(ព្រះសីហនុ)៖ រសៀលថ្ងៃទី១២ ខែមករា ឆ្នាំ២០១៨នេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានដឹកនាំបើកកិច្ចប្រជុំជាបន្ទាន់មួយ ដើម្បីពង្រឹងការងារ សន្តិសុខ អន្តោប្រវេសន៍ និងព្រហ្មទណ្ឌ។
កិច្ចប្រជុំផ្តោតសំខាន់ លើការងារគ្រប់គ្រងជនបរទេសពិសេសជនជាតិចិន ការងារបង្ការ ទប់ស្កាត់ ប្រឆាំងអំពើភេរវកម្ម និងប្រឆាំងបទល្មើសព្រហ្មទណ្ឌ គ្រប់ប្រភេទ ដើម្បីការពារថែរក្សាសន្តិសុខ សណ្តាប់ធ្នាប់សង្គមឲ្យមាននិរន្តរភាពកាន់តែល្អប្រសើរ។
លោកឧត្តមសេនីយ៍ស្នងការ បានដាក់បទបញ្ជាឲ្យកម្លាំងនគរបាលអន្តោប្រវេសន៍ និងសន្តិសុខសហការគ្នា ជាមួយអធិការក្រុង-ស្រុក ចុះធ្វើបច្ចុប្បន្នភាពជនបរទេស ដែលកំពុងធ្វើការងារ ស្នាក់នៅតាមបណ្តាគ្រឹះស្ថាន ក្រុមហ៊ុននានា ក្នុងខេត្តព្រះសីហនុឲ្យដឹងចំនួនមនុស្សពិតប្រាកដ, ឯកសារឆ្លង, សៀវភៅការងារ និងមុខរបរឲ្យច្បាស់លាស់ កុំឲ្យមានការឆកល្វែង និងត្រូវស្មោះត្រង់។
ចំពោះជនបរទេសណា ដែលលួចលាក់រស់នៅស្នាក់នៅខុសច្បាប់មិន លោកស្នងការថា មិនត្រូវលើកលែងឲ្យរួចខ្លួនដាច់ខាត ត្រូវអនុវត្តន៍ច្បាប់អន្តោប្រវេសន៍។
លោកស្នងការ បានបញ្ជាក់បន្ថែមថា ពេលដែលចុះធ្វើបច្ចុប្បន្នភាព មន្ត្រីជំនាញត្រូវតែឆ្លៀតបញ្រ្ជាបច្បាប់ ដោយម៉ឺងម៉ាត់ដល់ជនបរទេសឲ្យបានដឹង និងយល់អំពីច្បាប់នៅកម្ពុជា៖
ទី១-អ្នកអត់ប័ណ្ណការងារត្រូវប្រឈមនឹងពិន័យ
ទី២-អ្នកផឹកស៊ីស្រវឹងបង្ករឿង ធ្វើឲ្យបាត់បង់សណ្ដាប់ធ្នាប់ ឬបង្កឲ្យមានរបួសស្នាមត្រូវប្រឈមមុខច្បាប់
ទី៣-បើកបរ អត់ច្បាប់ ល្មើសច្បាប់ ត្រូវពិន័យ ឬប្រឈមមុខនឹងច្បាប់។
ចំណែកនគរបាលព្រហ្មទណ្ឌ ត្រូវពង្រឹងសមត្ថភាពច្បាប់ និងមុខជំនាញ ព្រមទាំងធ្វើការហ្វឹកហាត់ក្បាច់គុនយូដូ ដើម្បីសុខភាពល្អ កាយសម្បទាមាំមួន ការពារខ្លួន ពេលចាប់ជនល្មើសប្រកបដោយគ្រោះថ្នាក់ផងដែរ។
លោកឧត្តមសេនីយ៍ទោ ជួន ណារិន្ទ បានបញ្ជាក់ថា «កងកម្លាំងនគរបាលជាតិ ត្រូវចងចាំថា ធ្វើអ្វីមួយ គឺដើម្បីប្រជាពលរដ្ឋ និងសង្គមជាតិ និងត្រូវមានស្មារតី សាមគ្គីភាពផ្ទៃក្នុង ស្រឡាញ់រាប់អានគ្នា»៕
