(ស្វាយរៀង)៖ ថ្លែងនៅក្នុងពិធីសំណេះសំណាល ជាមួយសមាជិកគណបក្សប្រជាជន ក្នុងមូលដ្ឋាន ជិត១០០នាក់ និងនាំកុំព្យូទ័រទំនើប២គ្រឿង ដែលជាអំណោយរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នៅឃុំថ្នាធ្នង់ ស្រុករំដួល ខេត្តស្វាយរៀង លោក សៅ សុវណ្ណី ប្រធានក្រុមការងារចុះជួយឃុំថ្នាធ្នង់ បានជំរុញឲ្យសមាជិកបក្សទាំងអស់ត្រូវបន្តធ្វើអំពើល្អ និងចូលរួមដោះស្រាយទុក្ខលំបាកជូនប្រជាពលរដ្ឋឲ្យបានល្អបន្ថែមទៀត ជាពិសេសស្វាគមន៍ជានិច្ចរាល់ការចុះចូល ពីគណបក្សផ្សេងចូលមករួមរស់ជាមួយ គណបក្សប្រជាជនកម្ពុជា។
លោក សៅ សុវណ្ណី បានលើកឡើងថា ក្នុងរយៈពេល៣៩ឆ្នាំកន្លងមកនេះ ក្រោមការដឹកនាំរបស់ប្រមុខរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ប្រធានគណបក្សប្រជាជនកម្ពុជា បានដឹកនាំនាវាកម្ពុជា មានការរីកចម្រើនទាំងក្នុងកម្រិតជាតិ និងលើឆាកអន្តរជាតិ ដោយបានផ្តោតសំខាន់ទៅលើវិស័យ៤ ជាអាទិភាពមានទឹក ភ្លើង ផ្លូវ និងមនុស្ស។
លោកប្រធានក្រុមការងាររូបនេះ បានបន្ថែមថា ជាការពិតណាស់ទាំងអស់គ្នា ស្រឡាញ់សន្តិភាពហើយសន្តិភាពនេះ បានមកដោយលំបាកបំផុតដូច្នេះ ត្រូវរួមគ្នាថែរក្សាសន្តិភាព នេះឲ្យបានគង់វង្សរហូតតទៅ មិនបណ្ដោយឲ្យមានអ្នកណាម្នាក់ មកបំផ្លាញនូវសន្តិភាព ដែលកើតឡើងពីនយោបាយឈ្នះឈ្នះបានជាដាច់ខាត។ លោកបានប្រាប់សមាជិកទាំងអស់ថា មានតែគណបក្សប្រជាជនកម្ពុជាទេ ដែលមិនដែលរត់ចោលប្រជាពលរដ្ឋ គឺតែងតែនៅរួមសុខរួមទុក នៅជាមួលពលរដ្ឋជានិច្ច។
បន្ថែមពីនេះ លោកក៏បានអំពាវនាវ ដល់អាជ្ញាធរមូលដ្ឋានឃុំថ្នាធ្នង់ ត្រូវបន្តធ្វើអំពើល្អជាមួយពលរដ្ឋឲ្យបានកាន់តែបានល្អថែមទៀត ព្រមទាំងត្រូវផ្តល់សេវាសាធារណៈផ្សេងៗឲ្យបានឆាប់រហ័ស និងផ្សព្វផ្សាយឲ្យបានទូលំទូលាយ នូវសេវាមិនបង់ប្រាក់ដូចជា សំបុត្រកំណើត សំបុត្រអាពាហ៍ពិពាហ៍ អត្តសញ្ញាណបណ្ណ័ សៀវភៅគ្រួសារជាដើម ដើម្បីឲ្យពលរដ្ឋបានដឹងយល់ជ្រួតជ្រាបជៀងវាង មានការថ្នាំងថ្នាក់ណាមួយ។
នៅក្នុងពិធីនោះ សមាជិកបក្សដែលចូលរួមក្នុងម្នាក់ៗ ទទួលបានថវិកា១ម៉ឺនរៀល ចំណែកកុំព្យូទ័រទាំងពីរគ្រឿងនេះ មួយគ្រឿងប្រគល់ជូនស្នាក់ការគណបក្សឃុំ និងមួយគ្រឿងទៀតប្រគល់ជូនសាលាឃុំថ្នាធ្នង់៕
