(បន្ទាយមានជ័យ)៖ នៅព្រឹកថ្ងៃទី១៣ ខែមករា ឆ្នាំ២០១៨នេះ លោក អ៊ុំ រាត្រី អនុប្រធានក្រុមការងារយុវជនខេត្ត និងជាអភិបាលរងខេត្តបន្ទាយមានជ័យ បានទទួលជួបសម្តែងការគួរសម ពិភាក្សាផ្លាស់ប្តូរបទពិសោធន៍ ជាមួយក្រុមការងារយុវជនបក្សថ្នាក់កណ្តាលទទួលបន្ទុកតំបន់៣ ដឹកនាំដោយលោក ជាម ច័ន្ទសោភ័ណ និងលោក ឡាយ គឹមលី។
លោក អ៊ុំ រាត្រី បានថ្លែងនូវការស្វាគមន៍ ចំពោះគណប្រតិភូ ព្រមទាំងរាយការណ៍អំពីសភាពការណ៍រួម ក្នុងការដឹកនាំកសាងកម្លាំងយុវជនខេត្ត សម្រេចបានលទ្ធផល ជាច្រើននាពេលកន្លងមក។
លោកបន្តថា ក្រុមការងារយុវជនខេត្ត គឺមានស្ថានភាពអំណោយផលច្រើន ដោយមានលោកអភិបាលខេត្តជាប្រធាន ព្រមទាំងមានការជ្រោមជ្រែងយ៉ាងពេញទំហឹង ពីសំណាក់លោក ឧបនាយករដ្ឋមន្ត្រី កែ គឹមយ៉ាន ប្រធានក្រុមការងារថ្នាក់កណ្តាល ចុះជួយខេត្តបន្ទាយមានជ័យ និងលោកស្រី ម៉ៅ ម៉ាល័យ។
លោក អ៊ុំ រាត្រី អនុប្រធានក្រុមការងារយុវជនខេត្ត បានថ្លែងបញ្ជាក់ថា ដោយមើលឃើញពីកម្លាំងឈានមុខ និងមិនរុញរាក្នុងការសម្រេចបាន លទ្ធផលជាផ្លែផ្កា ទើបថ្នាក់ដឹកនាំបានសម្រេច ធ្វើការតែងតាំងតួនាទីបញ្ចូលទៅក្នុងអង្គភាពមួយចំនួនក្នុងខេត្ត។
ថ្លែងនាឱកាសនោះ លោក ជាម ច័ន្ទសោភ័ណ ប្រធានក្រុមទទួលបន្ទុកតំបន់៣ នៃក្រុមការងារយុវជនថ្នាក់កណ្តាល បានសម្តែងនូវអំណរសាទរ ដោយថ្លែងនូវការកោតសរសើរ និងវាយតម្លៃខ្ពស់ ចំពោះលទ្ធផលការងារ ដែលក្រុមការងារយុវជនខេត្តបន្ទាយមានជ័យ ខិតខំសម្រេចបានយ៉ាងល្អ។
សូមបញ្ជាក់ថា នៅក្នុងកិច្ចប្រជុំ នាជំនួបនោះ ក្រុមការងារបានលើកឡើងនូវសំនួរជាច្រើន ពិភាក្សាគ្នាទៅវិញទៅមក ដកស្រង់យកនូវបទពិសោធន៍ ក្នុងការអនុវត្តសកម្មភាពរយៈកាល កន្លងមក ដើម្បីបន្ថែមនូវចំនុចដែលនៅសេសសល់ ធ្វើយ៉ាងណាឲ្យក្រុមការងារយុវជនបក្ស សម្រេចបាននៅលទ្ធផល នាពេលបន្ទាប់ឲ្យកាន់តែល្អថែមឡើងមួយកម្រិតទៀត៕
