ស្ថិរភាព ត្រូវទប់សង្គ្រាមផ្ទៃក្នុង មានតែខ្មែរគ្នាឯងទេដែលគិតពីខ្មែរ តែប្រទេសមហាអំណាចមិនដែលគិតពីខ្មែរនោះទេ ជាក់ស្តែងគឺមានតែបន្សល់ទុកនូវគ្រាប់បែកទម្លាក់មកកាលពីសម័យ លន់ នល់។
លោក ហ៊ុន ម៉ាណែត បានគូសបញ្ជាក់ថា សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានបន្តការបំពាក់ និងតម្លើងប្រាក់បៀវត្សគ្រប់បែបយ៉ាងដល់កងទ័ព និងមានជាប់ជាប្រចាំ ហើយគោលនយោបាយគ្រប់បែបយ៉ាងរដ្ឋប្រឹងផ្តល់ឲ្យ ប៉ុន្តែរឿងថ្នាំងថ្នាក់តូចមួយធ្វើឲ្យខូចខាតទាំងអស់ ប៉ុន្តែរឿងតូចនេះ គឺក្លាយជារឿងសតិអារម្មណ៍ ដែលត្រូវតែដោះស្រាយមិនអាចមើលស្រាលបានទេ៕
