(ភ្នំពេញ)៖ លោក សុខ បញ្ញា នាយរងផ្នែកសន្តិសុខ ដឹកនាំសហការជាមួយកម្លាំងអន្តរាគមន៍ពិសេស នៃអធិការដ្ឋាននគរបាលខណ្ឌពោធិ៍សែនជ័យ ក្រោមការបញ្ជាផ្ទាល់ពី លោក យឹម សារ៉ាន់ បានបើកប្រតិបត្តិការស្រាវជ្រាវរហូតកំណត់មុខសញ្ញា បង្ក្រាបករណីជួញដូរគ្រឿងញៀនចំនួន៣ករណីផ្សេងគ្នា ក្នុងពេលតែមួយ ដោយឃាត់ខ្លួនជនសង្ស័យចំនួន៣នាក់ ជាក់ស្តែងដែលកំពុងលក់ដកហូតបានថ្នាំញៀន៥៣កញ្ចប់។
លោក យឹម សារ៉ាន់ បានថ្លែងប្រាប់ភ្នាក់ងារ Fresh news ប្រចាំខណ្ឌពោធិ៍សែនជ័យថា នៅវេលាម៉ោង១០៖៣០នាទីព្រឹកថ្ងៃទី១៣ ខែមករា ឆ្នាំ២០១៨ស្ថិតនៅភូមិថ្មគោល១ សង្កាត់ចោមចៅទី២ ខណ្ឌពោធិ៍សែនជ័យ កម្លាំងរបស់លោកបានបើកប្រតិបត្តិការមួយករណី ដោយឃាត់ខ្លួនជនសង្ស័យម្នាក់ ឈ្មោះ ឌី វ៉ាន់លូ អាយុ១៨ឆ្នាំ មុខរបរមិនពិត ស្នាក់នៅភូមិកើតហេតុ ដែលកំពុងឈរលក់ថ្នាំញៀន និងដកហូតថ្នាំញៀនចំនួន២៥កញ្ចប់។
លុះនៅវេលាម៉ោង០៤៖២០នាទីល្ងាច កម្លាំងរបស់លោកបន្តប្រតិបត្តិការនៅចំណុចភូមិថ្មគោល១ សង្កាត់ចោមចៅទី២ ខណ្ឌពោធិ៍សែនជ័យដដែល ដោយជនសង្ស័យម្នាក់ទៀតជា «អនិតិជន» ប្រគល់ឲ្យខាងសង្កាត់យកទៅអប់រំកែប្រែ និងដកហូតបានថ្នាំ១១កញ្ចប់។
នៅវេលាម៉ោង០៥៖០០នាទីល្ងាច ស្ថិតនៅភូមិត្រពាំងថ្លឹង ច្រកឌឿងហែម ខាងក្រោយផ្ទះល្វែងខាងលិចរោងចក្រ៦ជាន់ សង្កាត់ចោមចៅទី១ ខណ្ឌពោធិ៍សែនជ័យ កម្លាំងរបស់លោកបានបន្តប្រតិបត្តិការ បានបន្តឃាត់់ខ្លួនជនសង្ស័យម្នាក់ទៀត ដែលកំពុងឈរលក់ថ្នាំញៀនយ៉ាងសកម្ម ជនសង្ស័យខាងនេះឈ្មោះ ឃុត ទី អាយុ១៩ឆ្នាំ មុខរបរមិនពិត ស្នាក់នៅភូមិកើតហេតុ ដោយដកហូតថ្នាំម៉ាទឹកកក បានចំនួន១៦កញ្ចប់។
បច្ចុប្បន្នជនសង្ស័យខាងលើ ត្រូវបានបញ្ចូនមកកាន់ផ្នែកជំនាញគ្រឿងញៀន នៃអធិការនគរបាលខណ្ឌពោធិ៍សែនជ័យ ដើម្បីចាត់ការទៅតាមផ្លូវច្បាប់៕
